ਹਾਲਟਨ, 20 ਅਕਤੂਬਰ (ਪੋਸਟ ਬਿਊਰੋ) : ਮਿਲਟਨ ਦੇ ਐਲੀਮੈਂਟਰੀ ਸਕੂਲ ਦੇ ਬਾਹਰ ਬੱਚਿਆਂ ਨਾਲ ਸ਼ੱਕੀ ਢੰਗ ਨਾਲ ਗੱਲਬਾਤ ਕਰਨ ਵਾਲੇ ਤਿੰਨ ਵਿਅਕਤੀਆਂ ਦੀ ਪਛਾਣ ਕਰਨ ਦੀ ਹਾਲਟਨ ਪੁਲਿਸ ਕੋਸਿ਼ਸ਼ ਕਰ ਰਹੀ ਹੈ।
ਪੁਲਿਸ ਨੇ ਦੱਸਿਆ ਕਿ ਇਸ ਤਰ੍ਹਾਂ ਦੀ ਪਹਿਲੀ ਘਟਨਾ 15 ਅਕਤੂਬਰ ਨੂੰ ਸਵੇਰੇ 10:55 ਤੇ 11:35 ਦਰਮਿਆਨ ਵਾਪਰੀ।ਪਾਰਕ ਕੀਤੀ ਗਈ ਕਾਰ ਵਿੱਚ ਸਵਾਰ ਵਿਅਕਤੀ ਆਪਣੇ ਸੈੱਲਫੋਨ ਰਾਹੀਂ ਹਾਅਥੌਰਨ ਵਿਲੇਜ ਪਬਲਿਕ ਸਕੂਲ ਵਿਖੇ ਬੱਚਿਆਂ ਦੀਆਂ ਫੋਟੋਆਂ ਲੈ ਰਿਹਾ ਸੀ।ਉਸ ਸਮੇਂ ਉਹ ਵਿਅਕਤੀ ਆਪਣੀ ਕਾਰ ਵਿੱਚ ਇੱਕਲਾ ਹੀ ਸੀ।ਪੁਲਿਸ ਨੇ ਦੱਸਿਆ ਕਿ ਉਸ ਨੇ ਆਪਣੀ ਕਾਰ ਸਕੂਲ ਦੀ ਸੌਕਰ ਫੀਲਡ ਲਾਗੇ ਪਾਰਕ ਕੀਤੀ ਹੋਈ ਸੀ।
ਕੁੱਝ ਦਿਨ ਬਾਅਦ 18 ਅਕਤੂਬਰ ਨੂੰ ਸਵੇਰੇ 10:55 ਤੇ 11:35 ਦਰਮਿਆਨ ਇਹੋ ਵਿਅਕਤੀ ਮੁੜ ਇਸੇ ਇਲਾਕੇ ਵਿੱਚ ਪਾਰਕ ਕੀਤੀ ਕਾਰ ਵਿੱਚ ਵੇਖਿਆ ਗਿਆ, ਪਰ ਇਸ ਵਾਰੀ ਉਸ ਦੇ ਨਾਲ ਦੋ ਹੋਰ ਵਿਅਕਤੀ ਵੀ ਕਾਰ ਵਿੱਚ ਮੌਜੂਦ ਸਨ।ਹਾਲਟਨ ਪੁਲਿਸ ਨੇ ਦੱਸਿਆ ਕਿ ਇਸ ਵਿਅਕਤੀ ਵੱਲੋਂ ਇੱਕ ਨਿੱਕੀ ਬੱਚੀ ਨੂੰ ਕੈਂਡੀ ਦੇਣ ਦੀ ਕੋਸਿ਼ਸ਼ ਵੀ ਕੀਤੀ ਗਈ। ਗੱਡੀ ਵਿੱਚ ਸਵਾਰ ਤਿੰਨਾਂ ਵਿਅਕਤੀਆਂ ਵਿੱਚੋਂ ਇੱਕ ਇਸ ਲਾਂਘੇ ਉੱਤੇ ਬੱਚਿਆਂ ਦੀਆਂ ਤਸਵੀਰਾਂ ਲੈ ਰਿਹਾ ਸੀ।ਸਕੂਲ ਸਟਾਫ ਵੱਲੋਂ ਜਦੋਂ ਇਨ੍ਹਾਂ ਵਿਅਕਤੀਆਂ ਤੱਕ ਪਹੁੰਚ ਕਰਨ ਦੀ ਕੋਸਿ਼ਸ਼ ਕੀਤੀ ਗਈ ਤਾਂ ਉਹ ਉੱਥੋਂ ਚਲੇ ਗਏ।
ਦੋਵਾਂ ਮਾਮਲਿਆਂ ਵਿੱਚ ਡਰਾਈਵਰ 21 ਸਾਲਾ ਵਿਅਕਤੀ ਦੱਸਿਆ ਜਾ ਰਿਹਾ ਹੈ ਜਿਸ ਦੇ ਕਾਲੇ ਤੇ ਨਿੱਕੇ ਵਾਲ ਹਨ। ਦੂਜੇ ਮਾਮਲੇ ਵਿੱਚ ਗੱਡੀ ਵਿੱਚ ਸਵਾਰ ਇੱਕ ਹੋਰ ਵਿਅਕਤੀ ਦਾ ਵੇਰਵਾ ਦਿੰਦਿਆਂ ਪੁਲਿਸ ਨੇ ਆਖਿਆ ਕਿ ਉਹ ਗੋਰੇ ਰੰਗ ਦਾ ਵਿਅਕਤੀ ਹੈ ਜਿਸਨੇ ਕਾਲੇ ਰੰਗ ਦੀ ਸ਼ਰਟ ਪਾਈ ਹੋਈ ਸੀ ਤੇ ਉਸ ਦੀ ਸ਼ਰਟ ਦੀਆਂ ਬਾਵ੍ਹਾਂ ਉੱਤੇ ਸੱਪ ਵਰਗੇ ਪੈਟਰਨ ਦੇ ਨਿਸ਼ਾਨ ਸਨ। ਤੀਜੇ ਵਿਅਕਤੀ ਦਾ ਵੇਰਵਾ ਅਜੇ ਜਾਰੀ ਨਹੀਂ ਕੀਤਾ ਗਿਆ ਹੈ। ਪੁਲਿਸ ਨੇ ਦੱਸਿਆ ਕਿ ਜਿਸ ਗੱਡੀ ਵਿੱਚ ਇਹ ਤਿੰਨੇ ਵਿਅਕਤੀ ਸਵਾਰ ਸਨ ਉਹ ਦਰਮਿਆਨੇ ਆਕਾਰ ਦੀ, ਚਾਰ ਦਰਵਾਜਿ਼ਆਂ ਵਾਲੀ, ਕਾਲੇ ਰੰਗ ਦੀ ਮਰਸਡੀਜ਼ ਸੀ, ਜਿਸਦੀਆਂ ਖਿੜਕੀਆਂ ਰੰਗੀਆਂ ਹੋਈਆਂ ਸਨ।