ਓਨਟਾਰੀਓ, 4 ਅਪਰੈਲ (ਪੋਸਟ ਬਿਊਰੋ) : ਰਿਟਾਇਰਡ ਜਨਰਲ ਰਿੱਕ ਹਿਲੀਅਰ ਦਾ ਕਾਰਜਕਾਲ ਖ਼ਤਮ ਹੋਣ ਤੋਂ ਬਾਅਦ ਤੇ ਉਨ੍ਹਾਂ ਵੱਲੋਂ ਵਾਧਾ ਨਾ ਲਏ ਜਾਣ ਮਗਰੋਂ ਹੁਣ ਆਰੇਂਜ ਏਅਰ ਐਂਬੂਲੈਂਸ ਦੇ ਸੀਈਓ ਤੇ ਪ੍ਰੈਜ਼ੀਡੈਂਟ ਡਾ· ਹੋਮਰ ਟਿਏਨ ਪ੍ਰੋਵਿੰਸ ਦੀ ਵੈਕਸੀਨ ਟਾਸਕ ਫੋਰਸ ਦੇ ਹੈੱਡ ਦਾ ਅਹੁਦਾ ਸਾਂਭਣਗੇ।
ਇੱਕ ਬਿਆਨ ਜਾਰੀ ਕਰਕੇ ਸੌਲੀਸਿਟਰ ਜਨਰਲ ਸਿਲਵੀਆ ਜੋਨਜ਼ ਦੇ ਬੁਲਾਰੇ ਸਟੀਫਨ ਵਾਰਨਰ ਨੇ ਆਖਿਆ ਕਿ ਹੁਣ ਇਹ ਟਰੌਮਾ ਸਰਜਨ ਕੋਵਿਡ-19 ਵੈਕਸੀਨ ਡਿਸਟ੍ਰਿਬਿਊਸ਼ਨ ਟਾਸਕ ਫੋਰਸ ਦੇ ਹੈੱਡ ਦੀ ਜਿ਼ੰਮੇਵਾਰੀ ਨਿਭਾਉਣਗੇ।ਉਨ੍ਹਾਂ ਇਹ ਵੀ ਆਖਿਆ ਕਿ ਪ੍ਰੋਵਿੰਸ ਵਿੱਚ ਵੈਕਸੀਨ ਦੀ ਵੰਡ ਦਾ ਦੂਜਾ ਪੜਾਅ ਸ਼ੁਰੂ ਹੋ ਗਿਆ ਹੈ।
ਜਦੋਂ ਤੋਂ ਇਹ ਟਾਸਕ ਫੋਰਸ ਕਾਇਮ ਹੋਈ ਹੈ ਡਾ· ਟਿਏਨ ਇਸ ਟਾਸਕ ਫੋਰਸ ਦਾ ਹਿੱਸਾ ਰਹੇ ਹਨ। ਇਸ ਟਾਸਕ ਫੋਰਸ ਰਾਹੀਂ ਹੀ ਉੱਤਰੀ ਓਨਟਾਰੀਓ ਤੇ ਮੂਸੋਨੀ ਦੀਆਂ 31 ਦੂਰ ਦਰਾਜ ਦੀਆਂ ਫਰਸਟ ਨੇਸ਼ਨ ਕਮਿਊਨਿਟੀਜ਼ ਤੱਕ ਵੈਕਸੀਨ ਦੀ ਵੰਡ ਕੀਤੀ ਗਈ।ਡਾ· ਟਿਏਨ ਦਾ ਕਾਰਜਕਾਲ ਪਹਿਲੀ ਅਪਰੈਲ ਤੋਂ ਸ਼ੁਰੂ ਹੋਵੇਗਾ ਤੇ 31 ਅਗਸਤ ਨੂੰ ਮੁੱਕੇਗਾ।