ਅੰਮ੍ਰਿਤਸਰ, 9 ਦਸੰਬਰ (ਪੋਸਟ ਬਿਊਰੋ)- ਇਲਾਜ ਵਿੱਚ ਲਾਪਰਵਾਹੀ ਵਰਤਣ 'ਤੇ ਸਾਲ 2017 ਵਿੱਚ ਸੰਤੋਸ਼ ਕੁਮਾਰੀ ਦੀ ਹੋਈ ਮੌਤ ਲਈ ਪੰਜਾਬ ਰਾਜ ਖਪਤਕਾਰ ਅਦਾਲਤ ਨੇ ਉਨ੍ਹਾਂ ਦੇ ਵਾਰਸਾਂ ਨੂੰ 20 ਲੱਖ ਮੁਆਵਜ਼ਾ ਦਿਵਾਉਣ ਦਾ ਹੁਕਮ ਅੰਮ੍ਰਿਤਸਰ ਦੇ ਫੋਰਟਿਸ ਐਸਕਾਰਟ ਹਸਪਤਾਲ ਨੂੰ ਦਿੱਤਾ ਹੈ।
ਕਮਿਸ਼ਨ ਦੇ ਚੇਅਰਮੈਨ ਜੇ ਐੱਸ ਕਲੇਰ ਅਤੇ ਸੀਨੀਅਰ ਮੈਂਬਰ ਕਿਰਨ ਸਿੱਬਲ ਦੀ ਅਦਾਲਤ ਨੇ ਤਿੰਨ ਦਸੰਬਰ ਨੂੰ ਸੁਣਾਏ ਫੈਸਲੇ ਹੇਠ ਮੁਆਵਜ਼ੇ ਲਈ 15 ਲੱਖ ਰੁਪਏ ਹਸਪਤਾਲ ਮੈਨੇਜਮੈਂਟ ਅਤੇ ਪੰਜ ਲੱਖ ਰੁਪਏ ਡਾਕਟਰ ਰਵਿੰਦਰ ਸਿੰਘ ਮਲਹੋਤਰਾ ਨੂੰ ਦੇਣ ਦਾ ਹੁਕਮ ਦਿੱਤਾ ਹੈ। ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਦੇ ਸੀਨੀਅਰ ਵਕੀਲ ਕੁੰਵਰ ਪਾਹੁਲ ਸਿੰਘ ਨੇ ਦੱਸਿਆ ਕਿ ਸੰਤੋਸ਼ ਕੁਮਾਰੀ ਦੇ ਬੇਟਿਆਂ ਸੰਜੀਵ ਕੁਮਾਰ, ਰਾਜਿੰਦਰ ਕੁਮਾਰ ਵੱਲੋਂ ਦਾਇਰ ਕੇਸ ਵਿੱਚ ਅਦਾਲਤ ਨੇ ਇਲਾਜ ਵਿੱਚ ਲਾਪਰਵਾਹੀ ਲਈ ਹਸਪਤਾਲ ਪ੍ਰਬੰਧਕਾਂ ਨੂੰ ਦੋਸ਼ੀ ਪਾਇਆ। ਮੋਟਾਪੇ ਦੀ ਸ਼ਿਕਾਰ ਤੇ ਹਰਨੀਆ ਤੋਂ ਪੀੜਤ ਸੰਤੋਸ਼ ਕੁਮਾਰੀ ਨੂੰ ਹਸਪਤਾਲ ਨੇ ਬੇਰੀਐਟਿ੍ਰਕ ਸਰਜਰੀ ਸੰਬੰਧੀ ਦੋ ਲੱਖ 65 ਹਜ਼ਾਰ ਰੁਪਏ ਦਾ ਪੈਕੇਜ ਦਿੱਤਾ ਸੀ। ਉਸ ਨੂੰ ਫਿੱਟ ਦੱਸਣ ਪਿੱਛੋਂ 11 ਮਈ 2017 ਨੂੰ ਆਪਰੇਸ਼ਨ ਕਰਾਉਣ ਦੀ ਹਦਾਇਤ ਦਿੱਤੀ ਗਈ। 11 ਮਈ ਨੂੰ ਆਪਰੇਸ਼ਨ ਕਰਾਉਣ ਪਹੁੰਚੀ ਸੰਤੋਸ਼ ਨੂੰ ਹਰਨੀਆ ਤੇ ਹੋਰ ਬਿਮਾਰੀਆਂ ਹੋਣ ਦੇ ਬਾਵਜੂਦ ਆਪਰੇਸ਼ਨਾਂ ਦਾ ਸਿਲਸਿਲਾ ਸ਼ੁਰੂ ਕਰ ਦਿੱਤਾ ਗਿਆ ਸੀ। ਹਸਪਤਾਲ ਵੱਲੋਂ 11 ਮਈ ਨੂੰ ਮਿੰਨੀ ਗੈਸਟਿ੍ਰਕ ਬਾਈਪਾਸ ਸਰਜਰੀ ਕਰ ਦਿੱਤੀ ਗਈ। ਸਰਜਰੀ ਦੇ ਬਾਅਦ ਸੰਤੋਸ਼ ਦੀ ਸਿਹਤ ਵਿਗੜਦੀ ਗਈ। ਡਾਕਟਰਾਂ ਨੇ ਉਨ੍ਹਾਂ ਨੂੰ ਜਲਦ ਹੀ ਸਿਹਤਮੰਦ ਹੋਣ ਦਾ ਦਿਲਾਸਾ ਦਿੰਦੇ ਹੋਏ ਵੱਖ ਵੱਖ ਟੈਸਟ ਅਤੇ ਸਰਜਰੀਆਂ ਕਰਨਾ ਜਾਰੀ ਰੱਖਿਆ। ਆਖਰ 12 ਜੁਲਾਈ 2017 ਨੂੰ ਸੰਤੋਸ਼ ਦੀ ਮੌਤ ਹੋ ਗਈ ਸੀ।