ਅੰਮ੍ਰਿਤਸਰ, 17 ਅਕਤੂਬਰ (ਪੋਸਟ ਬਿਊਰੋ)- ਏਥੇ ਚਾਟੀਵਿੰਡ ਪਿੰਡ ਨੇੜੇ ਕਾਰ ਸਵਾਰ ਪੰਜ ਲੁਟੇਰਿਆਂ ਨੇ ਰਿਸ਼ਤੇਦਾਰ ਦੇ ਵਿਆਹ ਵਿੱਚ ਜਾਂਦੇ ਚੰਡੀਗੜ੍ਹ ਦੇ ਜੋੜੇ ਤੋਂ ਤੇਜ਼ਧਾਰ ਹਥਿਆਰਾਂ ਦੀ ਨੋਕ ਉੱਤੇ ਗਹਿਣੇ ਅਤੇ ਹੋਰ ਸਾਮਾਨ ਲੁੱਟ ਲਿਆ। ਪੁਲਸ ਨੇ ਅਣਪਛਾਤੇ ਲੋਕਾਂ ਖਿਲਾਫ ਲੁੱਟ ਖੋਹ ਦੇ ਦੋਸ਼ ਵਿੱਚ ਕੇਸ ਦਰਜ ਕਰ ਲਿਆ ਹੈ।
ਚੰਡੀਗੜ੍ਹ ਦੇ ਸੈਕਟਰ 42-ਸੀ ਦੇ ਵਾਸੀ ਪਵਨ ਭਾਰਦਵਾਜ਼ ਨੇ ਚਾਟੀਵਿੰਡ ਥਾਣੇ ਦੀ ਪੁਲਸ ਨੂੰ ਦੱਸਿਆ ਕਿ ਉਸ ਦੇ ਪਿਤਾ ਦਵਿੰਦਰ ਭਾਰਦਵਾਜ ਚੰਡੀਗੜ੍ਹ ਪੁਲਸ ਤੋਂ ਰਿਟਾਇਰਡ ਹਨ। ਉਨ੍ਹਾਂ ਦੇ ਰਿਸ਼ਤੇਦਾਰ ਅੰਮ੍ਰਿਤਸਰ ਰਹਿੰਦੇ ਹਨ। ਉਹ ਵੀਰਵਾਰ ਦੇਰ ਰਾਤ ਪਤਨੀ ਜੈਪ੍ਰੀਤ ਕੌਰ ਨਾਲ ਕਾਰ ਵਿੱਚ ਅੰਮ੍ਰਿਤਸਰ ਵਿਚਲੇ ਰਿਸ਼ਤੇਦਾਰ ਦੇ ਵਿਆਹ ਵਿੱਚ ਚੱਲੇ ਸਨ। ਜਦੋਂ ਚਾਟੀਵਿੰਡ ਨੇੜੇ ਪਹੁੰਚੇ ਤਾਂ ਉਨ੍ਹਾਂ ਨੇ ਗੱਡੀ ਰੋਕੀ। ਪਿਸ਼ਾਬ ਕਰਨ ਪਿੱਚੋਂ ਉਹ ਗੱਡੀ ਵਿੱਚ ਬੈਠੇ ਤਾਂ ਇੰਨੇ ਵਿੱਚ ਇੱਕ ਕਾਰ ਉਨ੍ਹਾਂ ਦੀ ਗੱਡੀ ਨੇੜੇ ਆ ਕੇ ਰੁਕੀ। ਉਸ ਵਿੱਚੋਂ ਤੇਜ਼ਧਾਰ ਹਥਿਆਰ ਲੈ ਕੇ ਉਤਰੇ ਦੋ ਨੌਜਵਾਨ ਉਨ੍ਹਾਂ ਦੀ ਗੱਡੀ ਵਿੱਚ ਜਬਰੀ ਸਵਾਰ ਹੋ ਗਏ। ਜਦ ਉਨ੍ਹਾਂ ਨੇ ਵਿਰੋਧ ਕੀਤਾ ਤਾਂ ਲੁਟੇਰਿਆਂ ਨੇ ਤੇਜ਼ਧਾਰ ਦਾਤਰ ਦਿਖਾ ਕੇ ਉਨ੍ਹਾਂ ਨੂੰ ਜਾਨ ਤੋਂ ਮਾਰਨ ਦੀ ਧਮਕੀ ਦਿੱਤੀ। ਇਸ ਪਿੱਛੋਂ ਲੁਟੇਰੇ ਕਾਰ ਵਿੱਚ ਰੱਖਿਆ ਲੈਪਟਾਪ, ਪਰਸ, ਤਿੰਨ ਆਈਫੋਨ, ਪਤਨੀ ਦਾ ਸੋਨੇ ਦਾ ਸੈਟ, ਸੋਨੇ ਦੀ ਚੇਨ, ਪਰਸ ਅਤੇ ਹੋਰ ਸਾਮਾਨ ਲੁੱਟ ਕੇ ਫਰਾਰ ਹੋ ਗਏ । ਲੁਟੇਰਿਆਂ ਨੇ ਉਨ੍ਹਾਂ ਨੂੰ ਕਾਰ ਵਿੱਚੋਂ ਉਤਰਨ ਨੂੰ ਕਿਹਾ ਅਤੇਜਦੋਂ ਉਹ ਦੋਵੇਂ ਬਾਹਰ ਨਿਕਲੇ ਤਾਂ ਲੁਟੇਰੇ ਕਾਰ ਭਜਾ ਕੇ ਲੈ ਗਏ।