ਓਨਟਾਰੀਓ, 3 ਦਸੰਬਰ (ਪੋਸਟ ਬਿਊਰੋ) : ਜੌਹਨਸਨ ਐਂਡ ਜੌਹਨਸਨ ਵੈਕਸੀਨ ਦੀ ਲਿਮਟਿਡ ਸਪਲਾਈ ਵੀਰਵਾਰ ਤੋਂ ਓਨਟਾਰੀਓ ਵਿੱਚ ਉਪਲਬਧ ਹੋਵੇਗੀ।
ਕੋਵਿਡ-19 ਦੇ ਬੂਸਟਰ ਸ਼ੌਟਸ ਲਈ ਪ੍ਰੋਵਿੰਸ ਵੱਲੋਂ ਵੀਰਵਾਰ ਨੂੰ ਹੀ ਐਲਾਨ ਕੀਤਾ ਗਿਆ ਤੇ ਪ੍ਰੋਵਿੰਸ ਨੇ ਆਖਿਆ ਕਿ ਵੱਧ ਤੋਂ ਵੱਧ ਲੋਕਾਂ ਨੂੰ ਵੈਕਸੀਨੇਟ ਕਰਨਾ ਸਾਡਾ ਟੀਚਾ ਹੈ। ਜੌਹਨਸਨ ਐਂਡ ਜੌਹਨਸਨ ਵੈਕਸੀਨ 18 ਸਾਲ ਤੋਂ ਵੱਧ ਉਮਰ ਦੇ ਲੋਕਾਂ ਦੇ ਨਾਲ ਨਾਲ ਉਨ੍ਹਾਂ ਲੋਕਾਂ ਨੂੰ ਵੀ ਮੁਹੱਈਆ ਕਰਵਾਈ ਜਾਵੇਗੀ ਜਿਨ੍ਹਾਂ ਨੂੰ ਕੋਈ ਐਲਰਜੀ ਜਾਂ ਐਮਆਰਐਨਏ ਵੈਕਸੀਨ ਤੋਂ ਕੋਈ ਹੋਰ ਦਿੱਕਤ ਹੈ। ਜਿਨ੍ਹਾਂ ਨੇ ਹੁਣ ਤੱਕ ਟੀਕਾਕਰਣ ਨਹੀਂ ਕਰਵਾਇਆ ਹੈ ਉਨ੍ਹਾਂ ਨੂੰ ਵੀ ਬੇਨਤੀ ਕੀਤੀ ਜਾ ਰਹੀ ਹੈ ਕਿ ਉਹ ਜਲਦ ਤੋਂ ਜਲਦ ਇਹ ਸ਼ੌਟ ਲਵਾ ਲੈਣ।
ਇਕਹਿਰੀ ਡੋਜ਼ ਵਾਲੀ ਜੌਹਨਸਨ ਐਂਡ ਜੌਹਨਸਨ ਦੀ ਇਹ ਵੈਕਸੀਨ ਹੁਣ ਤੱਕ ਓਨਟਾਰੀਓ ਵਾਸੀਆਂ ਨੂੰ ਉਪਲਬਧ ਨਹੀਂ ਸੀ ਹਾਲਾਂਕਿ ਇਸ ਨੂੰ ਮਾਰਚ ਤੋਂ ਹੀ ਹੈਲਥ ਕੈਨੇਡਾ ਵੱਲੋਂ ਮਨਜ਼ੂਰੀ ਦਿੱਤੀ ਜਾ ਚੁੱਕੀ ਸੀ।ਪਿਛਲੇ ਮਹੀਨੇ ਚੀਫ ਪਬਲਿਕ ਹੈਲਥ ਆਫੀਸਰ ਡਾ·ਥੈਰੇਸਾ ਟੈਮ ਨੇ ਆਖਿਆ ਕਿ ਇਸ ਵੈਕਸੀਨ ਦੀ ਸਪਲਾਈ ਬੀਸੀ, ਅਲਬਰਟਾ ਤੇ ਸਸਕੈਚਵਨ ਵੱਲੋਂ ਕੀਤੀ ਗਈ ਬੇਨਤੀ ਤੋਂ ਬਾਅਦ ਸਕਿਓਰ ਕਰਕੇ ਰੱਖ ਲਈ ਗਈ ਸੀ।