ਓਟਵਾ, 13 ਸਤੰਬਰ (ਪੋਸਟ ਬਿਊਰੋ) : ਫੈਡਰਲ ਕੰਜ਼ਰਵੇਟਿਵਾਂ ਵੱਲੋਂ ਨਵੇਂ ਬਣੇ ਮਾਪਿਆਂ ਨਾਲ ਇਹ ਵਾਅਦਾ ਕੀਤਾ ਜਾ ਰਿਹਾ ਹੈ ਕਿ ਉਨ੍ਹਾਂ ਦੇ ਸੱਤਾ ਵਿੱਚ ਆਉਣ ਉੱਤੇ ਅਜਿਹੇ ਮਾਪੇ ਪ੍ਰਤੀ ਮਹੀਨਾ 1,000 ਡਾਲਰ ਤੱਕ ਕਮਾ ਸਕਣਗੇ ਅਤੇ ਇਸ ਪੇਸ਼ਕਸ਼ ਨਾਲ ਉਨ੍ਹਾਂ ਦੀ ਮੈਟਰਨਿਟੀ ਜਾਂ ਪੇਰੈਂਟਲ ਲੀਵ ਪੇਅਮੈਂਟ ਉੱਤੇ ਵੀ ਕੋਈ ਅਸਰ ਨਹੀਂ ਪਵੇਗਾ।
ਟੋਰੀ ਆਗੂ ਐਰਿਨ ਓਟੂਲ ਨੇ ਫੈਡਰਲ ਚੋਣ ਪ੍ਰਚਾਰ ਦੇ ਆਖਰੀ ਹਫਤੇ ਓਟਵਾ ਵਿੱਚ ਇਹ ਐਲਾਨ ਕੀਤਾ। ਓਟੂਲ ਨੇ ਆਖਿਆ ਕਿ ਫੈਡਰਲ ਮੈਟਰਨਿਟੀ ਤੇ ਪੇਰੈਂਟਲ ਬੈਨੇਫਿਟਜ਼ ਮਾਪਿਆਂ ਨੂੰ ਉਨ੍ਹਾਂ ਦੀ ਕਮਾਈ ਦਾ 55 ਫੀ ਸਦੀ ਹਾਸਲ ਕਰਨ ਦੀ ਖੁੱਲ੍ਹ ਦਿੰਦਾ ਹੈ, ਜੋ ਕਿ ਪ੍ਰਤੀ ਹਫਤੇ ਵੱਧ ਤੋਂ ਵੱਧ 595 ਡਾਲਰ ਹੈ, ਪਰ ਉਨ੍ਹਾਂ ਇਹ ਵੀ ਆਖਿਆ ਕਿ ਬਹੁਤ ਸਾਰੇ ਘੱਟ ਆਮਦਨ ਵਾਲੇ ਲੋਕ ਇਸ ਘਟੀ ਹੋਈ ਪੇਅ ਨੂੰ ਅਫੋਰਡ ਨਹੀਂ ਕਰ ਸਕਦੇ।
ਉਨ੍ਹਾਂ ਆਖਿਆ ਕਿ ਨਵੇਂ ਮਾਪੇ ਇਹ ਇੰਪਲੌਇਮੈਂਟ ਇੰਸ਼ੋਰੈਂਸ ਪੇਅਮੈਂਟਸ ਦੂਰ ਦਰਾਜ ਜਾਂ ਪਾਰਟ ਟਾਈਮ ਕੰਮ ਕਰਕੇ ਕਮਾ ਸਕਣਗੇ। ਇਸ ਤੋਂ ਇਲਾਵਾ ਓਟੂਲ ਨੇ ਕੈਨੇਡਾ ਚਾਈਲਡ ਬੈਨੇਫਿਟ ਵਿੱਚ ਪਸਾਰ ਕਰਨ ਦਾ ਵਾਅਦਾ ਕਰਦਿਆਂ ਆਖਿਆ ਕਿ ਉਹ ਬੱਚੇ ਦੇ ਜਨਮ ਦੇ ਸਮੇਂ ਗਰਭਕਾਲ ਦੇ ਸੱਤਵੇਂ ਮਹੀਨੇ ਵਿੱਚ ਇਹ ਬੈਨੇਫਿਟ ਦੇਣ ਦਾ ਵਾਅਦਾ ਕਰਦੇ ਹਨ।