* ਰਾਮਬਾਗ 'ਚ ਹੋਏ ਮੁਕਾਬਲੇ ਦੌਰਾਨ ਦੋ ਹੋਰ ਅੱਤਵਾਦੀ ਵੀ ਮਾਰੇ
* ਸੱਤ ਮਿੰਟ 'ਚ ਹੀ ਅੱਤਵਾਦੀਆਂ ਦਾ ਕੰਮ ਤਮਾਮ ਕਰ ਦਿੱਤਾ ਗਿਆ
ਸ੍ਰੀਨਗਰ, 25 ਨਵੰਬਰ (ਪੋਸਟ ਬਿਊਰੋ)- ਅਕਤੂਬਰ ਮਹੀਨੇ ਸਿੱਖ ਮਹਿਲਾ ਪ੍ਰਿੰਸੀਪਲ ਤੇ ਹਿੰਦੂ ਅਧਿਆਪਕ ਦੀ ਹੱਤਿਆ ਵਿੱਚ ਸ਼ਾਮਲ ਲਸ਼ਕਰ ਏ ਤੋਇਬਾ ਦੇ ਹਿੰਦ ਸਕੁਐਡ ‘ਦਿ ਰਜਿਸਟੈਂਸ ਫਰੰਟ' (ਟੀ ਆਰ ਐਫ) ਦੇ ਏਰੀਆ ਕਮਾਂਡਰ ਮਿਹਰਾਨ ਨੂੰ ਉਸ ਦੇ ਦੋ ਸਾਥੀਆਂ ਸਮੇਤ ਪੁਲਸ ਨੇ ਢੇਰ ਕਰ ਦਿੱਤਾ। ਬੀਤੇ ਦਿਨ ਪੁਲਸ ਨੇ ਇਹ ਕਾਰਵਾਈ ਲਾਲ ਚੌਕ ਤੋਂ ਤਿੰਨ ਕਿਲੋਮੀਟਰ ਦੂਰ ਰਾਮਬਾਗ ਵਿੱਚ ਸਿਰਫ ਪੰਜ ਤੋਂ ਸੱਤ ਮਿੰਟ ਤਕ ਚੱਲੇ ਮੁਕਾਬਲੇ ਵਿੱਚ ਕਰ ਦਿੱਤੀ ਹੈ। ਇਹ ਖਬਰ ਫੈਲਦਿਆਂ ਹੀ ਡਾਊਨ ਟਾਊਨ ਵਿੱਚ ਤਣਾਅ ਫੈਲ ਗਿਆ। ਕੁਝ ਲੋਕਾਂ ਨੇ ਭੜਕਾਊ ਨਾਅਰੇਬਾਜ਼ੀ ਵੀ ਕੀਤੀ। ਮਿਹਰਾਨ ਨੇ ਤਿੰਨ ਹੋਰਨਾਂ ਸਾਥੀਆਂ ਨਾਲ ਮਿਲ ਕੇ ਸੱਤ ਅਕਤੂਬਰ ਨੂੰ ਸੰਗਮ ਈਦਗਾਹ ਸਥਿਤ ਸਰਕਾਰ ਸਕੂਲ ਵਿੱਚ ਦੋ ਗੈਰ ਮੁਸਲਿਮ ਅਧਿਆਪਕਾਂ ਸੁਪਿੰਦਰ ਕੌਰ ਤੇ ਦੀਪਕ ਚੰਦ ਦੀ ਹੱਤਿਆ ਕੀਤੀ ਸੀ। ਹੱਤਿਆ ਦੀ ਜਾਂਚ ਦੌਰਾਨ ਪੁਲਸ ਨੂੰ ਮਿਹਰਾਨ ਬਾਰੇ ਪਤਾ ਲੱਗਾ ਸੀ। ਉਦੋਂ ਤੋਂ ਹੀ ਉਸ 'ਤੇ ਨਜ਼ਰ ਰੱਖੀ ਜਾ ਰਹੀ ਸੀ। ਬੀਤੇ ਹਫਤੇ ਫੜੇ ਗਏ ਟੀ ਆਰ ਐਫ ਦੇ ਤਿੰਨ ਮੈਂਬਰੀ ਮਡਿਊਲ ਤੋਂ ਉਸ ਦਾ ਸੁਰਾਗ ਮਿਲਿਆ ਸੀ।
ਦੁਪਹਿਰ ਬਾਅਦ ਪੁਲਸ ਨੂੰ ਪਤਾ ਲੱਗਾ ਕਿ ਮਿਹਰਾਨ ਕੁਝ ਸਾਥੀਆਂ ਨਾਲ ਰਾਮਬਾਗ ਇਲਾਕੇ ਵਿੱਚ ਇੱਕ ਕਾਰ ਵਿੱਚ ਘੁੰਮ ਰਿਹਾ ਹੈ। ਪੁਲਸ ਨੇ ਕੋਈ ਨਵਾਂ ਨਾਕਾ ਨਹੀਂ ਲਾਇਆ ਬਲਕਿ ਆਮ ਨਾਕਿਆਂ ਵਾਂਗ ਪੁਲਸ ਟੀਮ ਤੈਨਾਤ ਰੱਖੀ। ਇਹ ਕਾਰ ਜਿਉਂ ਹੀ ਰਾਮਬਾਗ ਇਲਾਕੇ ਵਿੱਚ ਹਵਾਈ ਅੱਡੇ ਵੱਲ ਜਾਣ ਵਾਲੀ ਸੜਕ 'ਤੇ ਮੁੜਨ ਲੱਗੀ ਤਾਂ ਜਵਾਨਾਂ ਨੇ ਇਸ ਨੂੰ ਰੋਕਣ ਦਾ ਯਤਨ ਕੀਤਾ। ਅੱਤਵਾਦੀਆਂ ਨੇ ਜਿਉਂ ਹੀ ਗਤੀਵਿਧੀ ਕਰਨੀ ਚਾਹੀ ਤਾਂ ਪਹਿਲਾਂ ਤੋਂ ਹੀ ਚੌਕਸ ਜਵਾਨਾਂ ਨੇ ਤਿੰਨਾਂ ਅੱਤਵਾਦੀਆਂ ਨੂੰ ਉਥੇ ਹੀ ਢੇਰ ਕਰ ਦਿੱਤਾ। ਕਰੀਬ ਪੰਜ ਤੋਂ ਸੱਤ ਮਿੰਟ 'ਚ ਪੂਰੀ ਮੁਹਿੰਮ ਸਮਾਪਤ ਹੋ ਗਈ। ਮਾਰੇ ਗਏ ਦੋ ਹੋਰਨਾਂ ਅੱਤਵਾਦੀਆਂ 'ਚ ਅਰਾਫਾਤ ਤੇ ਮਨਜ਼ੂਰ ਸ਼ਾਮਲ ਹਨ।