ਓਸ਼ਵਾ, 1 ਦਸੰਬਰ (ਪੋਸਟ ਬਿਊਰੋ) : ਬੁੱਧਵਾਰ ਦੁਪਹਿਰ ਨੂੰ ਓਸ਼ਵਾ ਵਿੱਚ ਛੁਰੇਬਾਜ਼ੀ ਵਿੱਚ ਜ਼ਖ਼ਮੀ ਹੋਏ 15 ਸਾਲਾ ਲੜਕੇ ਦੇ ਮਾਮਲੇ ਦੀ ਦਰਹਾਮ ਰੀਜਨਲ ਪੁਲਿਸ ਵੱਲੋਂ ਜਾਚ ਕੀਤੀ ਜਾ ਰਹੀ ਹੈ।
ਦੁਪਹਿਰੇ 12:30 ਵਜੇ ਤੋਂ ਠੀਕ ਬਾਅਦ ਪੁਲਿਸ ਨੂੰ ਝੜਪ ਹੋਣ ਦੀ ਖਬਰ ਦੇ ਕੇ ਹਾਰਮਨੀ ਰੋਡ ਤੇ ਐਡੀਲੇਡ ਐਵਨਿਊ ਇਲਾਕੇ ਵਿੱਚ ਸੱਦਿਆ ਗਿਆ।ਪੁਲਿਸ ਨੇ ਦੱਸਿਆ ਕਿ ਮੌਕੇ ਉੱਤੇ ਉਨ੍ਹਾਂ ਨੂੰ 15 ਸਾਲਾ ਲੜਕਾ ਜ਼ਖ਼ਮੀ ਹਾਲਤ ਵਿੱਚ ਮਿਲਿਆ ਤੇ ਉਸ ਨੂੰ ਗੰਭੀਰ ਹਾਲਤ ਵਿੱਚ ਹਸਪਤਾਲ ਲਿਜਾਇਆ ਗਿਆ। ਉਸ ਦੀ ਹਾਲਤ ਖਤਰੇ ਤੋਂ ਬਾਹਰ ਦੱਸੀ ਜਾਂਦੀ ਹੈ।
ਪੁਲਿਸ ਵੱਲੋਂ ਇਲਾਕੇ ਵਿੱਚ ਕੀਤੀ ਜਾ ਰਹੀ ਜਾਂਚ ਦਰਮਿਆਨ ਕੌਰਨੇਸ਼ਨ ਪਬਲਿਕ ਸਕੂਲ, ਹਾਰਮਨੀ ਹਾਈਟਸ ਪਬਲਿਕ ਸਕੂਲ, ਈਸਟਡੇਲ ਕਾਲਜੀਏਟ ਐਂਡ ਵੋਕੇਸ਼ਨਲ ਇੰਸਟੀਚਿਊਟ, ਵਿਨਸੈਂਟ ਮੈਸੀ ਪਬਲਿਕ ਸਕੂਲ, ਗੌਰਡਨ ਬੀ ਐਟਰਸਲੇਅ ਪਬਲਿਕ ਸਕੂਲ ਤੇ ਸਰ ਅਲਬਰਟਾ ਲਵ ਕੈਥੋਲਿਕ ਸਕੂਲ ਨੂੰ ਹੋਲਡ ਐਂਡ ਸਕਿਓਰ ਉੱਤੇ ਰੱਖਿਆ ਗਿਆ।ਅਜੇ ਤੱਕ ਇਹ ਪਤਾ ਨਹੀਂ ਲੱਗ ਸਕਿਆ ਹੈ ਕਿ ਜ਼ਖ਼ਮੀ ਲੜਕਾ ਇਨ੍ਹਾਂ ਸਕੂਲਾਂ ਵਿੱਚੋਂ ਕਿਸੇ ਦਾ ਵਿਦਿਆਰਥੀ ਸੀ ਜਾਂ ਨਹੀਂ।
ਦੁਪਹਿਰੇ 2:30 ਵਜੇ ਪੁਲਿਸ ਨੇ ਟਵੀਟ ਕਰਕੇ ਦੱਸਿਆ ਕਿ ਹੋਲਡ ਐਂਡ ਸਕਿਓਰ ਆਰਡਰ ਹਟਾ ਦਿੱਤੇ ਗਏ ਹਨ। ਪੁਲਿਸ ਵੱਲੋਂ ਕਿਸੇ ਮਸ਼ਕੂਕ ਸਬੰਧੀ ਕੋਈ ਜਾਣਕਾਰੀ ਵੀ ਜਾਰੀ ਨਹੀਂ ਕੀਤੀ ਗਈ।