ਫਲੋਰਿਡਾ, 12 ਅਕਤੂਬਰ (ਪੋਸਟ ਬਿਊਰੋ) : ਗੈਬੀ ਪਟੀਟੋ ਦੀ ਮੌਤ ਗਲਾ ਘੁੱਟਣ ਕਾਰਨ ਹੋਈ, ਇਸ ਦਾ ਖੁਲਾਸਾ ਮੰਗਲਵਾਰ ਨੂੰ ਕੌਰੋਨਰ ਵੱਲੋਂ ਕੀਤਾ ਗਿਆ। ਇਸ ਦੌਰਾਨ ਪਟੀਟੋ ਦੇ ਲਾਪਤਾ ਮੰਗੇਤਰ ਬ੍ਰਾਇਨ ਲਾਂਡਰੇ ਦੀ ਪੁਲਿਸ ਵੱਲੋਂ ਭਾਲ ਕੀਤੀ ਜਾ ਰਹੀ ਹੈ। ਪੁਲਿਸ ਇਸ ਕਤਲ ਲਈ ਉਸ ਨੂੰ ਹੀ ਜਿ਼ੰਮੇਵਾਰ ਮੰਨ ਰਹੀ ਹੈ।
ਕੌਰੋਨਰ ਡਾ· ਬ੍ਰੈੱਟ ਬਲੂ ਨੇ ਇੱਕ ਨਿਊਜ਼ ਕਾਨਫਰੰਸ ਵਿੱਚ ਆਖਿਆ ਕਿ ਉੱਤਰੀ ਵਿਓਮਿੰਗ, ਟੈਟਨ ਕਾਊਂਟੀ ਵਿੱਚ ਸਥਿਤ ਗ੍ਰੈਂਡ ਟੈਟਨ ਨੈਸ਼ਨਲ ਪਾਰਕ ਦੀ ਸਰਹੱਦ ਦੇ ਨਾਲ ਲੱਗਦੇ ਏਰੀਆ ਵਿੱਚ ਅਵਿਕਸਤ ਕੈਂਪਿੰਗ ਏਰੀਆ ਦੇ ਨੇੜੇ 19 ਸਤੰਬਰ ਨੂੰ 22 ਸਾਲਾ ਪਟੀਟੋ ਦੀ ਲਾਸ਼ ਮਿਲਣ ਤੋਂ ਤਿੰਨ ਤੋਂ ਚਾਰ ਹਫਤੇ ਪਹਿਲਾਂ ਉਸ ਦੀ ਮੌਤ ਹੋ ਚੁੱਕੀ ਸੀ।ਇਹ ਸਪਸ਼ਟ ਨਹੀਂ ਹੋ ਸਕਿਆ ਕਿ ਮੌਤ ਦੇ ਕਾਰਨਾਂ ਦੀ ਪੁਸ਼ਟੀ ਕੀਤੇ ਜਾਣ ਤੋਂ ਬਾਅਦ ਲਾਂਡਰੇ ਉੱਤੇ ਹੋਰ ਚਾਰਜਿਜ਼ ਲਾਏ ਜਾਣਗੇ ਜਾਂ ਨਹੀਂ।
ਜਿ਼ਕਰਯੋਗ ਹੈ ਕਿ ਲਾਂਡਰੇ ਨਾਲ ਕਰਾਸ ਕੰਟਰੀ ਰੋਡ ਟਰਿੱਪ ਉੱਤੇ ਗਈ ਪਟੀਟੋ ਅਚਾਨਕ ਲਾਪਤਾ ਹੋ ਗਈ ਸੀ। ਦੂਜੇ ਪਾਸੇ ਫਲੋਰਿਡਾ ਦੀ ਪੁਲਿਸ ਲਾਂਡਰੇ ਦੀ ਭਾਲ ਕਰ ਰਹੀ ਹੈ। ਕਈ ਦਿਨਾਂ ਤੱਕ ਪਟੀਟੋ ਦੇ ਮਾਪਿਆਂ ਵੱਲੋਂ ਉਸ ਨੂੰ ਕੀਤੇ ਗਏ ਟੈਕਸਟ ਮੈਸੇਜਿਜ਼ ਤੇ ਕਾਲਜ਼ ਦਾ ਕੋਈ ਜਵਾਬ ਨਾ ਮਿਲਣ ਤੋਂ ਬਾਅਦ 11 ਸਤੰਬਰ ਨੂੰ ਉਸ ਦੇ ਲਾਪਤਾ ਹੋਣ ਦੀ ਰਿਪੋਰਟ ਲਿਖਵਾਈ ਗਈ।
ਦੂਜੇ ਪਾਸੇ ਜਾਂਚਕਾਰਾਂ ਵੱਲੋਂ ਲਾਂਡਰੇ ਦੀ ਭਾਲ ਵਿੱਚ 24,000 ਏਕੜ ਦਾ ਫਲੋਰਿਡਾ ਨੇਚਰ ਪ੍ਰਿਜ਼ਰਵ ਇਲਾਕਾ ਬਿਨਾ ਕਿਸੇ ਸਫਲਤਾ ਦੇ ਗਾਹਿਆ ਜਾ ਚੁੱਕਿਆ ਹੈ। ਉਨ੍ਹਾਂ ਵੱਲੋਂ ਇਸ ਏਰੀਆ ਉੱਤੇ ਆਪਣਾ ਧਿਆਨ ਕੇਂਦਰਿਤ ਇਸ ਲਈ ਕੀਤਾ ਗਿਆ ਕਿਉਂਕਿ ਲਾਂਡਰੇ ਦੇ ਮਾਪਿਆਂ ਵੱਲੋਂ ਇਹ ਆਖਿਆ ਗਿਆ ਸੀ ਕਿ ਉਹ ਉੱਧਰ ਗਿਆ ਹੋ ਸਕਦਾ ਹੈ।ਅਧਿਕਾਰੀਆਂ ਵੱਲੋਂ ਲਾਂਡਰੇ ਦੀ ਭਾਲ ਲਈ ਹੈਲੀਕਾਪਟਰਜ਼, ਡਰੋਨਜ਼, ਸੂਹੀਆ ਕੁੱਤਿਆਂ ਦੀ ਮਦਦ ਲਈ ਜਾ ਰਹੀ ਹੈ। ਇਸ ਸਰਚ ਏਰੀਆ ਦਾ 75 ਫੀ ਸਦੀ ਹਿੱਸਾ ਪਾਣੀ ਦੇ ਹੇਠਾਂ ਹੈ। ਪਰ ਅਜੇ ਤੱਕ ਪੁਲਿਸ ਨੂੰ ਕੋਈ ਸਫਲਤਾ ਹਾਸਲ ਨਹੀਂ ਹੋਈ ਹੈ।