ਜਸ਼ਪੁਰ, 16 ਅਕਤਬੂਰ (ਪੋਸਟ ਬਿਊਰੋ)- ਛੱਤੀਸਗ਼ੜ੍ਹ ਦੇ ਜਸ਼ਪੁਰ ਜ਼ਿਲ੍ਹੇ ਵਿੱਚ ਲਖੀਮਪੁਰ ਖੀਰੀ ਵਰਗੀ ਘਟਨਾ ਦਾ ਇੱਕ ਵੀਡੀਓ ਸਾਹਮਣੇ ਆਇਆ ਹੈ। ਇਸ ਵਿੱਚ ਇੱਕ ਤੇਜ਼ ਰਫ਼ਤਾਰ ਕਾਰ ਦੁਰਗਾ ਮੂਰਤੀ ਨੂੰ ਜਲ ਪਰਵਾਹ ਕਰਨ ਜਾ ਰਹੇ ਜਲੂਸ ਵਿਚਲੇ ਲੋਕਾਂ ਨੂੰ ਕੁਚਲਦੀ ਨਿਕਲ ਜਾਂਦੀ ਹੈ। ਜਸ਼ਪੁਰ ਦੇ ਪੱਥਲਗਾਂਵ ਪਿੰਡਦੇਕਰੀਬ 150 ਲੋਕ ਜਲੂਸ ਦੀ ਸ਼ਕਲ ਵਿੱਚ ਦੁਰਗਾ ਮੂਰਤੀ ਨੂੰ ਜਲ ਪਰਵਾਹ ਕਰਨ ਜਾ ਰਹੇ ਸਨ। ਕਾਰ ਦੀ ਟੱਕਰ ਨਾਲ ਚਾਰ ਵਿਅਕਤੀ ਮੌਕੇ ਉੱਤੇ ਹੀ ਮਾਰੇ ਗਏ ਅਤੇ 26 ਹੋਰ ਜ਼ਖ਼ਮੀ ਹੋ ਗਏ ਹਨ।
ਮਿਲੀਆਂ ਖ਼ਬਰਾਂ ਮੁਤਾਬਕ ਭੀੜ ਨੂੰ ਕੁਚਲਣ ਵਾਲੀ ਕਾਰ ਵਿੱਚ ਗਾਂਜਾ ਭਰਿਆ ਹੋਇਆ ਸੀ ਅਤੇ ਸਮੱਗਲਰ ਇਸ ਨੂੰ ਓਡਿਸਾ ਤੋਂ ਮੱਧ ਪ੍ਰਦੇਸ਼ ਦੇ ਸੰਗਰੌਲੀ ਲਿਜਾ ਰਹੇ ਸਨ। ਘਟਨਾ ਪਿੱਛੋਂ ਲੋਕਾਂ ਨੂੰ ਕਾਰ ਨੂੰ ਅੱਗ ਲਾ ਕੇ ਸਾੜ ਦਿੱਤਾ। ਲੋਕਾਂ ਨੇ ਕਾਰ ਦੇ ਡਰਾਈਵਰ ਨੂੰ ਘਟਨਾ ਵਾਲੀ ਥਾਂ ਤੋਂ ਪੰਜ ਕਿਲੋਮੀਟਰ ਦੂਰ ਸੁਖਰਾਪਾਰਾ ਤੋਂ ਫੜਿਆ ਤੇ ਬੁਰੀ ਤਰ੍ਹਾਂ ਕੁੱਟਿਆ। ਪੁਲਸ ਨੇ ਭਾਰੀ ਮੁਸ਼ਕਲ ਨਾਲ ਡਰਾਈਵਰ ਨੂੰ ਭੀੜ ਤੋਂ ਛੁਡਵਾਇਆ। ਲੋਕਾਂ ਦਾ ਗੁੱਸਾ ਵੇਖਦੇ ਹੋਏ ਮੌਕੇ ਉੱਤੇ ਪੁਲਸ ਦੇ ਜਵਾਨ ਤਾਇਨਾਤ ਕੀਤੇ ਗਏ। ਪੁਲਸ ਨੇ ਇਸ ਘਟਨਾ ਦੇ ਦੋਸ਼ੀਆਂ ਨੂੰ ਗ਼੍ਰਿਫ਼ਤਾਰ ਕੀਤਾ ਹੈ। ਉਨ੍ਹਾਂ ਦੀ ਪਛਾਣ 21 ਸਾਲਾ ਬਬਲੂ ਅਤੇ 26 ਸਾਲ ਸ਼ਿਸ਼ੂਪਾਲ ਵਜੋਂ ਹੋਈ ਹੈ। ਲੋਕਾਂ ਨੇ ਇੱਕ ਏ ਐਸ ਆਈ ਉੱਤੇ ਗਾਂਜੇ ਦੀ ਸਮੱਗਲਿੰਗ ਕਰਵਾਉਣ ਦਾ ਦੋਸ਼ ਵੀ ਲਾਇਆ ਹੈ।ਉਨ੍ਹਾਂ ਦਾ ਕਹਿਣਾ ਹੈ ਕਿ ਏ ਐਸ ਆਈ ਨਾਲ ਮਿਲ ਕੇ ਸਮੱਗਲਰ ਗਾਂਜੇ ਦੀ ਸਮੱਗਲਿੰਗ ਕਰਨ ਦੇ ਯਤਨਾਂ ਵਿੱਚ ਸਨ। ਲੋਕਾਂ ਨੇ ਉਕਤ ਏ ਐਸ ਆਈ ਵਿਰੁੱਧ ਵੀ ਕਾਰਵਾਈ ਦੀ ਮੰਗ ਕੀਤੀ। ਲੋਕਾਂ ਨੇ ਪੁਲਸ ਵਿਰੁੱਧ ਵੀ ਨਾਅਰੇ ਲਾਏ। ਇਸ ਪਿੱਛੋਂ ਉਕਤ ਏ ਐਸ ਆਈ ਨੂੰ ਸਸਪੈਂਡ ਕਰ ਦਿੱਤਾ ਗਿਆ।