ਜਕਾਰਤਾ, 5 ਅਪ੍ਰੈਲ (ਪੋਸਟ ਬਿਊਰੋ)- ਇੰਡੋਨੇਸ਼ੀਆਂ ਦੇ ਪੂਰਬੀ ਹਿੱਸੇ ਵਿੱਚ ਭਾਰੀ ਮੀਂਹ ਨਾਲ ਆਏ ਹੜ੍ਹ ਅਤੇ ਢਿੱਗਾਂ ਡਿੱਗਣ ਨਾਲ ਘੱਟੋ ਘੱਟ 44 ਵਿਅਕਤੀਆਂ ਦੇ ਮਰਨ ਅਤੇ ਹਜ਼ਾਰਾਂ ਵਿਅਕਤੀ ਘਰੋਂ ਬੇਘਰ ਹੋਣ ਦੀ ਖਬਰ ਹੈ।
ਕੌਮੀ ਆਫਤ ਕੰਟਰੋਲ ਏਜੰਸੀ ਦੇ ਬੁਲਾਰੇ ਨੇ ਕੱਲ੍ਹ ਦੱਸਿਆ ਕਿ ਪੂਰਬੀ ਨੂਸਾ ਤੇਰੰਗਰਾ ਸੂਬੇ ਦੇ ਫਲੋਰੈਂਸ ਟਾਪੂ ਦੇ ਲਮੇਨਲੇ ਪਿੰਡ ਨੇੜੇ 50 ਘਰਾਂ ਉੱਤੇ ਅੱਧੀ ਰਾਤ ਵੇਲੇ ਪਹਾੜਾਂ ਤੋਂ ਮਿੱਟੀ ਦੇ ਵੱਡੇ ਢੇਰ ਡਿੱਗਣੇ ਸ਼ੁਰੂ ਹੋ ਗਏ। ਬਚਾਅ ਟੋਲੀਆਂ ਨੇ 20 ਲਾਸ਼ਾਂ ਅਤੇ 9 ਜ਼ਖ਼ਮੀਆਂ ਨੂੰ ਮਲਬੇ ਵਿੱਚੋਂ ਕੱਢਿਆ ਹੈ। ਏਦਾਂ ਹੀ ਓਯਾਂਗ-ਬਯਾਂਗ ਪਿੰਡ ਵਿੱਚ ਹੜ੍ਹ ਦੇ ਪਾਣੀ ਵਿੱਚ ਰੁੜ੍ਹ ਗਏ ਤਿੰਨ ਵਿਅਕਤੀਆਂ ਦੀਆਂ ਲਾਸ਼ਾਂ ਮਿਲੀਆਂ ਹਨ। ਬੈਬੂਰਾਕ ਨਾਂ ਦੇ ਪਿੰਡ ਵਿੱਚ ਕੱਲ੍ਹ ਸਵੇਰੇ ਭਾਰੀ ਮੀਂਹ ਪੈਣ ਪਿੱਛੋਂ ਆਏ ਹੜ੍ਹ ਵਿੱਚ ਚਾਰ ਜਣੇ ਰੁੜ੍ਹ ਗਏ। ਦੋ ਹੋਰ ਜਣਟ ਲਾਪਤਾ ਦੱਸੇ ਜਾਂਦੇ ਹਨ। ਹੜ੍ਹ ਦਾ ਪਾਣੀ ਪੂਰਬੀ ਫਲੋਰੈਂਸ ਜ਼ਿਲ੍ਹੇ ਦੇ ਵੱਡੇ ਹਿੱਸੇ ਵਿੱਚਆ ਗਿਆ, ਜਿਸ ਕਾਰਨ ਸੈਂਕੜੇ ਮਕਾਨ ਡੁੱਬ ਗਏ। ਕੁਝ ਘਰਾਂ ਦੀਆਂ ਨੀਂਹਾਂ ਵੀ ਹਿਲ ਗਈਆਂ ਤੇ ਮਕਾਨ ਡਿੱਗ ਪਏ। ਸੈਂਕੜੇ ਲੋਕ ਬਚਾਅ ਤੇ ਰਾਹਤ ਕਾਰਜਾਂ ਵਿੱਚ ਲੱਗੇ ਪਰ ਬਿਜਲੀ ਬੰਦ ਹੋਣ, ਸੜਕਾਂ ਦੇ ਟੁੱਟਣ ਅਤੇ ਰਾਹਤ ਕਾਰਜ ਸਮੇਂ ਸਿਰ ਨਾ ਪਹੁੰਚ ਸਕਣ ਕਾਰਨ ਭਾਰੀ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪਿਆ।