ਓਟਵਾ, 3 ਦਸੰਬਰ (ਪੋਸਟ ਬਿਊਰੋ) : ਸਟੈਟੇਸਟਿਕਸ ਕੈਨੇਡਾ ਵੱਲੋਂ ਪਿਛਲੇ ਮਹੀਨੇ ਦੇਸ਼ ਦੀ ਲੇਬਰ ਮਾਰਕਿਟ ਦੇ ਹਾਲ ਉੱਤੇ ਅੱਜ ਚਾਨਣਾ ਪਾਇਆ ਜਾਵੇਗਾ।
ਪਿਛਲੇ ਮਹੀਨੇ ਰੋਜ਼ਗਾਰ ਦੇ ਪੈਦਾ ਹੋਏ 31,000 ਮੌਕਿਆਂ ਨਾਲ ਅਕਤੂਬਰ ਦੇ ਮਹੀਨੇ ਬੇਰੋਜ਼ਗਾਰੀ ਦਰ 6·7 ਫੀ ਸਦੀ ਉੱਤੇ ਰਹੀ। ਆਰਬੀਸੀ ਦੇ ਇਕਨੌਮਿਸਟਸ ਨਥਾਨ ਜੈਨਜਨ ਤੇ ਕਲੇਅਰ ਫੈਨ ਨੇ ਆਖਿਆ ਕਿ ਨਵੰਬਰ ਵਿੱਚ 40,000 ਰੋਜ਼ਗਾਰ ਦੇ ਮੌਕੇ ਪੈਦਾ ਹੋਣ ਕਾਰਨ ਬੇਰੋਜ਼ਗਾਰੀ ਦਰ 6·6 ਫੀ ਸਦੀ ਉੱਤੇ ਪਹੁੰਚ ਜਾਵੇਗੀ।
ਇਨ੍ਹਾਂ ਦੋਵਾਂ ਨੇ ਆਖਿਆ ਕਿ ਸਰਵਿਸ ਸੈਕਟਰ ਵਿੱਚ ਭਾਵੇਂ ਇੰਪਲੌਇਮੈਂਟ ਮਹਾਂਮਾਰੀ ਤੋਂ ਪਹਿਲਾਂ ਵਾਲੇ ਸਮੇਂ ਤੋਂ ਹੇਠਲੇ ਪੱਧਰ ਉੱਤੇ ਹੈ ਪਰ ਬਿਜ਼ਨਸਿਜ਼ ਵੱਧ ਰਹੀ ਮੰਗ ਦੇ ਹਿਸਾਬ ਨਾਲ ਆਪਣਾ ਸਟਾਫ ਪੂਰਾ ਕਰਨ ਵਿੱਚ ਲੱਗੇ ਹੋਏ ਹਨ। ਸਟੈਟੇਸਟਿਕਸ ਕੈਨੇਡਾ ਵੱਲੋਂ ਪੇਸ਼ ਕੀਤੇ ਗਏ ਤਾਜ਼ਾ ਅੰਕੜਿਆਂ ਅਨੁਸਾਰ ਸਤੰਬਰ ਦੇ ਮਹੀਨੇ ਦੇ ਸ਼ੁਰੂ ਵਿੱਚ ਇੱਕ ਮਿਲੀਅਨ ਰੋਜ਼ਗਾਰ ਦੇ ਮੌਕੇ ਪੈਦਾ ਹੋਏ।
ਲੇਬਰ ਮਾਰਕਿਟ ਦੀ ਇਸ ਰਲਵੀਂ ਮਿਲਵੀਂ ਹਾਲਤ ਨੂੰ ਵੇਖਦਿਆਂ ਹੋਇਆਂ ਫੈਡਰਲ ਲਿਬਰਲ ਸਰਕਾਰ ਨੇ ਬੇਰੋਜ਼ਗਾਰਾਂ ਲਈ ਮਹਾਂਮਾਰੀ ਸਬੰਧੀ ਬੈਨੇਫਿਟ ਖ਼ਤਮ ਕਰ ਦਿੱਤੇ ਤਾਂ ਕਿ ਨੌਕਰੀਆਂ ਤੋਂ ਵਿਹਲੇ ਬੈਠੇ ਕੈਨੇਡੀਅਨਜ਼ ਉਪਲਬਧ ਨੌਕਰੀਆਂ ਹਾਸਲ ਕਰ ਸਕਣ।