* ਮੈਂ ਤਾਂ 2022 ਤੋਂ ਬਾਅਦ ਦੀ ਯੋਜਨਾ ਦੱਸ ਰਿਹਾਂ: ਸਿੱਧੂ
ਲੁਧਿਆਣਾ, 30 ਨਵੰਬਰ, (ਪੋਸਟ ਬਿਊਰੋ)-ਕਾਂਗਰਸ ਪਾਰਟੀ ਨੇ ਬੇਸ਼ੱਕ ਸਾਲ 2022 ਦੀਆਂ ਵਿਧਾਨ ਸਭਾ ਚੋਣਾਂ ਲਈ ਮੁੱਖ ਮੰਤਰੀ ਦੇ ਚਿਹਰੇ ਦਾ ਐਲਾਨ ਨਹੀਂ ਕੀਤਾ, ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਖੁਦ ਨੂੰ ਮੁੱਖ ਮੰਤਰੀ ਵਜੋਂ ਅਸਿੱਧੇ ਤੌਰ ਉੱਤੇ ਪੇਸ਼ ਕਰਨ ਲੱਗ ਪਏ ਨਜ਼ਰ ਆਉਂਦੇ ਹਨ।
ਅੱਜ ਏਥੇ ਗੱਲਬਾਤ ਦੌਰਾਨ ਨਵਜੋਤ ਸਿੰਘ ਸਿੱਧੂ ਨੇ ਅਗਲੇ ਪੰਜ ਸਾਲ ਦਾ ਆਪਣਾ ਵਰਕ ਪਲਾਨ ਪੇਸ਼ ਕੀਤਾ ਤੇ ਮੁੱਖ ਮੰਤਰੀ ਦੇ ਕਰਨ ਵਾਲੇ ਕੰਮ ਗਿਣਾਏ, ਜਿਨ੍ਹਾਂ ਬਾਰੇ ਦਾਅਵਾ ਪਾਰਟੀ ਦਾ ਪ੍ਰਧਾਨ ਆਮ ਤੌਰ ਉੱਤੇ ਨਹੀਂ ਕਰਦਾ ਹੁੰਦਾ। ਨਵਜੋਤ ਸਿੰਘਸਿੱਧੂ ਨੇ ਏਥੋਂ ਤਕ ਕਿਹਾ ਕਿ ਉਹ ਜੋ ਕਹਿ ਰਹੇ ਹਨ, ਉਹ ਅਗਲੇ ਤਿੰਨ ਮਹੀਨਿਆਂ ਲਈ ਨਹੀਂ, 2022 ਤੋਂ ਬਾਅਦ ਦੀ ਯੋਜਨਾ ਹੈ ਤੇ ‘ਮੈਂ ਪੰਜ ਸਾਲਾਂ ਵਿੱਚ ਪੰਜਾਬ ਨੂੰ ਬਦਲ ਦਿਆਂਗਾ।’ ਇਹ ਗੱਲ ਕਹਿਣ ਤੋਂ ਬਾਅਦ ਉਨ੍ਹਾਂ ਨੂੰ ਇਸ ਦਾ ਅਹਿਸਾਸ ਹੋਇਆ ਕਿ ਉਹ ਆਪਣੀ ਯੋਜਨਾ ਦੱਸ ਗਏ ਹਨ ਤਾਂ ਉਨ੍ਹਾਂ ਗੱਲ ਤੋਂ ਪਲਟਦੇ ਹੋਏ ਕਿਹਾ ਕਿ ਇਹ ਉਨ੍ਹਾਂ ਦੀ ਪਲਾਨਿੰਗ ਨਹੀਂ, ਰਾਹੁਲ ਗਾਂਧੀ, ਪ੍ਰਿਅੰਕਾ ਤੇ ਸੋਨੀਆ ਗਾਂਧੀ ਦੀ ਯੋਜਨਾ ਹੈ।
