ਮਨੀਲਾ, 4 ਅਪ੍ਰੈਲ (ਪੋਸਟ ਬਿਊਰੋ)- ਫਿਲਪੀਨਜ਼ ਦੇ ਵਸਨੀਕ ਕੇਂਟ ਰਿਆਨ ਟੋਮਾਓ ਪਿਛਲੇ ਦਿਨੀਂ ਡਾਕਟਰ ਦੇ ਕੋਲ ਚੈਕਅਪ ਕਰਾਉਣ ਗਏ ਤਾਂ ਸੁਣ ਕੇ ਹੈਰਾਨ ਰਹਿ ਗਏ ਕਿ ਉਨ੍ਹਾਂ ਦੀ ਛਾਤੀ ਵਿੱਚ ਚਾਰ ਇੰਚ ਲੰਬਾ ਚਾਕੂ ਹੈ।
25 ਸਾਲ ਦੇ ਰਿਆਨ ਇੱਕ ਮਾਈਨਿੰਗ ਪ੍ਰੋਜੈਕਟ ਲਈ ਐਕਸਰੇ ਕਰਾਉਣ ਹਸਪਤਾਲ ਗਏ ਸਨ। ਸਰਦੀਆਂ ਵਿੱਚ ਕਦੇ-ਕਦੇ ਉਨ੍ਹਾਂ ਨੂੰ ਛਾਤੀ ਵਿੱਚ ਦਰਦ ਹੁੰਦਾ ਸੀ, ਪਰ ਉਨ੍ਹਾਂ ਨੇ ਇਸ ਬਾਰੇ ਕਦੇ ਜ਼ਿਆਦਾ ਧਿਆਨ ਨਹੀਂ ਦਿੱਤਾ। ਰਿਆਨ ਨੇ ਕਿਹਾ, ਮੈਂ ਨਹੀਂ ਜਾਣਦਾ ਕਿ ਇਹ ਚਾਕੂ ਕਿਵੇਂ ਆਇਆ, ਪਰ ਪਿਛਲੇ ਸਾਲ ਜੂਨ ਵਿੱਚ ਕੁਝ ਲੋਕਾਂ ਨੇ ਮੇਰੇ 'ਤੇ ਹਮਲਾ ਕੀਤਾ ਸੀ। ਮੈਨੂੰ ਇਸ ਬਾਰੇ ਜ਼ਿਆਦਾ ਯਾਦ ਨਹੀਂ, ਪਰ ਇੰਨਾ ਪਤਾ ਹੈ ਕਿ ਹਮਲੇ ਪਿੱਛੋਂ ਮੈਨੂੰ ਹਸਪਤਾਲ ਲਿਜਾਇਆ ਗਿਆ ਸੀ। ਮੈਂ ਸੁਫਨੇ ਵਿੱਚ ਵੀ ਨਹੀਂ ਸੋਚ ਸਕਦਾ ਸਾਂ ਕਿ ਇਲਾਜ ਦੌਰਾਨ ਚਾਕੂ ਮੇਰੇ ਸਰੀਰ ਵਿੱਚ ਰਹਿ ਗਿਆ ਹੋਵੇਗਾ। ਮੇਰਾ ਉਨ੍ਹਾਂ ਡਾਕਟਰਾਂ 'ਤੇ ਕੇਸ ਕਰਨ ਦਾ ਕੋਈ ਇਰਾਦਾ ਨਹੀਂ, ਮੈਂ ਜਲਦੀ ਇਹ ਚਾਕੂ ਕਢਵਾਉਣਾ ਚਾਹੁੰਦਾ ਹਾਂ।