ਕੋਲਕਾਤਾ, 17 ਦਸੰਬਰ (ਪੋਸਟ ਬਿਊਰੋ)- ਪੱਛਮੀ ਬੰਗਾਲ ਦੇ ਮੇਮਾਰੀ ਵਿੱਚ ਸਟੇਟ ਬੈਂਕ ਆਫ ਇੰਡੀਆ (ਐੱਸ ਬੀ ਆਈ) ਦੀ ਬ੍ਰਾਂਚ ਵਿੱਚੋਂ ਇਸ ਬੈਂਕ ਦੇ ਹੀ ਇੱਕ ਸੀਨੀਅਰ ਅਸਿਸਟੈਂਟ ਮੈਨੇਜਰ ਨੇ 84 ਲੱਖ ਰੁਪਏ ਦੀ ਕੀਮਤ ਦੇ ਸਿੱਕੇ ਚੋਰੀ ਕਰ ਲਏ, ਪਰ ਅੱਠ ਸਾਲਾਂ ਤੋਂ ਐੱਸ ਬੀ ਆਈ ਵਿੱਚ ਕੰਮ ਕਰ ਰਹੇ ਮੈਨੇਜਰ 'ਤੇ ਕਿਸੇ ਨੂੰ ਵੀ ਸ਼ੱਕ ਨਹੀਂ ਹੋਇਆ। ਆਡਿਟ ਹੋਣ ਤੋਂ ਬਾਅਦ ਮਾਮਲੇ ਦਾ ਖੁਲਾਸਾ ਹੋਇਆ ਹੈ।
ਇਸ ਸੰਬੰਧ ਵਿੱਚ ਦੋਸ਼ ਲਾਇਆ ਗਿਆ ਹੈ ਕਿ 35 ਸਾਲਾ ਤਾਰਕ ਜੈਸਵਾਲ ਨੇ ਲਾਟਰੀ ਖੇਡਣ ਵਿੱਚ ਚੋਰੀ ਕੀਤੇ ਪੈਸੇ ਦੀ ਵਰਤੋਂ ਕੀਤੀ। ਬੈਂਕ ਦੀ ਕਰੰਸੀ ਚੈਸਟ ਮੈਨੇਜ ਕਰਨ ਵਾਲੇ ਜੈਸਵਾਲ ਨੇ ਇਹ ਚੋਰੀ ਬੀਤੇ 17 ਮਹੀਨਿਆਂ ਵਿੱਚ ਕੀਤੀ ਹੈ। ਸਥਾਨਕ ਅਦਾਲਤ ਨੇ ਉਸ ਨੂੰ ਪੰਜ ਦਿਨਾਂ ਦੀ ਪੁਲਸ ਕਸਟਡੀ ਵਿੱਚ ਭੇਜ ਦਿੱਤਾ ਹੈ। ਇੱਕ ਪੁਲਸ ਅਧਿਕਾਰੀ ਨੇ ਕਿਹਾ ਕਿ ਜੈਸਵਾਲ ਨੇ ਜੁਰਮ ਕਬੂਲ ਕਰ ਕੇ ਕਿਹਾ ਕਿ ਉਸ ਨੇ ਸਾਰਾ ਪੈਸਾ ਲਾਟਰੀ ਟਿਕਟਾਂ ਵਿੱਚ ਲਾ ਦਿੱਤਾ ਹੈ।