ਓਟਵਾ, 12 ਸਤੰਬਰ (ਪੋਸਟ ਬਿਊਰੋ) : ਲਿਬਰਲ ਆਗੂ ਜਸਟਿਨ ਟਰੂਡੋ ਵੱਲੋਂ ਐਨਡੀਪੀ ਉੱਤੇ ਨਿਸ਼ਾਨਾਂ ਸਾਧਦਿਆਂ ਆਖਿਆ ਗਿਆ ਕਿ ਪਾਰਟੀ ਨਵੀਂ ਆਮਦਨ ਦੇ ਰੂਪ ਵਿੱਚ ਕਈ ਬਿਲੀਅਨ ਡਾਲਰ ਇੱਕਠੇ ਕਰਨ ਦੇ ਦਾਅਵੇ ਕਰ ਰਹੀ ਹੈ ਪਰ ਕੋਈ ਵੀ ਸਰਕਾਰ ਅਮੀਰਾਂ ਉੱਤੇ ਕਿੰਨਾਂ ਟੈਕਸ ਲਾ ਸਕਦੀ ਹੈ ਇਸ ਦੀ ਵੀ ਇੱਕ ਹੱਦ ਹੁੰਦੀ ਹੈ।
ਐਨਡੀਪੀ ਇਹ ਵਾਅਦੇ ਕਰ ਰਹੀ ਹੈ ਕਿ ਫਾਰਮਾਕੇਅਰ ਤੇ ਡੈਂਟਲ ਕੇਅਰ ਵਰਗੇ ਪ੍ਰੋਗਰਾਮ ਸਿਰਜ ਕੇ ਲੋਕਾਂ ਨੂੰ ਸਹੂਲਤ ਦੇਵੇਗੀ ਤੇ ਇਸ ਲਈ ਅਮੀਰਾਂ ਉੱਤੇ ਅਤੇ ਬੇਹੱਦ ਮੁਨਾਫਾ ਕਮਾਉਣ ਵਾਲੀਆਂ ਕਾਰਪੋਰੇਸ਼ਨਜ਼ ਉੱਤੇ ਟੈਕਸ ਲਾ ਕੇ ਇਸ ਦਾ ਖਰਚਾ ਕੱਢੇਗੀ।ਲਾ ਪ੍ਰੇਅਰੀ, ਕਿਊਬਿਕ ਵਿੱਚ ਕੈਂਪੇਨ ਪੜਾਅ ਦੌਰਾਨ ਟਰੂਡੋ ਨੇ ਆਖਿਆ ਕਿ ਤੁਸੀਂ ਅਮੀਰ ਕੈਨੇਡੀਅਨਾਂ ਪਿੱਛੇ ਹੱਥ ਧੋ ਕੇ ਨਹੀਂ ਪੈ ਸਕਦੇ ਤੇ ਐਨਡੀਪੀ ਇਸ ਗੱਲ ਨੂੰ ਚੰਗੀ ਤਰ੍ਹਾਂ ਸਮਝ ਨਹੀਂ ਰਹੀ ਹੈ।
ਇਸ ਉੱਤੇ ਐਨਡੀਪੀ ਆਗੂ ਜਗਮੀਤ ਸਿੰਘ ਨੇ ਆਖਿਆ ਕਿ ਇਸ ਮਾਮਲੇ ਵਿੱਚ ਟਰੂਡੋ ਦੀ ਸੀਮਤ ਸੋਚ ਦਾ ਉਹ ਕੁੱਝ ਨਹੀਂ ਕਰ ਸਕਦੇ। ਉਨ੍ਹਾਂ ਆਖਿਆ ਕਿ ਟਰੂਡੋ ਦੀ ਅਗਵਾਈ ਵਿੱਚ ਅਜਿਹੇ ਅਮੀਰਾਂ ਨੇ ਖੂਭ ਮਜ਼ੇ ਕੀਤੇ ਅਤੇ ਲਿਬਰਲ ਸਰਕਾਰ ਨੇ ਉਨ੍ਹਾਂ ਤੋਂ ਜਿੰਨੀ ਆਮਦਨ ਇੱਕਠੀ ਹੋ ਸਕਦੀ ਸੀ ਉਹ ਨਹੀਂ ਕੀਤੀ। ਉਨ੍ਹਾਂ ਸਡਬਰੀ ਵਿੱਚ ਕੈਂਪੇਨ ਕਰਦਿਆਂ ਆਖਿਆ ਕਿ ਇੱਕ ਮਿੰਟ ਪਿੱਛੇ ਅਸੀਂ ਜਿਹੜਾ ਪੈਸਾ ਗੁਆ ਰਹੇ ਹਾਂ ਉਹ ਹੈ 50,000 ਡਾਲਰ।
ਟਰੂਡੋ ਨੇ ਪੱਤਰਕਾਰਾਂ ਨਾਲ ਕਲਾਈਮੇਟ ਚੇਂਜ ਤੇ ਗੰਨ ਕੰਟਰੋਲ ਬਾਰੇ ਵੀ ਗੱਲ ਕੀਤੀ ਤੇ ਇਨ੍ਹਾਂ ਮੁੱਦਿਆਂ ਬਾਰੇ ਸਪਸ਼ਟ ਰਾਇ ਪੇਸ਼ ਨਾ ਕਰਨ ਲਈ ਕੰਜ਼ਰਵੇਟਿਵ ਆਗੂ ਐਰਿਨ ਓਟੂਲ ਨੂੰ ਵੀ ਲੰਮੇਂ ਹੱਥੀਂ ਲਿਆ।ਇਸ ਦੌਰਾਨ ਓਟੂਲ ਪੱਛਮੀ ਹਿੱਸੇ ਵਿੱਚ ਵੈਨਕੂਵਰ ਵਿੱਚ ਪਾਰਟੀ ਪਲੇਟਫਾਰਮ ਦਾ ਪ੍ਰਚਾਰ ਕਰ ਰਹੇ ਸਨ। ਇਹ ਐਡਵਾਂਸ ਪੋਲਿੰਗ ਦਾ ਸੈਕਿੰਡ ਲਾਸਟ ਦਿਨ ਸੀ। ਇਲੈਕਸ਼ਨਜ਼ ਕੈਨੇਡਾ ਨੇ ਆਖਿਆ ਕਿ 1·3 ਮਿਲੀਅਨ ਕੈਨੇਡੀਅਨਜ਼ ਨੇ ਸ਼ੁੱਕਰਵਾਰ ਨੂੰ ਐਡਵਾਂਸ ਪੋਲਿੰਗ ਦੇ ਪਹਿਲੇ ਦਿਨ ਵੋਟਾਂ ਪਾਈਆਂ।