ਕਰਾਚੀ, 12 ਅਕਤੂਬਰ (ਪੋਸਟ ਬਿਊਰੋ)- ਦੇਸ਼ ਦੇ ਗੜਬੜ ਵਾਲੇ ਬਲੋਚਿਸਤਾਨ ਸੂਬੇ ਵਿੱਚ ਪਾਬੰਦੀਸ਼ੁਦਾ ਬਲੋਚਿਸਤਾਨ ਲਿਬਰੇਸ਼ਨ ਆਰਮੀ ਦੇ ਹਮਲੇ ਵਿੱਚ ਇੱਕ 35 ਸਾਲਾ ਪਾਕਿਸਤਾਨੀ ਪੱਤਰਕਾਰ ਦੀ ਮੌਤ ਹੋ ਗਈ ਹੈ।
ਮੀਡੀਆ ਰਿਪੋਰਟ ਮੁਤਾਬਕ ਈਦਗਾਹ ਥਾਣੇ ਦੇ ਇੰਚਾਰਜ ਨਦੀਮ ਹੈਦਰ ਨੇ ਕਿਹਾ ਕਿ ‘ਮੈਟਰੋ ਇੱਕ ਨਿਊਜ਼’ ਦਾ ਪੱਤਰਕਾਰ ਸ਼ਾਹਿਗ ਜ਼ੇਹਰੀ ਸੂਬੇ ਦੇ ਹੱਬ ਸ਼ਹਿਰ ਵਿੱਚ ਕਾਰ ਵਿੱਚ ਜਾ ਰਿਹਾ ਸੀ, ਜਦੋਂ ਉਸ ਉੱਤੇ ਦੇਸੀ ਗ੍ਰਨੇਡ ਨਾਲ ਹਮਲਾ ਕੀਤਾ ਗਿਆ। ਟੀ ਵੀ ਪੱਤਰਕਾਰ ਜ਼ੇਹਰੀ ਇਸ ਹਮਲੇੇ ਵਿੱਚ ਗੰਭੀਰਜ਼ਖ਼ਮੀ ਹੋ ਗਿਆ ਸੀ ਤੇ ਉਸਨੂੰ ਇੱਕ ਹੋਰ ਜ਼ਖ਼ਮੀ ਵਿਅਕਤੀ ਸਮੇਤ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਜ਼ੇਹਰੀ ਨੂੰ ਮ੍ਰਿਤਕ ਐਲਾਨ ਦਿੱਤਾ।ਖ਼ਬਰ ਵਿੱਚ ਕਿਹਾ ਗਿਆ ਕਿ ‘ਡਾਨ ਡਾਟ ਕਾਮ' ਵੱਲੋਂ ਵੇਖੀ ਗਈ ਘਟਨਾ ਦੀ ਸੀ ਸੀ ਟੀ ਵੀ ਫ਼ੁਟੇਜ ਵਿੱਚ ਇੱਕ ਰੁਝੇਵੇਂ ਭਰੀ ਸੜਕ ਉਤੇ ‘ਯੂ-ਟਰਨ' ਲੈਂਦਿਆਂ ਹੀ ਜ਼ੇਹਰੀ ਦੀ ਕਾਰ ਕੋਲ ਸੜਕ ਕਿਨਾਰੇ ਧਮਾਕਾ ਹੁੰਦਾ ਦਿੱਸਿਆ। ਅਜੇ ਇਹ ਪਤਾ ਨਹੀਂ ਲੱਗਾ ਕਿ ਬੰਬ ਕਿਹੜਾ ਸੀ। ਬਲੋਚਿਸਤਾਨ ਲਿਬਰੇਸ਼ਨ ਆਰਮੀ ਨੇ ਪਿੱਛੋਂ ਬਿਆਨ ਵਿੱਚ ਇਸ ਹਮਲੇ ਦੀ ਜ਼ਿੰਮੇਵਾਰੀ ਲਈ। ‘ਡਾਨ ਨਿਊਜ਼’ਦੇ ਅਨੁਸਾਰ ਫ਼ਰਵਰੀ ਵਿੱਚ ‘ਕੌਂਸਲ ਆਫ਼ ਪਾਕਿਸਤਾਨ ਨਿਊਜ਼ਪੇਪਰ ਐਡੀਟਰਜ਼’ (ਸੀ ਪੀ ਐਨ ਈ) ਦੀ ‘ਮੀਡੀਆ ਫ਼ਰੀਡਮ ਰਿਪੋਰਟ’ 2020 ਨੇ ਪ੍ਰਗਟਾਵਾ ਕੀਤਾ ਸੀ ਕਿ ਇਸ ਦੌਰਾਨ ਘੱਟੋ-ਘੱਟ 10 ਪੱਤਰਕਾਰਾਂ ਦਾ ਕਤਲ ਕਰ ਦਿੱਤਾ ਗਿਆ ਸੀ ਅਤੇ 2020 ਵਿੱਚ ਹੀ ਪਾਕਿਸਤਾਨ ਵਿੱਚ ਕਈਆਂ ਨੂੰ ਧਮਕੀਆਂ, ਅਗਵਾ ਤੇ ਤਸੀਹੇ ਦਿੱਤੇ ਗਏ ਸਨ ਅਤੇ ਆਪਣੀਆਂ ਪੇਸ਼ੇਵਰ ਜ਼ਿੰਮੇਵਾਰੀਆਂ ਨਿਭਾਉਣ ਲਈ ਗ਼੍ਰਿਫ਼ਤਾਰ ਕੀਤਾ ਗਿਆ ਸੀ। ਪੱਤਰਕਾਰਾਂ ਉੱਤੇ ਤਸ਼ੱਦਦ ਕਰਨ ਅਤੇ ਮਾਰਨ ਦੇ ਜ਼ਿੰਮੇਵਾਰ ਲੋਕਾਂ ਵਿਰੁੱਧ ਅਜੇ ਤਕ ਕੋਈ ਕਾਰਵਾਈ ਨਹੀਂ ਕੀਤੀ ਗਈ।