ਅੰਮ੍ਰਿਤਸਰ, 27 ਸਤੰਬਰ (ਪੋਸਟ ਬਿਊਰੋ)- ਇਥੇ ਸੁਲਤਾਨਵਿੰਡ ਰੋਡ ਉੱਤੇ ਥਾਣਾ-ਸੀ ਡਵੀਜ਼ਨ ਦੇ ਨੇੜੇ ਇੱਕ ਕੱਪੜੇ ਅਤੇ ਵੈਸਟਰਨ ਮਨੀ ਐਕਸਚੇਂਜ ਦੀ ਦੁਕਾਨ ਤੋਂ ਚਾਰ ਹਥਿਆਰਬੰਦ ਲੁਟੇਰਿਆਂ ਨੇੇ ਪਿਸਤੌਲ ਦੀ ਨੋਕ ਉੱਤੇ ਲਗਭਗ 10 ਲੱਖ ਰੁਪਏ ਦੀ ਨਕਦੀ ਅਤੇ ਪੰਜ ਤੋਂ ਛੇ ਲੱਖ ਰੁਪਏ ਦੀ ਵੱਖ-ਵੱਖ ਮੁਲਕਾਂ ਦੀ ਕਰੰਸੀ ਲੁੱਟ ਲਈ ਹੈ।
‘ਬਿੱਲੇ ਦੀ ਹੱਟੀ’ ਨਾਂਅ ਦੀ ਦੁਕਾਨ ਉੱਤੇ ਵਾਪਰੀ ਇਸ ਘਟਨਾ ਬਾਰੇ ਦੁਕਾਨ ਮਾਲਕ ਰਣਜੀਤ ਸਿੰਘ ਨੇ ਦੱਸਿਆ ਕਿ ਲਗਭਗ 11.30 ਵਜੇ ਦੁਕਾਨ ਵਿੱਚ ਚਾਰ ਜਣੇ ਆਏ, ਜਿਨ੍ਹਾਂ ਨੇ ਮੁੰਹ ਢੱਕੇ ਹੋਏ ਸਨ। ਇਨ੍ਹਾਂ ਨੇ ਦੁਕਾਨ ਵਿੱਚ ਵੜਦੇ ਸਾਰ ਪਿਸਤੌਲ ਕੱਢ ਲਏ ਅਤੇ ਮਨੀ ਐਕਸਚੇਂਜ ਕਾਊਂਟਰ ਤੋਂ ਸਾਰੀ ਨਕਦੀ ਖੋਹ ਲਈ। ਇਸ ਦੌਰਾਨ ਮਨੀ ਐਕਸਚੇਂਜ ਕਰਾਉਣ ਵਾਸਤੇ ਆਏ ਇੱਕ ਗਾਹਕ ਕੋਲੋਂ ਵੀ ਇੱਕ ਲੱਖ ਦੀ ਨਕਦੀ ਖੋਹ ਲਈ। ਲੁਟੇਰਿਆਂ ਨੇ ਵੱਖ-ਵੱਖ ਮੁਲਕਾਂ ਦੀ ਇੱਥੇ ਰੱਖੀ ਕਰੰਸੀ ਵੀ ਖੋਹ ਲਈ ਅਤੇ ਦੁਕਾਨ ਵਿੱਚ ਬੈਠੇ ਉਸ ਦੇ ਭਤੀਜੇ ਦੀ ਸੋਨੇ ਦੀ ਚੇਨ ਵੀ ਖੋਹ ਲਈ ਅਤੇ ਫਰਾਰ ਹੋ ਗਏ।ਦੁਕਾਨਦਾਰ ਦੇ ਬੇਟੇ ਦਲਜੀਤ ਸਿੰਘ ਨੇ ਦੱਸਿਆ ਕਿ ਉਹ ਪਿਛਲੇ ਦਸ ਸਾਲ ਤੋਂ ਮਨੀ ਐਕਸਚੇਂਜ ਦਾ ਕੰਮ ਕਰ ਰਿਹਾ ਹੈ। ਸ਼ਨੀਵਾਰ ਅਤੇ ਐਤਵਾਰ ਛੁੱਟੀ ਹੋਣ ਕਾਰਨ ਉਸ ਨੇ ਕੰਮ ਵਾਸਤੇ ਦਸ ਲੱਖ ਰੁਪਏ ਨਕਦ ਕਢਵਾਏ ਸਨ। ਇਸ ਵਿੱਚੋਂ ਕੁਝ ਰਕਮ ਕੱਲ੍ਹ ਗਾਹਕਾਂ ਨੂੰ ਦਿੱਤੀ ਸੀ। ਉਸ ਨੇ ਦੱਸਿਆ ਕਿ ਲੁਟੇਰਿਆਂ ਨੇ ਪਿਸਤੌਲ ਉਸ ਦੇ ਸਿਰ ਉੱਤੇ ਤਾਣ ਕੇ ਸਾਰੀ ਨਕਦੀ ਤੇ ਹੋਰ ਮੁਲਕਾਂ ਦੀ ਕਰੰਸੀ ਖੋਹੀ ਅਤੇ ਫਰਾਰ ਹੋ ਗਏ। ਇਸ ਦੌਰਾਨ ਪਤਾ ਲੱਗਾ ਕਿ ਦੁਕਾਨ ਦੇ ਸੀ ਸੀ ਟੀ ਵੀ ਕੈਮਰੇ ਖਰਾਬ ਸਨ, ਜਦੋਂ ਕਿ ਦੁਕਾਨ ਦੇ ਬਾਹਰ ਗਲੀ ਵਿੱਚ ਲੱਗੇ ਕੈਮਰੇ ਤੋਂ ਚਾਰ ਜਣਿਆਂ ਦੇ ਦੁਕਾਨ ਵਿੱਚ ਵੜਨ ਤੇ ਵਾਪਸ ਆਉਣ ਦੀ ਫੁਟੇਜ ਦਿਖਾਈ ਦਿੰਦੀ ਹੈ। ਲੁੱਟੇ ਗਏ ਦੁਕਾਨਦਾਰ ਨੇ ਦੱਸਿਆ ਕਿ ਲੁਟੇਰਿਆਂ ਦੀ ਗਿਣਤੀ ਛੇ ਸੀ, ਜਿਨ੍ਹਾਂ ਵਿੱਚੋਂ ਦੋ ਬਾਹਰ ਮੋਟਰ ਸਾਈਕਲਾਂ ਉੱਤੇ ਬੈਠੇ ਹੋਏ ਸਨ। ਇਸ ਦੌਰਾਨ ਏ ਡੀ ਸੀ ਪੀ ਹਰਪਾਲ ਸਿੰਘ ਤੇ ਹੋਰ ਘਟਨਾ ਸਥਾਨ ਉੱਤੇ ਪੁੱਜੇ ਸਨ, ਜਿਨ੍ਹਾਂ ਨੇੇ ਘਟਨਾ ਬਾਰੇ ਪੁੱਛਗਿੱਛ ਕੀਤੀ ਹੈ।