ਇਸ ਮਹਾਨਗਰ ਵਿਚਲੇ ਸਨਅਤਕਾਰਾਂ ਨਾਲ ਬੈਠਕ ਤੋਂ ਪਹਿਲਾਂ ਨਵਜੋਤ ਸਿੰਘ ਸਿੱਧੂ ਨੇ ਕਿਹਾ ਕਿ ਪੰਜਾਬ ਵਿੱਚ ਨਵਾਂ ਨਿਵੇਸ਼ ਆਉਣ ਵਿੱਚਮੁੱਖ ਅੜਿੱਕਾ ਸਿੰਗਲ ਵਿੰਡੋ ਸਿਸਟਮ ਦੀ ਘਾਟ ਹੈ, ਇਕ ਸਨਅਤ ਲਾਉਣ ਲਈ 16 ਤੋਂ 33 ਸਰਕਾਰੀ ਕਲੀਅਰੈਂਸ ਲੈਣੀਆਂ ਪੈਂਦੀਆਂ ਹਨ, ਜਿਸ ਨਾਲ ਨਿਵੇਸ਼ਕ ਫਸ ਜਾਂਦਾ ਹੈ। ਉਨ੍ਹਾਂ ਕਿਹਾ ਕਿ ਸਾਲ 2022 ਵਿੱਚ ਸਰਕਾਰ ਬਣਦੇ ਸਾਰ ਉਹ ਸਿੰਗਲ ਵਿੰਡੋ ਸਿਸਟਮ ਪ੍ਰਭਾਵੀ ਬਣਾਉਣ ਨਾਲ ਇੱਕ ਡਿਜੀਟਲ ਪੋਰਟਲ ਪੇਸ਼ ਕਰਨਗੇ, ਜਿਸ ਉੱਤੇ ਸਨਅਤਕਾਰ ਸਾਰੀਆਂ ਰਸਮਾਂ ਪੂਰੀਆਂ ਕਰ ਕੇ ਆਨਲਾਈਨ ਕਲੀਅਰੈਂਸ ਲੈ ਲੈਣਗੇ।ਉਨ੍ਹਾ ਕਿਹਾ ਕਿ ਸਾਲ 2007 ਵਿੱਚ ਅਕਾਲੀ-ਭਾਜਪਾ ਸਰਕਾਰ ਬਣਨ ਪਿੱਛੋਂ ਨਿਵੇਸ਼ ਦੇ ਵੱਡੇ-ਵੱਡੇ ਵਾਅਦੇ ਕੀਤੇ ਗਏ ਸਨ, ਪਰ ਕੁਝ ਨਹੀਂ ਆਇਆ, ਅਗਲੀ ਵਾਰੀ ਸਾਡੀ ਸਰਕਾਰ ਨੇ ਆ ਕੇ ਇੱਕ ਲੱਖ ਕਰੋੜ ਰੁਪਏ ਦੇ ਨਿਵੇਸ਼ ਲਈ ਐੱਮਓ ਯੂ(ਸਮਝੌਤੇ) ਕੀਤੇ, ਜਿਸ ਵਿੱਚੋਂ 52 ਫ਼ੀਸਦ ਨਿਵੇਸ਼ ਆਪਰੇਸ਼ਨਲ ਹੋ ਗਿਆ।
ਨਵਜੋਤ ਸਿੰਘ ਸਿੱਧੂਅੱਜਕੱਲ੍ਹ ਬੁਹਤਾ ਕਰ ਕੇ ਆਪਣੀ ਹੀ ਪਾਰਟੀ ਦੀ ਪੰਜਾਬ ਸਰਕਾਰ ਉੱਤੇ ਹਮਲਾਵਰ ਨਜ਼ਰ ਆਉਂਦੇ ਤੇ ਕਹਿੰਦੇ ਹਨ ਕਿ ਉਹ ਸੰਗਠਨ ਵਿੱਚ ਹਨ, ਜਦਕਿ ਲੋਕਾਂ ਲਈ ਫ਼ੈਸਲੇ ਲੈਣਾ ਸਰਕਾਰ ਦਾ ਕੰਮ ਹੁੰਦਾ ਹੈ, ਪਰ ਅੱਜ ਸਾਲ 2022 ਤੋਂ ਬਾਅਦ ਦੀ ਸਰਕਾਰ ਵੱਲੋਂ ਕੀਤੇ ਜਾਣ ਵਾਲੇ ਕੰਮਾਂ ਬਾਰੇ ‘ਮੈਂ ਆਹ ਕਰਾਂਗਾ’ ਕਹਿਣ ਨਾਲ ਉਨ੍ਹਾਂ ਨੇ ਅਣ-ਐਲਾਨੇ ਤੌਰ ਉੱਤੇ ਮੁੱਖ ਮੰਤਰੀ ਲਈ ਚਿਹਰੇ ਵਜੋਂ ਆਪਣੇ ਆਪ ਨੂੰ ਪੇਸ਼ ਕਰ ਦਿੱਤਾ ਹੈ।