ਓਟਵਾ, 30 ਜੁਲਾਈ (ਪੋਸਟ ਬਿਊਰੋ) : ਦੂਜੀ ਛਿਮਾਹੀ ਵਿੱਚ ਅਰਥਚਾਰੇ ਦੀ ਸਥਿਤੀ ਕਿਹੋ ਜਿਹੀ ਰਹੇਗੀ ਇਸ ਬਾਰੇ ਸਟੈਟੇਸਟਿਕਸ ਕੈਨੇਡਾ ਵੱਲੋਂ ਅੱਜ ਚਾਨਣਾ ਪਾਇਆ ਜਾਵੇਗਾ। ਇਸ ਤੋਂ ਇਲਾਵਾ ਮਈ ਵਿੱਚ ਅਰਥਚਾਰੇ ਦੇ ਹਾਲ ਬਾਰੇ ਵੀ ਸਟੈਟਸਕੈਨ ਰੋਸ਼ਨੀ ਪਾਈ ਜਾਵੇਗੀ।
ਪਿਛਲੇ ਮਹੀਨੇ ਏਜੰਸੀ ਨੇ ਆਖਿਆ ਕਿ ਉਨ੍ਹਾਂ ਦੇ ਮੁੱਢਲੇ ਅੰਦਾਜ਼ੇ ਮੁਤਾਬਕ ਮਈ ਵਿੱਚ ਕੁੱਲ ਘਰੇਲੂ ਉਤਪਾਦ ( ਜੀ ਡੀ ਪੀ ) 0·3 ਫੀ ਸਦੀ ਡਿੱਗ ਗਿਆ। ਅਪਰੈਲ ਵਿੱਚ ਵੀ ਜੀ ਡੀ ਪੀ ਦਾ ਇਹੋ ਹਾਲ ਸੀ। ਅਪਰੈਲ ਤੇ ਮਈ ਵਿੱਚ ਆਈ ਇਸ ਕਮੀ ਨੇ ਸਮੁੱਚੇ ਅਰਥਚਾਰੇ ਨੂੰ ਮਹਾਂਮਾਰੀ ਤੋਂ ਪਹਿਲਾਂ ਵਾਲੇ ਪੱਧਰ, ਜੋ ਕਿ ਫਰਵਰੀ 2020 ਵਿੱਚ ਸੀ, ਤੋਂ ਵੀ ਇੱਕ ਫੀ ਸਦੀ ਹੇਠਾਂ ਲਿਆਂਦਾ।
ਪਰ ਜੂਨ ਵਿੱਚ ਵੈਕਸੀਨੇਸ਼ਨ ਵਿੱਚ ਹੋਏ ਵਾਧੇ ਕਾਰਨ ਤੇ ਦੇਸ਼ ਦੇ ਕਈ ਹਿੱਸਿਆਂ ਵਿੱਚ ਪਾਬੰਦੀਆਂ ਵਿੱਚ ਦਿੱਤੀ ਗਈ ਥੋੜ੍ਹੀ ਢਿੱਲ ਕਾਰਨ ਅਰਥਚਾਰੇ ਦੀ ਸਥਿਤੀ ਵਿੱਚ ਸੁਧਾਰ ਹੋਣ ਦੀ ਆਸ ਬੱਝੀ। ਬੀ ਐਮ ਓ ਦੇ ਅਰਥਸ਼ਾਸਤਰੀ ਡਗਲਸ ਪੌਰਟਰ ਨੇ ਇੱਕ ਰਲੀਜ਼ ਵਿੱਚ ਆਖਿਆ ਕਿ ਮਈ ਵਿੱਚ ਅਸਲ ਜੀ ਡੀ ਪੀ ਵਿੱਚ ਕਮੀ ਵੇਖਣ ਵਿੱਚ ਮਿਲੀ ਪਰ ਜੂਨ ਵਿੱਚ ਥੋੜ੍ਹੇ ਜਿਹੇ ਹਾਲਾਤ ਸੁਧਰਨ ਨਾਲ ਜੀ ਡੀ ਪੀ ਦੇ ਮਜ਼ਬੂਤ ਹੋਣ ਦਾ ਅੰਦਾਜ਼ਾ ਲਾਇਆ ਜਾ ਸਕਦਾ ਹੈ। ਇਹ ਆਸ ਇਸ ਲਈ ਵੀ ਕੀਤੀ ਜਾ ਸਕਦੀ ਹੈ ਕਿਉਂਕਿ ਹੁਣ ਅਰਥਚਾਰਾ ਹੌਲੀ ਹੌਲੀ ਖੁੱਲ੍ਹਣਾ ਸ਼ੁਰੂ ਹੋ ਗਿਆ ਹੈ।
ਬੈਂਕ ਆਫ ਕੈਨੇਡਾ ਦਾ ਕਹਿਣਾਂ ਹੈ ਕਿ ਦੂਜੀ ਛਿਮਾਹੀ ਵਿੱਚ ਅਰਥਚਾਰਾ ਸਾਲਾਨਾ ਦਰ ਉੱਤੇ ਦੋ ਫੀ ਸਦੀ ਦੇ ਹਿਸਾਬ ਨਾਲ ਵਿਕਾਸ ਕਰੇਗਾ।