ਇਸਲਾਮਾਬਾਦ, 4 ਅਪ੍ਰੈਲ (ਪੋਸਟ ਬਿਊਰੋ)- ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਆਪਣੀਆਂ ਭਾਰਤ ਵਿਰੋਧੀ ਹਰਕਤਾਂ ਨਹੀਂ ਛੱਡ ਰਹੇ। ਪਹਿਲਾਂ ਸ਼ਾਂਤੀ ਦਾ ਪੈਗਾਮ ਭੇਜਿਆ ਤੇ ਫਿਰ ਪਲਟੀ ਮਾਰ ਲਈ। ਅੱਗੋਂ ਵਪਾਰ ਦੇ ਮੁੱਦੇ 'ਤੇ ਖੁਦ ਹੀ ਇੰਪੋਰਟ ਕਰਨ ਦਾ ਫੈਸਲਾ ਲੈ ਕੇ ਯੂ ਟਰਨ ਮਾਰ ਲਿਆ ਹੈ।
ਆਪਣੇ ਮੰਤਰੀ ਮੰਡਲ ਦੇ ਖਾਸ ਸਲਾਹਕਾਰਾਂ ਨਾਲ ਗੱਲ ਕਰਨ ਪਿੱਛੋਂ ਕੱਲ੍ਹ ਇਮਰਾਨ ਖਾਨ ਨੇ ਕਿਹਾ ਕਿ ਮੌਜੂਦਾ ਹਾਲਾਤ ਵਿੱਚ ਭਾਰਤ ਨਾਲ ਵਪਾਰ ਕਰਨਾ ਸੰਭਵ ਨਹੀਂ। ਉਨ੍ਹਾਂ ਇਸ ਬਾਰੇ ਕੈਬਨਿਟ ਬੈਠਕ ਤੋਂ ਬਾਅਦ ਵਣਜ ਮੰਤਰਾਲੇ ਅਤੇ ਆਰਥਿਕ ਸਲਾਹਕਾਰਾਂ ਦੀ ਟੀਮ ਨੂੰ ਕਿਹਾ ਕਿ ਉਹ ਭਾਰਤ ਤੋਂ ਖੰਡਅਤੇ ਕਪਾਹ ਦੀ ਇੰਪੋਰਟ ਬਾਰੇ ਸੋਚਣਾ ਬੰਦ ਕਰ ਦੇਣ ਅਤੇ ਸਬੰਧਤ ਸਾਰੇ ਸੈਕਟਰਾਂ ਲਈ ਸਸਤਾ ਕੱਚਾ ਮਾਲ ਹੋਰ ਦੇਸ਼ਾਂ ਤੋਂ ਮੰਗਾਉਣ ਦੇ ਬਦਲ ਲੱਭਣ।
ਵਰਨਣ ਯੋਗ ਹੈ ਕਿ ਪਹਿਲਾਂ ਆਰਥਿਕ ਤਾਲਮੇਲ (ਈ ਸੀ ਸੀ) ਕਮੇਟੀ ਨੇ ਵਿਸ਼ਵ ਬਾਜ਼ਾਰ ਦਾ ਅਧਿਐਨ ਕਰਨ ਦੇ ਬਾਅਦ ਇੱਕ ਪ੍ਰੈਜ਼ੈਂਟੇਸ਼ਨ ਕੈਬਨਿਟ ਨੂੰ ਦਿੱਤਾ ਸੀ, ਜਿਸ ਵਿੱਚ ਕੱਚੇ ਮਾਲ ਲਈ ਭਾਰਤ ਨੂੰ ਸਭ ਤੋਂ ਵਧੀਆ ਤੇ ਸਸਤਾ ਬਦਲ ਦੱਸਿਆ ਸੀ। ਪ੍ਰੈਜੈਂਟੇਸ਼ਨ ਦੇਖਣ ਪਿੱਛੋਂ ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਅਤੇ ਉਨ੍ਹਾਂ ਦੇ ਮੰਤਰੀ ਮੰਡਲ ਨੇ ਭਾਰਤ ਤੋਂ ਖੰਡ ਤੇ ਕਪਾਹ ਦੀ ਇੰਪੋਰਟ ਦੀ ਇਜਾਜ਼ਤ ਦਿੱਤੀ ਸੀ। 24 ਘੰਟਿਆਂ ਦੇ ਬਾਅਦ ਇਮਰਾਨ ਨੇ ਕਸ਼ਮੀਰ ਵਿੱਚ ਧਾਰਾ 370 ਹਟਾਉਣ ਦਾ ਰਾਗ ਅਲਾਪਦੇ ਹੋਏ ਖੁਦ ਇਸ ਫੈਸਲੇ ਤੋਂ ਯੂ-ਟਰਨ ਲੈ ਲਿਆ ਸੀ। ਪਾਕਿਸਤਾਨ ਦੇ ਟੈਕਸਟਾਈਲ ਸੈਕਟਰ ਨੂੰਇਸ ਐਲਾਨ ਤੋਂ ਬਾਅਦ ਖਾਸੀ ਮੁਸੀਬਤ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।