ਇਸਲਾਮਾਬਾਦ, 11 ਅਕਤੂਬਰ, (ਪੋਸਟ ਬਿਊਰੋ)- ਅਫਗਾਨਿਸਤਾਨ ਉੱਤੇ ਤਾਲਿਬਾਨ ਦਾ ਕਬਜ਼ਾ ਹੋਣ ਨਾਲ ਖੁਸ਼ ਹੋਏ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਨੇ ਪਾਕਿਸਤਾਨ ਵਿੱਚ ਤਾਲਿਬਾਨ ਵਰਗੀ ਅਥਾਰਿਟੀ ਦਾ ਐਲਾਨ ਕੀਤਾ ਹੈ।
ਅੱਜ ਐਤਵਾਰ ਨੂੰ ਇਮਰਾਨ ਖਾਨ ਨੇ ਦੁਨੀਆ ਵਿਚ ਇਸਲਾਮ ਦੀ ਸਹੀ ਤਸਵੀਰ ਪੇਸ਼ ਕਰਨ ਦਾ ਵਿਚਾਰ ਰੱਖਦੇ ਹੋਏ ‘ਰਹਿਮਤੁਲ ਲੀਲ ਆਲਮੀਨ ਅਥਾਰਿਟੀ’ ਬਣਾਉਣ ਦਾ ਐਲਾਨ ਕੀਤਾ। ਇਸ ਤੋਂ ਪਹਿਲਾਂ ਉਨ੍ਹਾਂ ਸੰਕੇਤ ਦਿੱਤਾ ਸੀ ਕਿ ਉਹ ਪਾਕਿਸਤਾਨ ਨੂੰ ਇਸਲਾਮੀ ਰਾਹ ਉੱਤੇ ਲਿਜਾਣਾ ਚਾਹੁੰਦੇ ਹਨ।ਨਵੀਂ ਅਥਾਰਿਟੀ ਦਾ ਕੰਮ ਪਾਕਿਸਤਾਨ ਦੀ ਸਿੱਖਿਆ ਵਿਵਸਥਾ ਨੂੰ ਸ਼ਰੀਆ ਮੁਤਾਬਕ ਬਦਲਣਾ ਹੈ।ਸਮਝਿਆ ਜਾਂਦਾ ਹੈ ਕਿ ਇਮਰਾਨ ਨੇ ਇਕ ਤਰ੍ਹਾਂ ਦੇਸ਼ ਵਿਚ ‘ਤਾਲਿਬਾਨੀ ਢੰਗ ਦੇ ਰਾਜ ਦੀ ਨੀਂਹ’ ਰੱਖ ਦਿੱਤੀ ਹੈ।ਕੱਟੜਪੰਥੀ ਸੰਗਠਨ ਤਾਲਿਬਾਨ ਦੀ ਸ਼ੁਰੂਆਤ ਵਿਦਿਆਰਥੀ ਸੰਗਠਨ ਵਜੋਂ ਹੋਈ ਸੀ। ਇਹ ਵੀ ਖੁਦ ਨੂੰ ਇਸਲਾਮ ਤੇ ਸ਼ਰੀਆ ਦਾ ਪੈਰੋਕਾਰ ਦੱਸਦੇ ਹਨ। ਇਮਰਾਨ ਨੇ ਕਈ ਥਾਂਈਂ ਅਹਿੰਸਾ ਦਾ ਸਮਰਥਨ ਕੀਤਾ ਹੈ, ਪਰ ਸ਼ਰੀਆ ਕਾਨੂੰਨ ਦੇ ਨਾਮ ਉੱਤੇ ਬੇਰਹਿਮੀ ਕਰਦੇ ਤਾਲਿਬਾਨ ਦੀ ਤਾਰੀਫ ਵੀ ਉਸ ਨੇ ਕਈ ਵਾਰ ਕੀਤੀ ਹੈ, ਜਿਸ ਤੋਂ ਖਿਆਲ ਪੇਸ਼ ਹੁੰਦਾ ਰਿਹਾ ਹੈ ਕਿ ਉਹ ਪਾਕਿਸਤਾਨ ਨੂੰ ਤਾਲਿਬਾਨ ਦੇ ਰਾਹ ਉੱਤੇ ਲਿਜਾਣਾ ਚਾਹੁੰਦੇ ਹਨ।
