* ਕੈਬਨਿਟ ਮੀਟਿੰਗ ਤੋਂ ਖਾਣਾ ਖਾਧੇ ਬਿਨਾਂ ਚਲੇ ਗਏ
ਚੰਡੀਗੜ੍ਹ, 27 ਸਤੰਬਰ, (ਪੋਸਟ ਬਿਊਰੋ)- ਪੰਜਾਬ ਸਰਕਾਰ ਦੇ ਨਵੇਂ ਮੰਤਰੀਆਂ ਦੇ ਸਹੁੰ ਚੁੱਕਣ ਅਤੇ ਚਾਰਜ ਸੰਭਾਲਣ ਪਿੱਛੋਂ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਦੀ ਅਗਵਾਈ ਵਿਚ ਸੋਮਵਾਰ ਨੂੰ ਹੋਈ ਪਹਿਲੀ ਬੈਠਕ ਮੌਕੇ ਬਦਲੀਆਂ ਬਾਰੇ ਮੰਤਰੀਆਂ ਦੀ ਨਾਰਾਜ਼ਗੀ ਸਾਹਮਣੇ ਆ ਗਈ ਅਤੇ ਇਸ ਦੀ ਚਰਚਾ ਚੋਖੀ ਚੱਲ ਰਹੀ ਹੈ।
ਜਾਣਕਾਰ ਸੂਤਰਾਂ ਮੁਤਾਬਕ ਬੈਠਕ ਮਗਰੋਂ ਭਾਰਤ ਭੂਸ਼ਣ ਆਸ਼ੂ ਨੇ ਗੈਰ-ਰਸਮੀ ਤੌਰ ਉੱਤੇ ਲੁਧਿਆਣਾ ਦੇ ਪੁਲਿਸ ਕਮਿਸ਼ਨਰ ਨੌਨਿਹਾਲ ਸਿੰਘ ਦੇ ਤਬਾਦਲੇ ਦਾ ਮਾਮਲਾ ਚੁੱਕਿਆ ਤੇ ਕਿਹਾ ਕਿ ਪਹਿਲਾਂ ਅਸੀਂ ਕੈਪਟਨ ਅਮਰਿੰਦਰ ਸਿੰਘ ਨੂੰ ਸ਼ਿਕਾਇਤਾਂ ਕਰਦੇ ਸਾਂ ਕਿ ਜ਼ਿਲ੍ਹਿਆਂ ਦੇ ਕਿਸੇ ਅਫਸਰ ਦਾ ਤਬਾਦਲਾ ਕਰਨਾ ਹੋਵੇ ਤਾਂ ਮੰਤਰੀਆਂ ਤੋਂ ਪੁੱਛਿਆ ਜਾਵੇ ਅਤੇ ਸਾਬਕਾ ਮੁੱਖ ਮੰਤਰੀ ਦੇ ਚੀਫ ਪ੍ਰਿੰਸੀਪਲ ਸੈਕਟਰੀ ਸੁਰੇਸ਼ ਕੁਮਾਰ ਸਾਡੇ ਤੋਂ ਪੁੱਛ ਕੇ ਅਫਸਰਾਂ ਦੇ ਤਬਾਦਲੇ ਕਰਦੇ ਸਨ, ਪਰ ਨਵੀਂ ਸਰਕਾਰ ਨੇ ਲੁਧਿਆਣਾ ਦੇ ਪੁਲਿਸ ਕਮਿਸ਼ਨਰ ਦਾ ਤਬਾਦਲਾ ਕਰਦੇ ਸਮੇਂ ਸਾਡੇ ਕੋਲੋਂ ਪੁੱਛਿਆ ਹੀ ਨਹੀਂ। ਏਸੇ ਨਾਰਾਜ਼ਗੀ ਕਾਰਨ ਬੈਠਕ ਪਿੱਛੋਂ ਸੀਨੀਅਰ ਮੰਤਰੀ ਬ੍ਰਹਮ ਮਹਿੰਦਰਾ ਅਤੇ ਫਿਰ ਭਾਰਤ ਭੂਸ਼ਣ ਆਸ਼ੂ ਦੋਵੇਂ ਜਣੇ ਕਮੇਟੀ ਰੂਮ ਤੋਂ ਬਾਹਰ ਨਿਕਲੇ ਅਤੇ ਉਨ੍ਹਾਂ ਨੇ ਮੰਤਰੀਆਂ ਨਾਲ ਖਾਣਾ ਵੀ ਨਹੀਂ ਖਾਧਾ।
ਇਸ ਤੋਂ ਪਹਿਲਾਂ ਕੈਬਨਿਟ ਵਿਚ ਇਹ ਫੈਸਲਾ ਹੋ ਗਿਆ ਸੀ ਕਿ ਕੋਈ ਵੀ ਮੰਤਰੀ ਕੈਬਨਿਟ ਬੈਠਕ ਬਾਰੇ ਬਾਹਰ ਮੀਡੀਆ ਨਾਲ ਗੱਲ ਨਹੀਂ ਕਰੇਗਾ ਤੇ ਬਕਾਇਦਾ ਇਕ ਮੰਤਰੀ ਦੀ ਡਿਊਟੀ ਲਾਈ ਜਾਵੇਗੀ, ਜਿਹੜਾ ਮੀਡੀਆ ਨੂੰ ਬੈਠਕ ਦੀ ਜਾਣਕਾਰੀ ਦੇਵੇਗਾ।ਅੱਜ ਸੋਮਵਾਰ ਦੀ ਬੈਠਕ ਬਾਰੇ ਮੀਡੀਆ ਨਾਲ ਗੱਲ ਕਰਨ ਲਈ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਦੀ ਡਿਊਟੀ ਲਾਈ ਗਈ, ਪਰ ਉਨ੍ਹਾਂ ਦੇ ਵਿਰੋਧ ਦੇ ਬਾਵਜੂਦ ਕੈਬਨਿਟ ਵਿੱਚ ਨਵੇਂ ਸ਼ਾਮਲ ਕੀਤੇ ਗਏ ਮੰਤਰੀ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਨੇ ਚੈਨਲਾਂ ਨੂੰ ਆਪਣੇ ਤੌਰ ਉੱਤੇ ਬੈਠਕਾਂ ਬਾਰੇ ਬ੍ਰੀਫਿੰਗ ਦੇ ਦਿੱਤੀ।