ਓਨਟਾਰੀਓ, 8 ਅਕਤੂਬਰ (ਪੋਸਟ ਬਿਊਰੋ) : ਓਨਟਾਰੀਓ ਭਰ ਦੇ ਨਰਸਿੰਗ ਹੋਮਜ਼ ਨੂੰ ਮਾਰਚ ਤੱਕ 4000 ਵਧੇਰੇ ਨਰਸਾਂ ਤੇ ਪਰਸਨਲ ਸਪੋਰਟ ਵਰਕਰਜ਼ ਹਾਇਰ ਕਰਨ ਲਈ 270 ਮਿਲੀਅਨ ਡਾਲਰ ਵਾਧੂ ਹਾਸਲ ਹੋਣਗੇ।
ਇਸ ਵਿੱਤੀ ਸਾਲ ਲਈ ਤੇ ਆਉਣ ਵਾਲੇ ਸਾਲਾਂ ਲਈ 4·9 ਬਿਲੀਅਨ ਵਾਧੂ ਸਾਲਾਨਾ ਫੰਡਿੰਗ ਦਾ ਐਲਾਨ ਫੋਰਡ ਸਰਕਾਰ ਵੱਲੋਂ ਕੀਤਾ ਗਿਆ। ਪਰ ਇੰਡਸਟਰੀ ਨੇ ਚੇਤਾਵਨੀ ਦਿੰਦਿਆਂ ਆਖਿਆ ਕਿ ਕੋਵਿਡ-19 ਮਹਾਂਮਾਰੀ ਦੇ 19 ਮਹੀਨਿਆਂ ਤੋਂ ਬਾਅਦ ਹੈਲਥ ਕੇਅਰ ਵਰਕਰਜ਼ ਦੀ ਕਮੀ ਦਰਮਿਆਨ ਐਨੇ ਮੁਲਾਜ਼ਮ ਭਰਤੀ ਕਰਨਾ ਸੁਖਾਲਾ ਨਹੀਂ ਹੋਵੇਗਾ।ਪ੍ਰੋਵਿੰਸ ਦੇ 626 ਨਰਸਿੰਗ ਹੋਮਜ਼ ਵਿੱਚੋਂ 70 ਫੀ ਸਦੀ ਦੀ ਅਗਵਾਈ ਕਰਨ ਵਾਲੇ ਓਨਟਾਰੀਓ ਲਾਂਗ ਟਰਮ ਕੇਅਰ ਐਸੋਸਿਏਸ਼ਨ ਦੀ ਚੀਫ ਐਗਜੈ਼ਕਟਿਵ ਡੌਨਾ ਡੰਕਨ ਨੇ ਆਖਿਆ ਕਿ ਅਸੀਂ ਵੱਡੀ ਗਿਣਤੀ ਸਟਾਫ ਗੁਆ ਚੁੱਕੇ ਹਾਂ ਤੇ ਇਹ ਮਾਮਲਾ ਸਿਰਫ ਲਾਂਗ ਟਰਮ ਕੇਅਰ ਦਾ ਹੀ ਨਹੀਂ ਹੈ, ਇਹੋ ਸਿਲਸਿਲਾ ਹਸਪਤਾਲਾਂ ਵਿੱਚ ਵੀ ਹੈ।
ਉਨ੍ਹਾਂ ਆਖਿਆ ਕਿ ਜੇ ਲੋਕ ਇਨ੍ਹਾਂ ਲਾਂਗ ਟਰਮ ਕੇਅਰ ਹੋਮਜ਼ ਵਿੱਚ ਕੰਮ ਕਰਨਾ ਹੀ ਨਹੀਂ ਚਾਹੁਣਗੇ ਤਾਂ ਐਨੀ ਰਕਮ ਦਾ ਕੀ ਫਾਇਦਾ। ਇੱਥੇ ਦੱਸਣਾ ਬਣਦਾ ਹੈ ਕਿ ਕੋਵਿਡ-19 ਕਾਰਨ 4000 ਨਰਸਿੰਗ ਹੋਮ ਰੈਜ਼ੀਡੈਂਟਸ ਮਰ ਚੁੱਕੇ ਹਨ, 7300 ਤੋਂ ਵੀ ਵੱਧ ਵਰਕਰਜ਼ ਇਸ ਕਾਰਨ ਇਨਫੈਕਟ ਹੋ ਚੁੱਕੇ ਹਨ ਤੇ 13 ਦੀ ਮੌਤ ਵੀ ਹੋ ਚੁੱਕੀ ਹੈ। ਇਹ ਸੱਭ ਉਦੋਂ ਹੋਇਆ ਜਦੋਂ ਵੈਕਸੀਨ ਵੱਡੀ ਪੱਧਰ ਉੱਤੇ ਮੁਹੱਈਆ ਨਹੀਂ ਸੀ ਕਰਵਾਈ ਗਈ।ਲਾਂਗ ਟਰਮ ਕੇਅਰ ਮੰਤਰੀ ਰੌਡ ਫਿਲਿਪਸ ਨੇ ਆਖਿਆ ਕਿ ਇਸ ਵਿੱਚ ਕੋਈ ਸ਼ੱਕ ਨਹੀਂ ਕਿ ਸਾਨੂੰ ਹੋਰ ਨਰਸਾਂ ਦੀ ਲੋੜ ਹੈ ਸਾਨੂੰ ਵਧੇਰੇ ਪੀਐਸਡਬਲਿਊਜ਼ ਦੀ ਵੀ ਲੋੜ ਹੈ।