ਸੈਂਟੀ, ਕੈਲੇਫੋਰਨੀਆ, 11 ਅਕਤੂਬਰ (ਪੋਸਟ ਬਿਊਰੋ) : ਸੋਮਵਾਰ ਨੂੰ ਸੰਘਣੀ ਆਬਾਦੀ ਵਾਲੇ ਸੈਨ ਡਿਏਗੋ ਸਬਅਰਬ ਵਿੱਚ ਇੱਕ ਨਿੱਕਾ ਜਹਾਜ਼ ਹਾਦਸਾਗ੍ਰਸਤ ਹੋ ਗਿਆ। ਇਸ ਹਾਦਸੇ ਵਿੱਚ ਦੋ ਲੋਕ ਮਾਰੇ ਗਏ ਤੇ ਦੋ ਹੋਰ ਜ਼ਖ਼ਮੀ ਹੋ ਗਏ। ਮਰਨ ਵਾਲਿਆਂ ਵਿੱਚੋਂ ਇੱਕ ਯੂਪੀਐਸ ਡਰਾਈਵਰ ਵੀ ਸੀ।ਜਹਾਜ਼ ਘਰਾਂ ਉੱਤੇ ਡਿੱਗਿਆ ਜਿਸ ਕਾਰਨ ਉੱਥੇ ਵੀ ਕਾਫੀ ਨੁਕਸਾਨ ਪਹੁੰਚਿਆ।
ਚਸ਼ਮਦੀਦਾਂ ਅਨੁਸਾਰ ਸੈਂਟੀ ਵਿੱਚ ਤਬਾਹ ਹੋਏ ਦੋ ਘਰਾਂ ਵਿੱਚੋਂ ਇੱਕ ਵਿੱਚ ਰਹਿਣ ਵਾਲੇ ਬਜ਼ੁਰਗ ਜੋੜੇ ਨੂੰ ਵੀ ਬਚਾਅ ਲਿਆ ਗਿਆ। ਇਸ ਹਾਦਸੇ ਕਾਰਨ ਦਸ ਘਰ ਹੋਰ ਬਰਬਾਦ ਹੋ ਗਏ।ਡਲਿਵਰੀ ਟਰੱਕ ਦੇ ਨਾਲ ਕਈ ਹੋਰ ਗੱਡੀਆਂ ਨੂੰ ਵੀ ਨੁਕਸਾਨ ਪਹੁੰਚਿਆ। ਅਧਿਕਾਰੀਆਂ ਵੱਲੋਂ ਇਸ ਹਾਦਸੇ ਦਰਾਨ ਨੁਕਸਾਨੇ ਗਏ ਡਲਿਵਰੀ ਟਰੱਕ ਕੰਪਨੀ ਦੀ ਪਛਾਣ ਨਹੀਂ ਕੀਤੀ ਗਈ ਤੇ ਨਾ ਹੀ ਦੱਸਿਆ ਕਿ ਇਸ ਟਰੱਕ ਦੇ ਅੰਦਰ ਕੋਈ ਮੌਜੂਦ ਸੀ। ਪਰ ਯੂਨਾਈਟਿਡ ਪਾਰਸਲ ਸਰਵਿਸ ਆਫ ਅਮੈਰਿਕਾ ਇਨਕਾਰਪੋਰੇਸ਼ਨ ਵੱਲੋਂ ਇਸ ਗੱਲ ਦੀ ਪੁਸ਼ਟੀ ਕੀਤੀ ਗਈ ਹੈ ਕਿ ਇਸ ਹਾਦਸੇ ਦੌਰਾਨ ਉਨ੍ਹਾਂ ਦਾ ਇੱਕ ਵਰਕਰ ਮਾਰਿਆ ਗਿਆ।
ਫੈਡਰਲ ਏਵੀਏਸ਼ਨ ਐਡਮਨਿਸਟ੍ਰੇਸ਼ਨ ਅਨੁਸਾਰ ਇਹ ਜਹਾਜ਼ ਦੂਹਰੇ ਇੰਜਣ ਵਾਲਾ ਸੈਸਨਾ ਸੀ 340 ਸੀ।ਇਹ ਵੀ ਦੱਸਿਆ ਗਿਆ ਹੈ ਕਿ ਇਹ ਪ੍ਰਾਈਵੇਟ ਜਹਾਜ਼ ਸੀ ਜੋ ਯੂਮਾ, ਐਰੀਜ਼ੋਨਾ ਤੋਂ ਸੈਨ ਡਿਏਗੋ ਵਿੱਚ ਮੌਂਟਗੁਮੀਰ-ਗਿੱਬਜ਼ ਐਗਜ਼ੈਕਟਿਵ ਏਅਰਪੋਰਟ ਜਾ ਰਿਹਾ ਸੀ। ਇਹ ਪਤਾ ਨਹੀਂ ਲੱਗ ਸਕਿਆ ਕਿ ਜਹਾਜ਼ ਉੱਤੇ ਕਿੰਨੇ ਲੋਕ ਸਵਾਰ ਸਨ। ਪਰ ਅਧਿਕਾਰੀਆਂ ਅਨੁਸਾਰ ਕਿਸੇ ਦੇ ਬਚਣ ਦੀ ਸੰਭਾਵਨਾ ਨਹੀਂ ਹੈ।ਇਸ ਹਾਦਸੇ ਦੀ ਜਾਂਚ ਐਫਏਏ ਤੇ ਨੈਸ਼ਨਲ ਟਰਾਂਸਪੋਰਟੇਸ਼ਨ ਸੇਫਟੀ ਬੋਰਡ ਵੱਲੋਂ ਕੀਤੀ ਜਾਵੇਗੀ।