ਲੁਧਿਆਣਾ, 3 ਅਗਸਤ (ਪੋਸਟ ਬਿਊਰੋ)- ਕਿਸਾਨ ਅੰਦੋਲਨ ਦੇ ਅਸਰ ਹੇਠ ਕਾਰਪੋਰੇਟ ਘਰਾਣਿਆਂ ਵੱਲੋਂ ਪੰਜਾਬ ਵਿੱਚ ਖੋਲ੍ਹੇ ਸਟੋਰ ਲੰਬੇ ਸਮੇਂ ਤੋਂ ਬੰਦ ਹੋਣ ਦੇ ਕਾਰਨ ਨੌਜਵਾਨਾਂ ਦੇ ਲਈ ਰੋਜ਼ਗਾਰ ਦੀ ਚੁਣੌਤੀ ਖੜ੍ਹੀ ਕਰਨ ਲੱਗੇ ਹਨ। ਅਡਾਨੀ ਲਾਜਿਸਟਿਕਸ ਪਾਰਕ ਬੰਦ ਹੋਣ ਪਿੱਛੋਂ ਕੁਝ ਹੋਰ ਕਾਰਪੋਰੇਟ ਕੰਪਨੀਆਂ ਦੇ ਸਟੋਰਾਂ ਵਿੱਚ ਕੰਮ ਕਰਦੇ ਪੰਜਾਬ ਦੇ ਨੌਜਵਾਨਾਂ ਲਈ ਚੁਣੌਤੀਆਂ ਪੈਦਾ ਹੋ ਰਹੀਆਂ ਹਨ। ਉਨ੍ਹਾਂ ਨੂੰ ਡਰ ਹੈ ਕਿ ਜੇ ਹਾਲਾਤ ਨਾ ਬਦਲਣਗੇ ਤਾਂ ਜਿਨ੍ਹਾਂ ਸਟੋਰਾਂ ਦੇ ਖੁੱਲ੍ਹਣ ਦਾ ਇੰਤਜ਼ਾਰ ਹੈ ਕਿਤੇ ਕਾਰਪੋਰੇਟ ਘਰਾਣੇ ਆਪਣੇ ਅਦਾਰੇ ਪੰਜਾਬ ਵਿੱਚ ਬੰਦ ਹੀ ਨਾ ਕਰ ਦੇਣ।
ਕਿਸਾਨ ਅੰਦੋਲਨ ਦੇ ਕਾਰਨ ਜਿੱਥੇ ਅਡਾਨੀ ਨੇ ਆਪਣਾ ਅਦਾਰਾ ਬੰਦ ਕਰ ਦਿੱਤਾ, ਉਥੇ ਪੰਜਾਬ ਵਿੱਚ ਰਿਲਾਇੰਸ ਦੇ ਕਈ ਆਊਟਲੈਟਸ ਪਿਛਲੇ ਦਸ ਮਹੀਨੇ ਤੋਂ ਨਹੀਂ ਖੁੱਲ੍ਹੇ। ਕਈ ਸਟੋਰਾਂ ਦੇ ਬਾਹਰ ਬਾਕਾਇਦਾ ਇਸ ਬਾਰੇ ਨੋਟਿਸ ਲਾਏ ਗਏ ਹਨ ਕਿ ਕਿਸਾਨ ਅੰਦੋਲਨ ਦੇ ਕਾਰਨ ਸਟੋਰ ਬੰਦ ਹਨ। ਇਸ ਦਾ ਮੁੱਖ ਕਾਰਨ ਕਿਸਾਨਾਂ ਵਲੋਂ ਸਟੋਰਾਂ ਉੱਤੇ ਕੀਤੀ ਭੰਨਤੋੜ ਹੈ। ਪੰਜਾਬ ਵਿੱਚ ਰਿਲਾਇੰਸ ਮਾਲ, ਰਿਲਾਇੰਸ ਟ੍ਰੈਂਡ, ਰਿਲਾਇੰਸ ਜਵੈਲਰਸ, ਰਿਲਾਇੰਸ ਫਰੈਸ਼, ਰਿਲਾਇੰਸ ਵਾਨਾ, ਰਿਲਾਇੰਸ ਫੁਟ ਪ੍ਰਿੰਟ ਸਟੋਰ, ਰਿਲਾਇੰਸ ਸਮਾਰਟ, ਰਿਲਾਇੰਸ ਦੇ ਪੈਟਰੋਲ ਪੰਪ ਆਦਿ ਕਰੀਬ 150 ਅਦਾਰਿਆਂ ਵਿੱਚ ਕਰੀਬ 5500 ਲੋਕਾਂ ਨੂੰ ਰੋਜ਼ਗਾਰ ਮਿਲਿਆ, ਪਰ ਕੰਪਨੀ ਇਨ੍ਹਾਂ ਸਟੋਰਾਂ ਨੂੰ ਖੋਲ੍ਹ ਨਹੀਂ ਰਹੀ ਹੈ।
ਜਾਣਕਾਰ ਸੂਤਰਾਂ ਅਨੁਸਾਰ ਇਸ ਦਾ ਸਿੱਧਾ ਅਸਰ ਰੋਜ਼ਗਾਰ ਉੱਤੇ ਹੋਣ ਦੇ ਨਾਲ ਪੰਜਾਬ ਸਰਕਾਰ ਨੂੰ ਕਾਰਪੋਰੇਟ ਜਗਤ ਤੋਂ ਨਵਾਂ ਨਿਵੇਸ਼ ਨਾ ਮਿਲਣ ਕਾਰਨ ਵੀ ਨੁਕਸਾਨ ਸਹਿਣਾ ਪੈ ਸਕਦਾ ਹੈ। ਇਹੀ ਨਹੀਂ ਸਗੋਂ ਸਬਜ਼ੀ ਤੇ ਫਲ ਵੇਚਣ ਵਾਲੇ ਕਿਸਾਨਾਂ ਨੂੰ ਵੀ ਅੰਦੋਲਨ ਕਾਰਨ ਬੰਦ ਹੋਏ ਇਨ੍ਹਾਂ ਸਟੋਰਾਂ ਦਾ ਨੁਕਸਾਨ ਹੋ ਰਿਹਾ ਹੈ। ਰਿਲਾਇੰਸ ਦੇ ਇੱਕ ਦਰਜਨ ਤੋਂ ਵੱਧ ਰਿਟੇਲ ਸਟੋਰ ਕੇਵਲ ਲੁਧਿਆਣਾ ਵਿੱਚ ਹਨ ਅਤੇ ਪੰਜਾਬ ਵਿੱਚ ਕਰੀਬ 150 ਵੱਖ-ਵੱਖ ਬ੍ਰਾਂਡਾਂ ਦੇ ਸਟੋਰ ਹਨ, ਜੋ ਇਨ੍ਹੀਂ ਦਿਨੀਂ ਬੰਦ ਹਨ। ਜਾਣਕਾਰ ਇਸ ਗੱਲ ਨੂੰ ਲੈ ਕੇੇ ਚਿੰਤਾ ਵਿੱਚ ਹਨ ਕਿ ਜੇ ਰਿਲਾਇੰਸ ਨੇ ਵੀ ਅਡਾਨੀ ਵਰਗਾ ਕਦਮ ਉਠਾ ਲਿਆ ਤਾਂ ਪਤਾ ਨਹੀਂ ਕਿੰਨੇ ਨੌਜਵਾਨ ਬੇਰੋਜ਼ਗਾਰ ਹੋ ਜਾਣਗੇ।