ਓਨਟਾਰੀਓ, 6 ਮਈ (ਪੋਸਟ ਬਿਊਰੋ) : ਫਾਈਜ਼ਰ-ਬਾਇਓਐਨਟੈਕ ਵੈਕਸੀਨ ਦੀ ਕੈਨੇਡਾ ਨੂੰ ਹੋਣ ਵਾਲੀ ਡਲਿਵਰੀ ਵਿੱਚ ਲਗਾਤਾਰ ਵਾਧਾ ਹੋ ਰਿਹਾ ਹੈ। ਇੱਕ ਤਾਜ਼ਾ ਸਰਵੇਖਣ ਵਿੱਚ ਇਹ ਸਾਹਮਣੇ ਆਇਆ ਹੈ ਕਿ ਇਹ ਵੈਕਸੀਨ ਦੋ ਵੇਰੀਐਂਟਸ ਆਫ ਕਨਸਰਨ (ਵੀਓਸੀ) ਖਿਲਾਫ ਕਾਫੀ ਪ੍ਰੋਟੈਕਸ਼ਨ ਮੁਹੱਈਆ ਕਰਵਾਉਂਦੀ ਹੈ। ਪਰ ਇੱਕ ਡੋਜ਼ ਇਨ੍ਹਾਂ ਮਿਊਟੇਸ਼ਨਜ਼ ਤੋਂ ਕੋਈ ਬਹੁਤਾ ਬਚਾਅ ਨਹੀਂ ਕਰਦੀ।
ਕਤਰ ਤੋਂ ਹਾਸਲ ਹੋਏ ਨਵੇਂ ਡਾਟਾ ਤੇ ਨਿਊ ਇੰਗਲੈਂਡ ਜਰਨਲ ਆਫ ਮੈਡੀਸਨ ਵਿੱਚ ਛਪੇ ਅਧਿਐਨ ਅਨੁਸਾਰ ਫਾਈਜ਼ਰ-ਬਾਇਓਐਨਟੈਕ ਵੈਕਸੀਨ (ਦੇ ਦੋ ਸ਼ੌਟਸ) ਯੂ·ਕੇ ਵਿੱਚ ਸੱਭ ਤੋਂ ਪਹਿਲਾਂ ਪਾਏ ਗਏ ਬੀ·1·1·7 ਵੇਰੀਐਂਟ ਕਾਰਨ ਹੋਣ ਵਾਲੀ ਇਨਫੈਕਸ਼ਨ ਨੂੰ ਰੋਕਣ ਲਈ 90 ਫੀ ਸਦੀ ਕਾਰਗਰ ਹੈ। ਬੀ·1·1·7 ਵੇਰੀਐਂਟ ਓਨਟਾਰੀਓ ਵਿੱਚ ਸੱਭ ਤੋਂ ਵੱਧ ਪਾਇਆ ਜਾਣ ਵਾਲਾ ਸਟ੍ਰੇਨ ਹੈ, ਬੁੱਧਵਾਰ ਤੱਕ ਹੀ ਇਸ ਦੇ 83,000 ਤੋਂ ਵੱਧ ਕੇਸ ਸਾਹਮਣੇ ਆ ਚੁੱਕੇ ਹਨ।
ਇਸ ਅਧਿਐਨ ਵਿੱਚ ਇਹ ਵੀ ਪਾਇਆ ਗਿਆ ਕਿ ਸਾਊਥ ਅਫਰੀਕਾ ਵਿੱਚ ਸੱਭ ਤੋਂ ਪਹਿਲਾਂ ਪਾਏ ਗਏ ਬੀ·1·351 ਵੇਰੀਐਂਟ ਖਿਲਾਫ ਇਹ ਵੈਕਸੀਨ 75 ਫੀ ਸਦੀ ਹੀ ਅਸਰ ਕਰਦੀ ਹੈ। ਇਸ ਸਟਰੇਨ ਦੇ ਪ੍ਰੋਵਿੰਸ ਵਿੱਚ 326 ਮਾਮਲੇ ਸਾਹਮਣੇ ਆ ਚੁੱਕੇ ਹਨ।ਇਸ ਅਧਿਐਨ ਤੋਂ ਇਹ ਗੱਲ ਤਾਂ ਸਪਸ਼ਟ ਹੋ ਗਈ ਹੈ ਕਿ ਇਸ ਵੈਕਸੀਨ ਦੀ ਪਹਿਲੀ ਡੋਜ਼ ਤੋਂ ਬਾਅਦ ਲੋਕਾਂ ਨੂੰ ਮਿਲਣ ਵਾਲੀ ਹਿਫਾਜ਼ਤ ਦਾ ਪੱਧਰ ਕਿੰਨਾ ਹੈ। ਇਸ ਦੀ ਇੱਕ ਡੋਜ਼ ਬੀ·1·1·7 ਵੇਰੀਐਂਟ ਖਿਲਾਫ 30 ਫੀ ਸਦੀ ਸੁਰੱਖਿਆ ਦਿੰਦੀ ਹੈ ਜਦਕਿ ਸਾਊਥ ਅਫਰੀਕਨ ਸਟ੍ਰੇਨ ਖਿਲਾਫ 17 ਫੀ ਸਦੀ ਸੁਰੱਖਿਆ ਮੁਹੱਈਆ ਕਰਵਾਉਂਦੀ ਹੈ।
ਓਨਟਾਰੀਓ ਸਰਕਾਰ ਇਹ ਸੰਕੇਤ ਵੀ ਦੇ ਚੁੱਕੀ ਹੈ ਕਿ ਜੇ ਇਸ ਤਰ੍ਹਾਂ ਹੀ ਵੈਕਸੀਨ ਦੀ ਸਪਲਾਈ ਜਾਰੀ ਰਹੀ ਤਾਂ ਉਹ ਵੈਕਸੀਨ ਦੀਆਂ ਦੋ ਡੋਜ਼ਾਂ ਵਿਚਲਾ ਫਰਕ ਘਟਾਉਣ ਬਾਰੇ ਸੋਚ ਸਕਦੇ ਹਨ।ਓਨਟਾਰੀਓ ਨੂੰ ਜੂਨ ਵਿੱਚ ਫਾਈਜ਼ਰ ਦੇ ਅੱਧਾ ਮਿਲੀਅਨ ਸ਼ੌਟਸ ਹਾਸਲ ਹੋਣ ਦੀ ਉਮੀਦ ਹੈ। ਹਾਲਾਂਕਿ ਤਾਜ਼ਾ ਸਟੱਡੀ ਵਿੱਚ ਇਹ ਵੀ ਪਾਇਆ ਗਿਆ ਹੈ ਕਿ ਫਾਈਜ਼ਰ ਵੈਕਸੀਨ ਵੇਰੀਐਂਟ ਦੇ ਖਿਲਾਫ ਘੱਟ ਸੁਰੱਖਿਆ ਦਿੰਦੀ ਹੈ ਪਰ ਕੋਵਿਡ-19 ਦੇ ਗੰਭੀਰ ਜਾਂ ਘਾਤਕ ਮਾਮਲਿਆਂ ਵਿੱਚ ਇਹ ਫਿਰ ਵੀ ਕਾਰਗਰ ਹੈ।