ਓਸਲੋ, 9 ਅਕਤੂਬਰ (ਪੋਸਟ ਬਿਊਰੋ)- ਇਸ ਸਾਲ ਦਾ ਨੋਬੇਲ ਸ਼ਾਂਤੀ ਪੁਰਸਕਾਰ ਫ਼ਿਲਪੀਨਜ਼ ਦੀ ਪੱਤਰਕਾਰ ਮਾਰੀਆ ਰੈਸਾ ਅਤੇ ਰੂਸ ਦੇ ਪੱਤਰਕਾਰ ਦਮਿੱਤਰੀ ਮੁਰਾਤੋਵ ਨੂੰ ਦਿੱਤਾ ਗਿਆ ਹੈ। ਨੌਰਵੇਜੀਅਨ ਨੋਬੇਲ ਕਮੇਟੀ ਨੇ ਇਸ ਮਾਣਮੱਤੇ ਪੁਰਸਕਾਰ ਲਈ ਦੋਵਾਂ ਪੱਤਰਕਾਰਾਂ ਵੱਲੋਂ ਪ੍ਰਗਟਾਵੇ ਦੀ ਆਜ਼ਾਦੀ ਦੀ ਲੜਾਈ ਵਿੱਚ ਪਾਏ ਯੋਗਦਾਨ ਦਾ ਹਵਾਲਾ ਦਿੱਤਾ ਹੈ। ਕਮੇਟੀ ਨੇ ਜ਼ੋਰ ਦੇ ਆਖਿਆ ਕਿ ਅਮਨ ਦੇ ਪ੍ਰਚਾਰ ਪਾਸਾਰ ਵਿੱਚ ਇਸਦਾ ਅਹਿਮ ਯੋਗਦਾਨ ਹੈ।
ਨੋਬੇਲ ਕਮੇਟੀ ਦੀ ਚੇਅਰਪਰਸਨ ਬੈਰਿਟ ਰੀਸ-ਐਂਡਰਸਨ ਨੇ ਕਿਹਾ, ‘ਨਿਰਪੱਖ, ਆਜ਼ਾਦ ਅਤੇ ਤੱਥ ਆਧਾਰਿਤ ਪੱਤਰਕਾਰੀ ਨੇ ਸੱਤਾ ਦੀ ਦੁਰਵਰਤੋਂ, ਝੂਠ ਅਤੇ ਪ੍ਰਾਪੇਗੰਡਾ ਦੀ ਜੰਗ ਤੋਂ ਸੁਰੱਖਿਆ ਕੀਤੀ ਹੈ।’ ਉਨ੍ਹਾਂ ਕਿਹਾ, ‘ਪ੍ਰਗਟਾਵੇ ਦੀ ਆਜ਼ਾਦੀ ਤੇ ਪ੍ਰੈਸ ਦੀ ਆਜ਼ਾਦੀ ਤੋਂ ਬਿਨਾਂ ਦੋ ਮੁਲਕਾਂ ਵਿੱਚ ਭਾਈਚਾਰਕ ਪ੍ਰਚਾਰ-ਪਾਸਾਰ ਤੇ ਨਿਸ਼ਸਤਰੀਕਰਨ ਕਰਨਾ ਮੁਸ਼ਕਲ ਹੋਵੇਗਾ।’ ਫਿਲਪੀਨਜ਼ ਦੀ ਪੱਤਰਕਾਰ ਰੈਸਾ ਸਾਲ 2012 ਵਿੱਚ ਸ਼ੁਰੂ ਕੀਤੀ ਰੈਪਲਰ ਨਾਂ ਦੀ ਨਿਊਜ਼ ਵੈਬਸਾਈਟ ਦੀ ਇੱਕ ਮੋਢੀ ਹੈ। ਨੋਬੇਲ ਕਮੇਟੀ ਨੇ ਕਿਹਾ ਕਿ ਰੈਸਾ ਅਤੇ ਰੈਪਲਰ ਨੇ ਰਾਸ਼ਰਪਤੀ ਰੌਡਰਿਗੋ ਡਿਊਟਰਟ ਦੇ ਰਾਜ ਦੌਰਾਨ ਹੋਈ ਵਿਵਾਦਿਤ ਅਤੇ ਖੂਨੀ ਨਸ਼ਾ ਵਿਰੋਧੀ ਮੁਹਿੰਮ ਵੱਲ ਧਿਆਨ ਦਿਵਾਇਆ। ਇਨ੍ਹਾਂ ਦੋਵਾਂ ਨੇ ਫ਼ਰਜ਼ੀ ਖ਼ਬਰਾਂ ਦੇ ਫੈਲਾਅ, ਵਿਰੋਧੀਆਂ ਨੂੰ ਤੰਗ ਕਰਨ ਤੇ ਜਨਤਕ ਚਰਚਾ ਨੂੰ ਆਪਣੇ ਮੁਤਾਬਕ ਢਾਲਣ ਲਈ ਸੋਸ਼ਲ ਮੀਡੀਆ ਦੀ ਦੁਰਵਰਤੋਂ ਹੋਣ ਨੂੰ ਦਸਤਾਵੇਜ਼ੀ ਦਾ ਰੂਪ ਦਿੱਤਾ। ਮੁਰਾਤੋਵ 1993 ਵਿੱਚ ਰੂਸ ਦੇ ਅਖ਼ਬਾਰ ‘ਨੋਵਾਇਆ ਗਜ਼ਟ' ਦੇ ਬਾਨੀਆਂ ਵਿੱਚੋਂ ਇੱਕ ਹੈ। ਇਹ ਅਖਬਾਰ ਅੱਜ ਮੁਲਕ ਦੇ ਸਭ ਤੋਂ ਨਿਰਪੱਖ ਅਖ਼ਬਰਾਂ ਵਿੱਚੋਂ ਇੱਕ ਹੈ।