ਓਟਵਾ, 4 ਅਪਰੈਲ (ਪੋਸਟ ਬਿਊਰੋ) : ਕੈਨੇਡਾ ਦੀ ਚੀਫ ਪਬਲਿਕ ਹੈਲਥ ਆਫੀਸਰ ਡਾ· ਥੈਰੇਸਾ ਟੈਮ ਵੱਲੋਂ ਅਜੇ ਵੀ ਸਾਰਿਆਂ ਨੂੰ ਅਹਿਤਿਆਤ ਤੋਂ ਕੰਮ ਲੈਣ ਦੀ ਅਪੀਲ ਕੀਤੀ ਜਾ ਰਹੀ ਹੈ। ਕੋਵਿਡ-19 ਦੇ ਹੋਰ ਵੇਰੀਐਂਟਸ ਸਾਹਮਣੇ ਆਉਣ ਤੇ ਉਨ੍ਹਾਂ ਦੇ ਤੇਜ਼ੀ ਨਾਲ ਫੈਲਣ ਦੇ ਸਬੰਧ ਵਿੱਚ ਟੈਮ ਵੱਲੋਂ ਇਹ ਚੇਤਾਵਨੀ ਦਿੱਤੀ ਗਈ ਹੈ। ਅਜਿਹਾ ਦੂਜੀ ਵਾਰੀ ਹੋਇਆ ਹੈ ਕਿ ਮਹਾਂਮਾਰੀ ਨੇ ਈਸਟਰ ਦੇ ਜਸ਼ਨਾਂ ਵਿੱਚ ਵਿਘਣ ਪਾਇਆ ਹੋਵੇ।
ਟੈਮ ਨੇ ਟਵਿੱਟਰ ਉੱਤੇ ਸਾਰਿਆਂ ਨੂੰ ਆਗਾਹ ਕਰਦਿਆਂ ਆਖਿਆ ਕਿ ਹੁਣ ਸਾਨੂੰ ਹੋਰ ਸਾਵਧਾਨ ਰਹਿਣ ਦੀ ਲੋੜ ਹੈ ਤੇ ਸਾਨੂੰ ਅਵੇਸਲੇ ਨਹੀਂ ਹੋਣਾ ਚਾਹੀਦਾ।ਜਿ਼ਕਰਯੋਗ ਹੈ ਕਿ ਤੀਜੀ ਵੇਵ ਨਾਲ ਜੂਝ ਰਹੇ ਕਿਊਬਿਕ ਨੇ ਐਲਾਨ ਕੀਤਾ ਹੈ ਕਿ ਉਹ ਕਿਊਬਿਕ ਸਿਟੀ ਤੇ ਗੈਟਿਨਿਊ ਤੋਂ ਇਲਾਵਾ ਹੋਰ ਥਾਂਵਾਂ ਵਿੱਚ ਵੀ ਮੁੜ ਲਾਕਡਾਊਨ ਲਾਵੇਗਾ। ਪ੍ਰੋਵਿੰਸ ਨੇ ਆਖਿਆ ਕਿ ਛੌਡੀਐ-ਐਪਲੈਸ਼ ਰੀਜਨ ਵਿੱਚ ਗੈਰ ਜ਼ਰੂਰੀ ਕਾਰੋਬਾਰਾਂ ਨੂੰ ਬੰਦ ਕੀਤਾ ਜਾਵੇਗਾ ਤੇ ਸੋਮਵਾਰ ਸ਼ਾਮ ਤੋਂ 8:00 ਵਜੇ ਕਰਫਿਊ ਲਾਇਆ ਜਾਵੇਗਾ ਤੇ ਇਹ ਪ੍ਰਬੰਧ ਘੱਟੋ-ਘੱਟ 12 ਅਪਰੈਲ ਤੱਕ ਚੱਲਣਗੇ।
ਐਤਵਾਰ ਨੂੰ ਕਿਊਬਿਕ ਵਿੱਚ ਕੋਵਿਡ-19 ਦੇ 1154 ਨਵੇਂ ਮਾਮਲੇ ਸਾਹਮਣੇ ਆਏ। ਇਸ ਦੌਰਾਨ ਓਨਟਾਰੀਓ ਨੇ ਐਲਾਨ ਕੀਤਾ ਕਿ ਉਨ੍ਹਾਂ ਦੀ ਏਅਰ ਐਂਬੂਲੈਂਸ ਸਰਵਿਸ ਦੇ ਮੁਖੀ ਵੱਲੋਂ ਪ੍ਰੋਵਿੰਸ ਵਿੱਚ ਵੈਕਸੀਨ ਦੀ ਵੰਡ ਦੇ ਪ੍ਰੋਗਰਾਮ ਦੀ ਅਗਵਾਈ ਕੀਤੀ ਜਾਵੇਗੀ।ਡਾ· ਹੋਮਰ ਟੀਏਨ ਰਿਟਾਇਰਡ ਜਨਰਲ ਰਿੱਕ ਹਿਲੀਅਰ ਦੀ ਥਾਂ ਲੈਣਗੇ। ਪ੍ਰੋਵਿੰਸ ਨੇ ਦੱਸਿਆ ਕਿ ਹਿਲੀਅਰ 31 ਮਾਰਚ ਨੂੰ ਐਕਸਪਾਇਰ ਹੋਏ ਉਨ੍ਹਾਂ ਦੇ ਕਾਂਟਰੈਕਟ ਨੂੰ ਅੱਗੇ ਨਹੀਂ ਸਨ ਵਧਾਉਣਾ ਚਾਹੁੰਦੇ।
ਇਸ ਦੌਰਾਨ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਇੱਕ ਵੀਡੀਓ ਮੈਸੇਜ ਵਿੱਚ ਸਵੀਕਾਰ ਕੀਤਾ ਕਿ ਕੋਵਿਡ-19 ਕਾਰਨ ਲਗਾਤਾਰ ਦੂਸਰੇ ਸਾਲ ਕੈਨੇਡੀਅਨਾਂ ਨੂੰ ਈਸਟਰ ਨੂੰ ਵੱਖਰੇ ਢੰਗ ਨਾਲ ਮਨਾਉਣ ਲਈ ਮਜਬੂਰ ਹੋਣਾ ਪਿਆ ਹੈ। ਬਹੁਤ ਸਾਰੇ ਕੈਨੇਡੀਅਨ ਨਿਜੀ ਤੌਰ ਉੱਤੇ ਨਾ ਤਾਂ ਚਰਚ ਜਾ ਸਕੇ ਤੇ ਨਾ ਹੀ ਪਰਿਵਾਰਕ ਡਿਨਰ ਹੀ ਕਰ ਸਕੇ। ਇਸ ਦੇ ਬਾਵਜੂਦ ਟਰੂਡੋ ਨੇ ਕੈਨੇਡੀਅਨਾਂ ਨੂੰ ਸਕਾਰਾਤਮਕ ਰਹਿਣ ਦੀ ਅਪੀਲ ਕੀਤੀ। ਉਨ੍ਹਾਂ ਆਖਿਆ ਕਿ ਕੋਵਿਡ-19 ਖਿਲਾਫ ਲੜਾਈ ਹੁਣ ਅੰਤਮ ਪੜਾਅ ਵਿੱਚ ਹੈ ਤੇ ਜਲਦ ਹੀ ਇਹ ਸੰਕਟ ਖਤਮ ਹੋ ਜਾਵੇਗਾ।