ਟੋਰਾਂਟੋ, 13 ਅਕਤੂਬਰ (ਪੋਸਟ ਬਿਊਰੋ) : ਏਅਰ ਕੈਨੇਡਾ ਵੱਲੋਂ ਇਹ ਐਲਾਨ ਕੀਤਾ ਗਿਆ ਹੈ ਕਿ ਟੋਰਾਂਟੋ ਤੋਂ ਰਵਾਨਾ ਹੋਣ ਵਾਲੀਆਂ ਫਲਾਈਟਸ ਲਈ ਪੈਸੈਂਜਰਜ਼ ਹੁਣ 90 ਮਿੰਟ ਪਹਿਲਾਂ ਚੈੱਕ ਇਨ ਕਰ ਸਕਣਗੇ।
13 ਅਕਤੂਬਰ ਤੋਂ ਅਮਰੀਕਾ ਜਾਂ ਹੋਰਨਾਂ ਇੰਟਰਨੈਸ਼ਨਲ ਡੈਸਟੀਨੇਸ਼ਨਜ਼ ਲਈ ਜਾਣ ਵਾਲੇ ਪੈਸੈਂਜਰਜ਼ ਦੇ ਚੈੱਕ ਇਨ ਕਰਨ ਤੇ ਬੈਗੇਜ ਜਮ੍ਹਾਂ ਕਰਵਾਉਣ ਲਈ ਡੈੱਡਲਾਈਨ ਨਿਰਧਾਰਤ ਫਲਾਈਟ ਦੇ ਉਡਾਣ ਭਰਨ ਤੋਂ ਪਹਿਲਾਂ 90 ਮਿੰਟ ਕਰ ਦਿੱਤੀ ਗਈ ਹੈ। ਏਅਰ ਕੈਨੇਡਾ ਦੀ ਤਰਜ਼ਮਾਨ ਨੇ ਮੰਗਲਵਾਰ ਨੂੰ ਦੱਸਿਆ ਕਿ ਅਜਿਹਾ ਇਹ ਯਕੀਨੀ ਬਣਾਉਣ ਲਈ ਕੀਤਾ ਗਿਆ ਹੈ ਤਾਂ ਕਿ ਫਲਾਈਟ ਫੜ੍ਹਨ ਲਈ ਕਸਟਮਰਜ਼ ਕੋਲ ਢੁਕਵਾਂ ਸਮਾਂ ਹੋਵੇ ਤੇ ਏਅਰਪੋਰਟ ਉੱਤੇ ਵੀ ਕਸਟਮਰਜ਼ ਦੇ ਫਲੋਅ ਵਿੱਚ ਸੁਧਾਰ ਕੀਤਾ ਜਾ ਸਕੇੇ।
ਏਅਰਲਾਈਨ ਨੇ ਇਹ ਵੀ ਆਖਿਆ ਕਿ 13 ਅਕਤੂਬਰ ਤੋਂ ਸ਼ੁਰੂ ਹੋ ਕੇ ਦੁਪਹਿਰੇ 12:00 ਵਜੇ ਤੋਂ ਅਮਰੀਕਾ ਲਈ ਰਵਾਨਾ ਹੋਣ ਵਾਲੀਆਂ ਫਲਾਈਟਸ ਲਈ ਨਵਾਂ ਕਿਊ ਸਿਸਟਮ (ਕਤਾਰ ਸਿਸਟਮ) ਵੀ ਸ਼ੁਰੂ ਕੀਤਾ ਜਾਵੇਗਾ। ਏਅਰ ਕੈਨੇਡਾ ਨੇ ਆਖਿਆ ਕਿ ਪੈਸੈਂਜਰਜ਼ ਨੂੰ ਚੈੱਕ ਇਨ ਕਰਨ ਤੋਂ ਬਾਅਦ ਸਾਈਨੇਜ ਚੈੱਕ ਕਰਨੇ ਹੋਣਗੇ ਤਾਂ ਕਿ ਉਨ੍ਹਾਂ ਨੂੰ ਇਹ ਪਤਾ ਲੱਗ ਸਕੇ ਕਿ ਉਨ੍ਹਾਂ ਨੂੰ ਆਪਣੀ ਫਲਾਈਟ ਲਈ ਕਿਹੜੀ ਸਕਿਊਰਿਟੀ ਤੇ ਕਸਟਮਰਜ਼ ਦੀ ਲਾਈਨ ਵਿੱਚ ਲੱਗਣਾ ਚਾਹੀਦਾ ਹੈ।
ਇਸ ਤਬਦੀਲੀ ਤੋਂ ਪਹਿਲਾਂ ਏਅਰ ਕੈਨੇਡਾ ਦੇ ਪੈਸੈਂਜਰਜ਼ ਨੂੰ ਅਮਰੀਕਾ ਜਾਂ ਇੰਟਰਨੈਸ਼ਨਲ ਡੈਸਟੀਨੇਸ਼ਨ ਲਈ ਜਹਾਜ਼ ਰਵਾਨਾ ਹੋਣ ਤੋਂ 60 ਮਿੰਟ ਪਹਿਲਾਂ ਹੀ ਚੈੱਕ ਇਨ ਕਰਨਾ ਹੁੰਦਾ ਸੀ ਤੇ ਆਪਣੇ ਬੈਗਜ਼ ਵੀ ਜਮ੍ਹਾਂ ਕਰਵਾਉਣੇ ਪੈਂਦੇ ਸਨ।ਅਮਰੀਕਾ ਜਾਣ ਵਾਲੀ ਫਲਾਈਟ ਫੜ੍ਹਨ ਵਾਸਤੇ ਪੈਸੈਂਜਰਜ਼ ਨੂੰ ਦੋ ਘੰਟੇ ਪਹਿਲਾਂ ਹੀ ਏਅਰਪੋਰਟ ਪਹੁੰਚਣ ਲਈ ਆਖਿਆ ਜਾਂਦਾ ਸੀ ਤੇ ਇੰਟਰਨੈਸ਼ਨਲ ਫਲਾਈਟ ਲਈ ਤਿੰਨ ਘੰਟੇ ਪਹਿਲਾਂ ਆਉਣ ਵਾਸਤੇ ਆਖਿਆ ਜਾਂਦਾ ਸੀ। ਕੈਨੇਡਾ ਦੀਆਂ ਘਰੇਲੂ ਉਡਾਨਾਂ ਲਈ ਨਿਯਮ ਪਹਿਲਾਂ ਵਾਲੇ ਹੀ ਰਹਿਣਗੇ।