ਟੋਰਾਂਟੋ, 7 ਅਪਰੈਲ (ਪੋਸਟ ਬਿਊਰੋ) : ਇੱਕ ਮਾਂ, ਜਿਸ ਦਾ ਸਾਰਾ ਪਰਿਵਾਰ ਕੋਵਿਡ-19 ਕਾਰਨ ਬਿਮਾਰ ਪੈ ਗਿਆ, ਵੱਲੋਂ ਸਾਰੇ ਮਾਪਿਆਂ ਨੂੰ ਇਹ ਚੇਤਾਵਨੀ ਦਿੱਤੀ ਜਾ ਰਹੀ ਹੈ ਕਿ ਕੋਵਿਡ-19 ਦੇ ਲੱਛਣਾਂ ਤੋਂ ਨਿੱਕੇ ਬੱਚੇ ਵੀ ਮਹਿਫੂਜ਼ ਨਹੀਂ ਹਨ।
33 ਸਾਲਾ ਅਵੀਵਾ ਡੈਨੀਅਲ ਨੇ ਆਖਿਆ ਕਿ ਇਹ ਬਹੁਤ ਹੀ ਦਿਲ ਦਹਿਲਾ ਦੇਣ ਵਾਲਾ ਤਜ਼ਰਬਾ ਹੈ। ਖਾਸਤੌਰ ਉੱਤੇ ਉਨ੍ਹਾਂ ਮਾਪਿਆਂ ਲਈ ਜਿਨ੍ਹਾਂ ਦੇ ਬੱਚੇ ਨਿੱਕੇ ਹਨ।ਅਵੀਵਾ ਦੇ ਦੋ ਛੋਟੇ ਬੱਚਿਆਂ ਨੂੰ ਡੇਅਕੇਅਰ ਦੇ ਇਨਫੈਂਟ ਰੂਮ ਤੋਂ ਕੋਵਿਡ-19 ਦੇ ਸੰਪਰਕ ਵਿੱਚ ਆਉਣ ਕਾਰਨ ਕੁੱਝ ਦਿਨਾਂ ਵਿੱਚ ਹੀ ਲੱਛਣ ਨਜ਼ਰ ਆਉਣ ਲੱਗੇ। ਜਲਦ ਹੀ ਚਾਰ ਜੀਆਂ ਦਾ ਉਨ੍ਹਾਂ ਦਾ ਪਰਿਵਾਰ ਵੀ ਪਾਜ਼ੀਟਿਵ ਆ ਗਿਆ। ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਦੇ ਤਿੰਨ ਸਾਲਾ ਬੱਚੇ ਨੂੰ ਜ਼ੁਕਾਮ ਵਰਗੇ ਲੱਛਣ ਸਨ ਤੇ ਉਹ ਬਹੁਤ ਮਾਮੂਲੀ ਸਨ ਪਰ ਇੱਕ ਸਾਲ ਦੇ ਬੱਚੇ ਨੂੰ ਪੰਜ ਦਿਨ ਲਈ ਬੁਖਾਰ ਹੋਇਆ, ਉਸ ਦੇ ਦਿਲ ਦੀ ਧੜਕਨ ਵੀ ਤੇਜ਼ ਹੋਈ, ਬਲੱਡ ਪ੍ਰੈਸ਼ਰ ਘੱਟ ਰਿਹਾ ਤੇ ਉਸ ਨੂੰ ਰਹਿ ਰਹਿ ਕੇ ਤੇਂਜ਼ ਖੰਘ ਛਿੜਦੀ ਸੀ।ਬੱਚੇ ਦੀਆਂ ਉਂਗਲਾ ਵੀ ਨੀਲੀਆਂ ਪੈ ਗਈਆਂ।
ਉਸ ਨੂੰ ਹਾਸਪਿਟਲ ਫੌਰ ਸਿੱਕ ਚਿਲਡਰਨ ਲਿਜਾਇਆ ਗਿਆ ਜਿੱਥੇ ਉਸ ਨੂੰ ਤਿੰਨ ਦਿਨਾਂ ਲਈ ਦਾਖਲ ਰੱਖਿਆ ਗਿਆ। ਪ੍ਰੋਵਿੰਸ਼ੀਅਲ ਅੰਕੜਿਆਂ ਅਨੁਸਾਰ ਲਾਇਸੰਸਸ਼ੁਦਾ ਚਾਈਲਡ ਕੇਅਰ ਫੈਸਿਲਿਟੀਜ਼ ਵਿੱਚ ਕੋਵਿਡ-19 ਮਹਾਂਮਾਰੀ ਦੇ ਸ਼ੁਰੂ ਹੋਣ ਤੋਂ ਲੈ ਕੇ ਹੁਣ ਤੱਕ 2,222 ਕੇਸ ਪਾਏ ਗਏ ਹਨ। ਪਰ ਇਨ੍ਹਾਂ ਵਿੱਚੋਂ ਬਹੁਤ ਮਾਮਲੇ ਪਿਛਲੇ ਦੋ ਹਫਤਿਆਂ ਵਿੱਚ ਹੀ ਸਾਹਮਣੇ ਆਏ ਹਨ, 113 ਤਾਂ ਬੁੱਧਵਾਰ ਨੂੰ ਹੀ ਸਾਹਮਣੇ ਆਏ।ਹੁਣ ਇਸ ਪਰਿਵਾਰ ਨੂੰ ਹਸਪਤਾਲ ਤੋਂ ਛੁੱਟੀ ਦੇ ਦਿੱਤੀ ਗਈ ਹੈ ਤੇ ਉਹ ਘਰ ਵਿੱਚ ਹੀ ਜ਼ੇਰੇ ਇਲਾਜ ਹਨ। ਉਨ੍ਹਾਂ ਆਖਿਆ ਕਿ ਉਹ ਆਸ ਕਰਦੇ ਹਨ ਕਿ ਕਿਸੇ ਵੀ ਮਾਪਿਆਂ ਨੂੰ ਇਸ ਤਰ੍ਹਾ ਦੇ ਦਿਨ ਨਾ ਵੇਖਣੇ ਪੈਣ।