ਓਨਟਾਰੀਓ, 29 ਜੁਲਾਈ (ਪੋਸਟ ਬਿਊਰੋ) : ਪਬਲਿਕ ਹੈਲਥ ਲੰਡਨ, ਓਨਟਾਰੀਓ ਵੱਲੋਂ ਰੈਜ਼ੀਡੈਂਟਸ ਨੂੰ ਮੌਡਰਨਾ ਦੇ ਸ਼ੌਟਸ ਲਵਾਉਣ ਦੀ ਅਪੀਲ ਕੀਤੀ ਜਾ ਰਹੀ ਹੈ। ਅਜਿਹਾ ਮੌਡਰਨਾ ਦੀਆਂ ਹਜ਼ਾਰਾਂ ਡੋਜ਼ਾਂ ਐਕਸਪਾਇਰ ਹੋਣ ਦੇ ਡਰੋਂ ਕੀਤਾ ਜਾ ਰਿਹਾ ਹੈ।
ਮਿਡਲਸੈਕਸ-ਲੰਡਨ ਹੈਲਥ ਯੂਨਿਟ ਦਾ ਕਹਿਣਾ ਹੈ ਕਿ ਐਮ ਆਰ ਐਨ ਏ ਦੀਆਂ 21,300 ਡੋਜ਼ਾਂ 12 ਅਗਸਤ ਤੱਕ ਵਰਤੀਆਂ ਜਾਣੀਆਂ ਜ਼ਰੂਰੀ ਹਨ, ਨਹੀਂ ਤਾਂ ਇਨ੍ਹਾਂ ਦੇ ਖਰਾਬ ਹੋਣ ਦਾ ਡਰ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਪਿਛਲੇ ਦੋ ਹਫਤਿਆਂ ਵਿੱਚ ਵੈਕਸੀਨੇਸ਼ਨ ਕਾਫੀ ਘਟੀ ਹੈ ਤੇ ਮੌਡਰਨਾ ਦੇ ਉਪਲਬਧ ਸ਼ੌਟਸ ਨਿਰਧਾਰਤ ਸੈਕਿੰਡ ਡੋਜ਼ਾਂ ਤੋਂ ਜਿ਼ਆਦਾ ਹਨ। ਰੀਜਨ ਦੇ ਉੱਘੇ ਡਾਕਟਰ ਵੱਲੋਂ ਅਗਲੇ ਦੋ ਹਫਤਿਆਂ ਵਿੱਚ ਟੀਕੇ ਲਵਾਉਣ ਲਈ ਕਲੀਨਿਕਸ ਵਿੱਚ ਜਾਣ ਵਾਲੇ ਲੋਕਾਂ ਨੂੰ ਅਪੀਲ ਕੀਤੀ ਗਈ ਹੈ ਕਿ ਉਹ ਮੌਡਰਨਾ ਦੇ ਸ਼ੌਟਸ ਹੀ ਲਵਾਉਣ ਤਾਂ ਕਿ ਵੈਕਸੀਨ ਬਰਬਾਦ ਕਰਨ ਤੋਂ ਬਚਾਈ ਜਾ ਸਕੇ।
ਓਨਟਾਰੀਓ ਤੇ ਹੋਰਨਾਂ ਕੈਨੇਡੀਅਨ ਪ੍ਰੋਵਿੰਸਾਂ ਵੱਲੋਂ ਫਾਈਜ਼ਰ ਦੀ ਪਹਿਲੀ ਡੋਜ਼ ਲੈਣ ਵਾਲਿਆਂ ਨੂੰ ਦੂਜੇ ਸ਼ੌਟ ਮੌਡਰਨਾ ਦੇ ਲਵਾਉਣ ਜਾਂ ਫਿਰ ਪਹਿਲਾਂ ਮੌਡਰਨਾ ਲਵਾ ਚੁੱਕੇ ਲੋਕਾਂ ਨੂੰ ਫਾਈਜ਼ਰ ਦਾ ਦੂਜਾ ਸ਼ੌਟ ਲਵਾਉਣ ਲਈ ਆਖਿਆ ਜਾ ਰਿਹਾ ਹੈ। ਜਲਦ ਤੋਂ ਜਲਦ ਵੱਧ ਤੋਂ ਵੱਧ ਲੋਕਾਂ ਨੂੰ ਵੀ ਵੈਕਸੀਨੇਟ ਕਰਨ ਲਈ ਆਖਿਆ ਜਾ ਰਿਹਾ ਹੈ।