ਹਾਂਗਕਾਂਗ, 4 ਅਪ੍ਰੈਲ (ਪੋਸਟ ਬਿਊਰੋ)- ਹਾਂਗਕਾਂਗ ਦੇ ਮੀਂ-ਫੂ ਇਲਾਕੇ ਵਿੱਚ ਮੱਛੀ ਮਾਰਕੀਟ ਵਿੱਚ ਮਛੇਰਿਆਂ ਨੇ ਵੀਹ ਕਿਲੋ ਵਜ਼ਨੀ ਕਰੀਬ 15 ਫੁੱਟ ਲੰਬੀ ਦਿਓ ਕੱਦ ਮੱਛੀ ਫੜ ਕੇ ਲਿਆਂਦੀ ਹੈ।
ਜਾਣਕਾਰਾਂ ਮੁਤਾਬਕ ਇਹ ਮੌਰੇਅ ਈਲ ਨਸਲ ਦੀ ਮੱਛੀ ਹੈ, ਜੋ ਆਮ ਨਾਲੋਂ ਕਰੀਬ ਅੱਠ ਗੁਣਾ ਵੱਧ ਵੱਡੀ ਹੈ। ਦੁਕਾਨਦਾਰਾਂ ਵੱਲੋਂ ਇਸ ਮੱਛੀ ਦਾ ਮੀਟ 100 ਡਾਲਰ ਦੀ ਕਾਟੀ (ਕਰੀਬ 600 ਗਰਾਮ) ਵੇਚਿਆ ਗਿਆ। ਦੁਕਾਨਦਾਰਾਂ ਵੱਲੋਂ ਮੱਛੀ ਦੀ ਫੋਟੋ ਸੋਸ਼ਲ ਮੀਡੀਆ ਉੱਤੇ ਸਾਂਝੀ ਕਰਨ ਪਿੱਛੋਂ ਹਾਂਗਕਾਂਗ ਭਰ ਵਿੱਚ ਇਸ ਦੀ ਚਰਚਾ ਛਿੜ ਪਈ। ਕੁਝ ਲੋਕਾਂ ਨੇ ਇਸ ਨੂੰ ਡਰੈਗਨ ਰੂਪੀ ਸਮਝ ਕੇ ਈਸਟਰ ਦੀਆਂ ਛੁੱਟੀਆਂ ਦੇ ਸ਼ੁਰੂ ਵਿੱਚ ਮਿਲਣਾ ਵਰਦਾਨ ਦੱਸਿਆ ਤੇ ਕੁਝਨੇ ਪੁਰਾਤਨ ਮਿੱਥਾਂ ਨਾਲ ਜੋੜ ਕੇ ਇਸ ਨੂੰ ਸਮੁੰਦਰੀ ਪ੍ਰੇਤ ਆਤਮਾਵਾਂ ਦੀ ਕਰੋਪੀ ਦੱਸਦਿਆਂ ਹਾਂਗਕਾਂਗ ਵਿੱਚ ਇਸ ਨੂੰ ਗਰਮੀ ਵਿੱਚ ਆਉਣ ਵਾਲੇ ਤੇਜ਼ ਤੂਫਾਨਾਂ ਦੀ ਭਵਿੱਖ ਬਾਣੀ ਦੇ ਅਗਾਊਂ ਸੰਕੇਤ ਵਜੋਂ ਮੰਨਿਆ ਹੈ।