ਮਿਸੀਸਾਗਾ, 6 ਅਪਰੈਲ (ਪੋਸਟ ਬਿਊਰੋ) : ਮਿਸੀਸਾਗਾ ਵਿਚਲੇ ਡਰਾਈਵਰ ਜੀਟੀਏ ਦੇ ਉਨ੍ਹਾਂ ਚੰਦ ਡਰਾਈਵਰਾਂ ਵਿੱਚੋਂ ਸਨ ਜਿਨ੍ਹਾਂ ਨੂੰ ਹੁਣ ਤੱਕ ਤੇਜ਼ ਰਫਤਾਰ ਨਾਲ ਗੱਡੀ ਚਲਾਉਣ ਉੱਤੇ ਜੁਰਮਾਨਾ ਨਹੀਂ ਸੀ ਭਰਨਾ ਪੈਂਦਾ ਜਾਂ ਉਹ ਜੁਰਮਾਨਿਆਂ ਤੋਂ ਹੁਣ ਤੱਕ ਬਚਦੇ ਰਹੇ ਸਨ ਪਰ ਹੁਣ ਇਹ ਸੱਭ ਖਤਮ ਹੋਣ ਜਾ ਰਿਹਾ ਹੈ।
ਮਿਸੀਸਾਗਾ ਵਿੱਚ ਥਾਂ ਥਾਂ ਉੱਤੇ ਹੁਣ ਅਜਿਹੇ ਸਾਈਨ ਬੋਰਡ ਲਾਏ ਜਾ ਰਹੇ ਹਨ ਜਿਨ੍ਹਾਂ ਉੱਤੇ ਇਹ ਜਾਣਕਾਰੀ ਦਰਜ ਹੈ ਕਿ ਆਉਣ ਵਾਲੇ ਮਹੀਨਿਆਂ ਵਿੱਚ ਕੈਮਰੇ ਲਾਏ ਜਾਣਗੇ, ਜਿਹੜੇ ਅੱਖ ਦੇ ਫੋਰ ਵਿੱਚ ਹੀ ਤੇਜ਼ ਰਫਤਾਰ ਨਾਲ ਚਲਾਈਆਂ ਜਾਣ ਵਾਲੀਆਂ ਗੱਡੀਆਂ ਦੀਆਂ ਤਸਵੀਰਾਂ ਲੈ ਲੈਣਗੇ। ਅਜਿਹੇ ਬੋਰਡ ਲਾਂਕੈਸਟਰ ਤੇ ਨੈਦਰਵੁੱਡ ਤੇ ਸਾਅਮਿੱਲ ਵੈਲੀ ਡਰਾਈਵ ਵਿੱਚ ਫੋਕਵੇਅ ਤੇ ਗ੍ਰੌਸਵੈਨਰ ਦਰਮਿਆਨ ਲਾਏ ਜਾ ਰਹੇ ਹਨ।
ਵਾਰਡ ਨੂੰ 9 ਦੇ ਕਾਊਂਸਲਰ ਤੇ ਰੋਡ ਸੇਫਟੀ ਕਮੇਟੀ ਦੇ ਚੇਅਰ ਪੈਟ ਸੈਤੀਓ ਨੇ ਦੱਸਿਆ ਕਿ ਅਸੀਂ ਜਾਣਦੇ ਹਾਂ ਕਿ ਤੇਜ਼ ਰਫਤਾਰੀ ਗੰਭੀਰ ਸਮੱਸਿਆ ਹੈ ਤੇ ਲੋਕਾਂ ਨੂੰ ਹੌਲੀ ਗੱਡੀ ਚਲਾਉਣ ਲਈ ਸਮਝਾਉਣ ਵਾਸਤੇ ਸਾਨੂੰ ਸਖ਼ਤ ਕਾਰਵਾਈ ਕਰਨ ਦੀ ਲੋੜ ਹੈ। ਸਾਡੇ ਬਸਿੰ਼ਦੇ ਵੀ ਸੁਰੱਖਿਅਤ ਸਟਰੀਟਸ ਦੇ ਹੱਕਦਾਰ ਹਨ ਤੇ ਏਐਸਈ ਅਜਿਹਾ ਹੀ ਸੰਦ ਹੈ ਜਿਸ ਦੀ ਵਰਤੋਂ ਨਾਲ ਅਸੀਂ ਸਹੀ ਦਿਸ਼ਾ ਵੱਲ ਕਦਮ ਚੁੱਕ ਸਕਾਂਗੇ। ਅਸੀਂ ਸਿਰਫ ਲੋਕਾਂ ਨੂੰ ਟਿਕਟਾਂ ਹੀ ਜਾਰੀ ਨਹੀਂ ਕਰਦੇ ਰਹਿ ਸਕਦੇ ਸਗੋਂ ਸਾਡਾ ਇਰਾਦਾ ਲੋਕਾਂ ਦਾ ਵਿਵਹਾਰ ਬਦਲਣ ਦਾ ਹੈ।