ਦੌਸਾ, 28 ਨਵੰਬਰ (ਪੋਸਟ ਬਿਊਰੋ)- ਅਲਵਰ-ਸਿਕੰਦਰਾ ਮੇਗਾ ਹਾਈਵੇ ਉੱਤੇ ਦੌਸਾ ਦੇ ਸੁਰੇਰ ਨੇੜੇ ਕੱਲ੍ਹ ਸਵੇਰੇ ਇੱਕ ਐਂਬੂਲੈਂਸ ਨੂੰ ਸਾਹਮਣੇ ਤੋਂ ਆਏ ਤੇਜ਼ ਰਫਤਾਰ ਟਰੱਕ ਨੇ ਟੱਕਰ ਮਾਰ ਦਿੱਤੀ। ਇਸ ਹਾਦਸੇ ਵਿੱਚ ਐਂਬੂਲੈਂਸ ਡਰਾਈਵਰ ਤੇ ਮਰੀਜ਼ ਸਮੇਤ ਚਾਰ ਜਣਿਆਂ ਦੀ ਘਟਨਾ ਵਾਲੀ ਜਗ੍ਹਾ ਉੱਤੇ ਮੌਤ ਹੋ ਗਈ।
ਬਸਵਾ ਥਾਣਾ ਦੇ ਇੰਚਾਰਜ ਨੇ ਦੱਸਿਆ ਹੈ ਕਿ ਢਹਿਲਾਵਾਸ (ਮਾਲਾਖੇੜਾ) ਦੇ ਬਲਜੀਤ ਪ੍ਰਜਾਪਤ ਦਾ ਤਿੰਨ ਦਿਨ ਪਹਿਲਾਂ ਪੈਰ ਟੁੱਟ ਗਿਆ ਸੀ। ਘਰ ਵਾਲੇ ਉਸ ਨੂੰ ਇਲਾਜ ਲਈ ਜੈਪੁਰ ਲਿਜਾ ਰਹੇ ਸਨ। ਇਸੇ ਦੌਰਾਨ ਹਾਦਸਾ ਹੋਇਆ। ਇਸ ਵਿੱਚ ਜੈਪੁਰ ਦੇ ਐਂਬੂਲੈਂਸ ਡਰਾਈਵਰ ਮਹੇਸ਼ ਖੰਡੇਲਵਾਲ, ਅਲਵਰ ਦੇ ਹਿੰਮਤ ਪ੍ਰਜਾਪਤ, ਬਲਜੀਤ ਪ੍ਰਜਾਪਤ (28) ਅਤੇ ਭੂਪ ਸਿੰਘ ਪ੍ਰਜਾਪਤ (35) ਦੀ ਮੌਕੇ ਉੱਤੇ ਮੌਤ ਹੋ ਗਈ। ਬਲਜੀਤ ਦਾ ਭਰਾ ਭਾਗ ਚੰਦ ਤੇ ਡਰਾਈਵਰ ਦਾ ਦੋਸਤ ਨਵਦੀਪ ਵਾਸੀ ਸੀਕਰ ਗੰਭੀਰ ਜ਼ਖਮੀ ਹਨ।