ਮਿਸੀਸਾਗਾ, 8 ਅਕਤੂਬਰ (ਪੋਸਟ ਬਿਊਰੋ) : ਪੀਲ ਰੀਜਨਲ ਪੁਲਿਸ ਇੱਕ ਮਸ਼ਕੂਕ ਦੀ ਭਾਲ ਕਰ ਰਹੀ ਹੈ ਜਿਸ ਨੇ ਅਗਸਤ ਵਿੱਚ ਮਿਸੀਸਾਗਾ ਕਮਿਊਨਿਟੀ ਸੈਂਟਰ ਦੇ ਬਾਹਰ ਇੱਕ ਪਿਤਾ ਤੇ ਉਸ ਦੀ ਤਿੰਨ ਸਾਲਾ ਬੱਚੀ ਉੱਤੇ ਕਥਿਤ ਤੌਰ ਉੱਤੇ ਹਮਲਾ ਕੀਤਾ।
30 ਅਗਸਤ ਨੂੰ ਰਾਤੀਂ 9:30 ਵਜੇ 34 ਸਾਲਾ ਵਿਅਕਤੀ ਤੇ ਉਸ ਦੀ ਤਿੰਨ ਸਾਲਾ ਬੱਚੀ ਮੈਡੋਵੇਲ ਕਮਿਊਨਿਟੀ ਸੈਂਟਰ ਕਿਸੇ ਐਕਟੀਵਿਟੀ ਵਿੱਚ ਹਿੱਸਾ ਲੈਣ ਲਈ ਗਏ ਸਨ, ਪਾਰਕਿੰਗ ਲੌਟ ਵਿੱਚ ਉਹ ਆਪਣੀ ਗੱਡੀ ਦੇ ਬਾਹਰ ਖੜ੍ਹੇ ਸਨ ਜਦੋਂ ਉਨ੍ਹਾਂ ਨੂੰ ਇੱਕ ਵਿਅਕਤੀ ਤੇ ਮਹਿਲਾ ਦੇ ਵਿੱਚ ਬਹਿਸ ਹੋਣ ਦੀ ਆਵਾਜ਼ ਸੁਣਾਈ ਦਿੱਤੀ।
ਪੁਲਿਸ ਅਨੁਸਾਰ ਜਦੋਂ ਉਸ ਵਿਅਕਤੀ ਨੇ ਇਹ ਵੇਖਿਆ ਕਿ ਪਿਓ-ਧੀ ਉਨ੍ਹਾਂ ਦਰਮਿਆਨ ਹੋ ਰਹੀ ਬਹਿਸ ਸੁਣ ਰਹੇ ਹਨ, ਉਹ ਉਨ੍ਹਾਂ ਕੋਲ ਪਹੁੰਚਿਆ ਤੇ ਫਿਰ ਉਸ ਨੇ ਕਿਸੇ ਪਦਾਰਥ ਨਾਲ ਉਨ੍ਹਾਂ ਉੱਤੇ ਸਪਰੇਅ ਕਰ ਦਿੱਤਾ। ਪੁਲਿਸ ਨੇ ਆਖਿਆ ਕਿ ਉਨ੍ਹਾਂ ਦਾ ਮੰਨਣਾ ਹੈ ਕਿ ਇਹ ਪਦਾਰਥ ਪੈਪਰ ਸਪ੍ਰੇਅ ਜਾਂ ਬੀਅਰ ਸਪੇ੍ਰਅ ਹੋ ਸਕਦਾ ਹੈ।ਇਸ ਨਾਲ ਪਿਤਾ ਨੂੰ ਮਾਮੂਲੀ ਸੱਟਾਂ ਵੀ ਲੱਗੀਆਂ। ਅਜੇ ਤੱਕ ਜਾਂਚਕਾਰਾਂ ਵੱਲੋਂ ਮਸ਼ਕੂਕ ਦੀ ਪਛਾਣ ਨਹੀਂ ਕੀਤੀ ਗਈ ਹੈ ਪਰ ਵੀਰਵਾਰ ਨੂੰ ਪੀਲ ਰੀਜਨਲ ਪੁਲਿਸ ਵੱਲੋਂ ਇੱਕ ਮਸ਼ਕੂਕ ਦੀ ਫੋਟੋ ਜਾਰੀ ਕੀਤੀ ਗਈ।
ਪੁਲਿਸ ਵੱਲੋਂ ਦਿੱਤੇ ਗਏ ਵੇਰਵੇ ਅਨੁਸਾਰ ਇਸ ਵਿਅਕਤੀ ਦਾ ਕੱਦ ਪੰਜ ਫੁੱਟ ਅੱਠ ਇੰਚ, ਉਮਰ 18 ਤੋਂ 25 ਸਾਲ ਹੈ, ਉਸ ਦੇ ਕਾਲੇ, ਮੋਢਿਆਂ ਤੱਕ ਦੇ ਵਾਲ ਹਨ ਤੇ ਘਟਨਾ ਸਮੇਂ ਉਸ ਨੇ ਚਿੱਟੇ ਰੰਗ ਦੀ ਟੀ-ਸ਼ਰਟ ਤੇ ਕਾਲੀਆਂ ਸ਼ੌਰਟਸ ਪਾਈਆਂ ਹੋਈਆਂ ਸਨ।