ਟਾਂਡਾ ਉੜਮੁੜ, 2 ਦਸੰਬਰ (ਪੋਸਟ ਬਿਊਰੋ)- ਏ ਟੀ ਐਮ ਮਸ਼ੀਨਾਂ ਵਿੱਚ ਕੈਸ਼ ਪਾਉਣ ਵਾਲੀ ਕੰਪਨੀ ਦੇ ਇੱਕ ਮੁਲਾਜ਼ਮ ਉਪਰ ਲੱਖਾਂ ਰੁਪਏ ਗਬਨ ਕਰਨ ਦੇ ਦੋਸ਼ ਵਿੱਚ ਟਾਂਡਾ ਅਤੇ ਮੁਕੇਰੀਆਂ ਥਾਣੇ ਵਿੱਚ ਕੇਸ ਦਰਜ ਕੀਤਾ ਗਿਆ ਹੈ। ਪੁਲਸ ਨੇ ਅੰਮ੍ਰਿਤਸਰ ਦੀ ਸੀ ਐਮ ਐਸ ਇੰਫਰਾ ਸਿਸਟਮ ਪ੍ਰਾਈਵੇਟ ਲਿਮਟਿਡ ਕੰਪਨੀ ਦੇ ਬ੍ਰਾਂਚ ਮੈਨੇਜਰ ਗੁਰਹਰਪ੍ਰੀਤ ਸਿੰਘ ਦੇ ਬਿਆਨ ਦੇ ਆਧਾਰ ਉੱਤੇ ਵਿਵੇਕ ਬੇਦੀ ਵਾਸੀ ਡੁੱਗਰੀ ਰਾਜਪੂਤਾਂ (ਮੁਕੇਰੀਆਂ) ਖਿਲਾਫ ਦਰਜ ਕੀਤਾ ਹੈ।
ਮਿਲੀ ਸੂਚਨਾ ਅਨੁਸਾਰ ਵਿਵੇਕ ਬੇਦੀ ਅਸਲ ਵਿੱਚ ਏ ਟੀ ਐਮ ਕਸਟੋਡੀਅਨ ਕੰਪਨੀ ਸੀ ਐਮ ਐਸ ਦਾ ਕਾਰਿੰਦਾ ਸੀ ਅਤੇ ਉਸ ਨੂੰ ਪੰਜਾਬ ਨੈਸ਼ਨਲ ਬੈਂਕ ਦਸੂਹਾ ਤੋਂ ਪੀ ਐਨ ਬੀ ਦੇ ਦਾਰਾਪੁਰ ਟਾਂਡਾ ਵਿੱਚ ਪਾਉਣ ਲਈ 17 ਲੱਖ ਰੁਪਏ ਇਸ਼ੂ ਕੀਤੇ ਗਏ ਸਨ। 22 ਨਵੰਬਰ ਨੂੰ ਵਿਵੇਕ ਬਿਨਾਂ ਦੱਸੇ ਡਿਊਟੀ ਉੱਤੇ ਨਹੀਂ ਆਇਆ, ਇਸ ਕਾਰਨ ਆਡਿਟ ਕੀਤਾ ਗਿਆ ਤਾਂ 10 ਲੱਖ ਰੁਪਏ ਘੱਟ ਨਿਕਲੇ। ਮੈਨੇਜਰ ਨੇ ਵਿਵੇਕ ਉੱਤੇ ਰਕਮ ਗਾਇਬ ਕਰਨ ਦਾ ਦੋਸ਼ ਲਾ ਕੇ ਕਿਹਾ ਕਿ ਉਸ ਨੂੰ ਏ ਟੀ ਐਮ ਮਸ਼ੀਨ ਖੋਲ੍ਹਣੀ ਅਤੇ ਬੰਦ ਕਰਨੀ ਆਉਂਦੀ ਹੈ ਅਤੇ ਉਸ ਨੇ ਰਕਮ ਖੁਰਦ-ਬੁਰਦ ਕੀਤੀ ਹੈ। ਇਸੇ ਤਰ੍ਹਾਂ ਮੁਕੇਰੀਆਂ ਵਿੱਚ ਵੀ ਗੁਰਹਰਪ੍ਰੀਤ ਸਿੰਘ ਨੇ ਵਿਵੇਕ ਬੇਦੀ ਦੇ ਖਿਲਾਫ ਕੇਸ ਦਰਜ ਕਰਵਾਇਆ ਹੈ। ਪੁਲਸ ਨੇ ਦੱਸਿਆ ਕਿ ਉਕਤ ਦੋਸ਼ੀ ਵਿਵੇਕ ਮੁਕੇਰੀਆਂ ਦੇ ਇੱਕ ਨਿੱਜੀ ਬੈਂਕ ਦੇ ਏ ਟੀ ਐਮ ਵਿੱਚ ਰੁਪਏ ਪਾਉਣ ਦੇ ਬਾਅਦ ਤੋਂ ਗਾਇਬ ਹੋ ਗਿਆ। ਜਦ ਜਾਂਚ ਕੀਤੀ ਤਾਂ ਉਸ ਵਿੱਚ ਚਾਲੀ ਲੱਖ 62 ਹਜ਼ਾਰ 500 ਰੁਪਏ ਘੱਟ ਨਿਕਲੇ। ਮੁਕੇਰੀਆਂ ਪੁਲਸ ਨੇ ਦੋਸ਼ੀ ਵਿਵੇਕ ਖਿਲਾਫ ਕੇਸ ਦਰਜ ਕਰ ਕੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।