ਅੱਜ ਇਮਰਾਨ ਖਾਨ ਨੇ ਇਸਲਾਮਾਬਾਦ ਵਿਚ ‘ਅਸ਼ਰਾ-ਏ-ਰਹਿਮਤ-ਉਲ-ਲਿਲ-ਅਲਾਮੀਨ’ ਨਾਂਅ ਦੇ ਸੰਮੇਲਨ ਵਿੱਚ ਬੋਲਦਿਆਂ ਕਿਹਾ ਕਿ ਨਵੀਂ ਬਣਾਈ ਜਾ ਰਹੀ ‘ਰਹਿਮਤੁਲ ਲੀਲ ਆਲਮੀਨ ਅਥਾਰਿਟੀ’ ਵਿੱਚ ਵਿਦਵਾਨਾਂ ਨੂੰ ਸ਼ਾਮਲ ਕਰ ਕੇਉਨ੍ਹਾਂ ਨੂੰ ਇਸ ਖੋਜ ਦਾ ਕੰਮ ਦਿੱਤਾ ਜਾਵੇਗਾ ਕਿ ਲੋਕਾਂ ਵਿਚ ਪੈਗੰਬਰ ਦੀਆਂ ਸਿੱਖਿਆਵਾਂ ਨੂੰ ਕਿਵੇਂ ਫੈਲਾਉਣਾ ਹੈ ਤੇ ਦੁਨੀਆ ਨੂੰ ਇਹ ਦੱਸਣਾ ਹੋਵੇਗਾ ਕਿ ਅਸਲ ਵਿਚ ਇਸਲਾਮ ਕੀ ਹੈ।ਇਮਰਾਨ ਨੇ ਕਿਹਾ ਕਿ ਇਹ ਅਥਾਰਿਟੀ ਸਕੂਲਾਂ ਦੇ ਸਿਲੇਬਸ ਦੀ ਨਿਗਰਾਨੀ ਕਰੇਗੀ। ਇਸ ਅਥਾਰਿਟੀ ਨਾਲ ਜੁੜਨ ਵਾਲੇ ਵਿਦਵਾਨਇਹ ਦੱਸਣਗੇ ਕੀ ਕੁਝ ਬਦਲਣ ਦੀ ਲੋੜ ਹੈ ਅਤੇ ਇਸ ਅਥਾਰਿਟੀ ਰਾਹੀਂ ਦੂਸਰੇ ਧਰਮਾਂ ਦੇ ਫਰਕ ਬਾਰੇ ਵੀ ਪੜ੍ਹਾਇਆ ਜਾਵੇਗਾ।
ਇਮਰਾਨ ਖਾਨ ਨੇ ਕਿਹਾ ਕਿ ਅਥਾਰਿਟੀ ਨੂੰ ਆਪਣੀ ਸੱਭਿਆਚਾਰ ਦੇ ਮੁਤਾਬਕ ਕਾਰਟੂਨ ਬਣਾਉਣ ਦਾ ਕੰਮ ਵੀ ਦਿੱਤਾ ਜਾਵੇਗਾ।ਉਨ੍ਹਾਂ ਨੇ ਕਿਹਾ ਕਿ ਕਾਰਟੂਨ ਸਾਡੇ ਬੱਚਿਆਂ ਨੂੰ ਵਿਦੇਸ਼ੀ ਸੱਭਿਆਚਾਰ ਦਿਖਾ ਰਹੇ ਹਨ ਤੇ ਅਸੀਂ ਉਨ੍ਹਾਂ ਨੂੰ ਰੋਕ ਨਹੀਂ ਸਕਦੇ, ਪਰ ਉਨ੍ਹਾਂ ਨੂੰ ਬਦਲ ਦੇ ਸਕਦੇ ਹਾਂ। ਇਸ ਮੌਕੇ ਇਮਰਾਨ ਨੇ ਕਿਹਾ ਕਿ ਅਥਾਰਿਟੀ ਪਾਕਿਸਤਾਨ ਸਮਾਜ ਉੱਤੇ ਪੱਛਮੀ ਸੱਭਿਅਤਾ ਦੇ ਲਾਭ-ਹਾਣ ਦਾ ਵੀ ਮੁਲੰਕਣ ਕਰੇਗੀ।