ਟੋਰਾਂਟੋ, 7 ਅਪਰੈਲ (ਪੋਸਟ ਬਿਊਰੋ) : ਓਨਟਾਰੀਓ ਵੱਲੋਂ ਕੋਵਿਡ-19 ਮਹਾਂਮਾਰੀ ਦੀ ਸ਼ੁਰੂਆਤ ਤੋਂ ਲੈ ਕੇ ਹੁਣ ਤੱਕ ਤੀਜੀ ਵਾਰੀ ਸਟੇਟ ਆਫ ਐਮਰਜੰਸੀ ਦਾ ਐਲਾਨ ਕੀਤਾ ਗਿਆ ਹੈ। ਵੀਰਵਾਰ ਤੋਂ ਪ੍ਰੋਵਿੰਸ ਭਰ ਵਿੱਚ ਸਟੇਅ ਐਟ ਹੋਮ ਆਰਡਰ ਲਾਗੂ ਕੀਤੇ ਜਾਣਗੇ।
ਕੈਬਨਿਟ ਨਾਲ ਕਈ ਘੰਟਿਆਂ ਤੱਕ ਕੀਤੀ ਗੱਲਬਾਤ ਤੋਂ ਬਾਅਦ ਪ੍ਰੀਮੀਅਰ ਡੱਗ ਫੋਰਡ ਨੇ ਬੁੱਧਵਾਰ ਨੂੰ ਇਹ ਐਲਾਨ ਕੀਤਾ। ਇਹ ਹੁਕਮ ਵੀਰਵਾਰ ਰਾਤੀਂ 12:01 ਵਜੇ ਲਾਗੂ ਹੋਣਗੇ ਤੇ ਅਗਲੇ 28 ਦਿਨਾਂ ਤੱਕ ਜਾਰੀ ਰਹਿਣਗੇ।ਫੋਰਡ ਨੇ ਦੁਪਹਿਰ ਸਮੇਂ ਕੀਤੀ ਨਿਊਂ ਕਾਨਫਰੰਸ ਵਿੱਚ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਆਖਿਆ ਕਿ ਹਾਲਾਤ ਇਸ ਸਮੇਂ ਕਾਫੀ ਗੰਭੀਰ ਹੋ ਗਏ ਹਨ ਤੇ ਚੀਜ਼ਾਂ ਨੂੰ ਹੋਰ ਨਹੀਂ ਖਿੱਚਿਆ ਜਾ ਸਕਦਾ। ਅਸੀਂ ਸਾਰੇ ਹੀ ਬਹੁਤ ਚਿੰਤਾ ਵਿੱਚ ਹਾਂ।
ਉਨ੍ਹਾਂ ਆਖਿਆ ਕਿ ਹਾਲਾਤ ਪਲ ਪਲ ਬਦਲ ਰਹੇ ਹਨ। ਜਿਵੇਂ ਹੀ ਸਾਨੂੰ ਨਵੇਂ ਵੇਰੀਐਂਟਸ ਬਾਰੇ ਪਤਾ ਲੱਗਦਾ ਹੈ ਓਨੇ ਚਿਰ ਨੂੰ ਨਵੀਆਂ ਦਿੱਕਤਾਂ ਜਨਮ ਲੈ ਲੈਂਦੀਆਂ ਹਨ। ਸਾਨੂੰ ਖੜ੍ਹੇ ਪੈਰ ਕਈ ਤਰ੍ਹਾਂ ਦੇ ਫੈਸਲੇ ਲੈਣੇ ਪੈਂਦੇ ਹਨ। ਇਸ ਸਮੇਂ ਅਸੀਂ ਚਾਹੁੰਦੇ ਹਾਂ ਕਿ ਸਾਰਿਆਂ ਦੀ ਵੈਕਸੀਨੇਸ਼ਨ ਜਲਦ ਤੋਂ ਜਲਦ ਹੋ ਜਾਵੇ। ਇਸੇ ਲਈ ਅਸੀਂ ਚੀਫ ਮੈਡੀਕਲ ਆਫੀਸਰ ਆਫ ਹੈਲਥ ਦੀ ਸਲਾਹ ਉੱਤੇ ਸਟੇਟ ਆਫ ਐਮਰਜੰਸੀ ਲਾਉਣ ਜਾ ਰਹੇ ਹਾਂ।
ਇਸ ਅਰਸੇ ਦੌਰਾਨ ਸਾਰੇ ਗੈਰ ਜ਼ਰੂਰੀ ਰੀਟੇਲਰਜ਼ ਇਨ ਪਰਸਨ ਸ਼ਾਪਿੰਗ ਲਈ ਬੰਦ ਰਹਿਣਗੇ, ਇਨ ਪਰਸਨ ਡਾਈਨਿੰਗ ਦੀ ਮਨਾਹੀ ਹੋਵੇਗੀ ਤੇ ਜਿੰਮ ਤੇ ਪਰਸਨਲ ਕੇਅਰ ਸਰਵਿਸਿਜ਼ ਵੀ ਬੰਦ ਰਹਿਣਗੀਆਂ। ਬਿੱਗ ਬਾਕਸ ਸਟੋਰ ਸਿਰਫ ਜ਼ਰੂਰੀ ਵਸਤਾਂ ਵੇਚਣ ਲਈ ਹੀ ਖੁੱਲ੍ਹੇ ਰਹਿਣਗੇ। ਸ਼ਾਪਿੰਗ ਮਾਲਜ਼ ਅਪੁਆਇੰਟਮੈਂਟ ਤੇ ਡਲਿਵਰੀ ਰਾਹੀਂ ਕਰਬਸਾਈਡ ਪਿੱਕਅੱਪ ਤੱਕ ਸੀਮਤ ਰਹਿਣਗੇ।ਕੁੱਝ ਚੁਣਿੰਦਾ ਸਟੋਰਜ਼ 25 ਫੀ ਸਦੀ ਸਮਰੱਥਾ ਨਾਲ ਅਪੁਆਇੰਟਮੈਂਟ ਜ਼ਰੀਏ ਹੀ ਖੁੱਲ੍ਹੇ ਰਹਿਣਗੇ।