ਲੰਡਨ, 4 ਅਪਰੈਲ (ਪੋਸਟ ਬਿਊਰੋ) : ਉੱਤਰੀ ਆਇਰਲੈਂਡ ਵਿੱਚ ਦੂਜੀ ਰਾਤ ਹੋਈਆਂ ਹਿੰਸਕ ਵਾਰਦਾਤਾਂ ਵਿੱਚ ਪੁਲਿਸ ਅਧਿਕਾਰੀਆਂ ਉੱਤੇ ਪੈਟਰੋਲ ਬੰਬ ਨਾਲ ਹਮਲਾ ਕੀਤਾ ਗਿਆ ਤੇ ਕਾਰਾਂ ਨੂੰ ਅੱਗ ਲਗਾ ਦਿੱਤੀ ਗਈ। ਪੁਲਿਸ ਵੱਲੋਂ ਸਾਰਿਆਂ ਨੂੰ ਸ਼ਾਂਤੀ ਬਣਾਈ ਰੱਖਣ ਦੀ ਅਪੀਲ ਕੀਤੀ ਗਈ ਹੈ।
ਪੁਲਿਸ ਨੇ ਦੱਸਿਆ ਕਿ ਬੈਲਫਾਸਟ ਦੇ ਬਾਹਰੀ ਇਲਾਕੇ ਨਿਊਟਾਊਨਐਬੀ ਵਿੱਚ ਸ਼ਨਿੱਚਰਵਾਰ ਰਾਤ ਨੂੰ ਤਿੰਨ ਕਾਰਾਂ ਨੂੰ ਹਾਈਜੈਕ ਕਰ ਲਿਆ ਗਿਆ ਤੇ ਅੱਗ ਹਵਾਲੇ ਕਰ ਦਿੱਤਾ ਗਿਆ।ਨੌਰਥ ਏਰੀਆ ਕਮਾਂਡਰ ਚੀਫ ਸੁਪਰਡੈਂਟ ਡੈਵੀ ਬੈਂਕ ਨੇ ਆਖਿਆ ਕਿ ਪੁਲਿਸ ਉੱਤੇ ਕੀਤੇ ਗਏ ਹਮਲੇ ਤਹਿਤ ਪੁਲਿਸ ਅਧਿਕਾਰੀਆਂ ਉੱਤੇ 30 ਪੈਟਰੋਲ ਬੰਬ ਸੁੱਟੇ ਗਏ।ਇੱਕ 47 ਸਾਲਾ ਵਿਅਕਤੀ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ ਤੇ ਉਸ ਨੂੰ ਪੁਲਿਸ ਹਿਰਾਸਤ ਵਿੱਚ ਹੀ ਰੱਖਿਆ ਗਿਆ ਹੈ।
ਸੁਂੱਕਰਵਾਰ ਰਾਤ ਨੂੰ ਬੈਲਫਾਸਟ ਤੇ ਲੰਡਨਡੈਰੀ ਵਿੱਚ ਹੋਏ ਦੰਗਿਆਂ ਦੌਰਾਨ 27 ਪੁਲਿਸ ਅਧਿਕਾਰੀ ਜ਼ਖ਼ਮੀ ਹੋ ਗਏ ਤੇ ਅੱਠ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ। ਪੁਲਿਸ ਨੇ ਦੱਸਿਆ ਕਿ ਕਈ ਲੋਕਾਂ ਨੇ ਉਨ੍ਹਾਂ ਉੱਤੇ ਪੱਥਰ, ਬੋਤਲਾਂ ਤੇ ਪਟਾਕੇ ਵੀ ਸੁੱਟੇ।ਇਸ ਦੌਰਾਨ ਦ ਪੁਲਿਸ ਫੈਡਰੇਸ਼ਨ ਫੌਰ ਨੌਰਦਰਨ ਆਇਰਲੈਂਡ ਵੱਲੋ ਹਿੰਸਾ ਨੂੰ ਖਤਮ ਕਰਨ ਦਾ ਸੱਦਾ ਦਿੱਤਾ ਗਿਆ ਤੇ ਇਹ ਵੀ ਆਖਿਆ ਗਿਆ ਕਿ ਆਪਣੀਆਂ ਹੀ ਕਮਿਊਨਿਟੀਜ਼ ਨੂੰ ਨੁਕਸਾਨ ਪਹੁੰਚਾਉਣ ਨਾਲ ਵਿਰੋਧ ਦਾ ਕੋਈ ਤਰੀਕਾ ਤਾਂ ਨਹੀਂ।
ਇਹ ਤਣਾਅ ਇਸ ਲਈ ਪੈਦਾ ਹੋਇਆ ਕਿਉਂਕਿ ਉੱਤਰੀ ਆਇਰਲੈਂਡ ਵਿਧਾਨਸਭਾ ਦੇ ਕੁੱਝ ਮੈਂਬਰਾਂ ਵੱਲੋਂ ਆਈਰਿਸ਼ ਰਿਪਬਲਿਕਨ ਸਿੰਨ ਫੇਨ ਪਾਰਟੀ ਦੇ ਉਨ੍ਹਾਂ ਦੋ ਦਰਜਨ ਸਿਆਸਤਦਾਨਾਂ ਨੂੰ ਸੈਂਸਰ ਕਰਨ ਦੀ ਮੰਗ ਕੀਤੀ ਗਈ ਜਿਨ੍ਹਾਂ ਨੇ ਆਈਰਿਸ਼ ਰਿਪਬਲਿਕਨ ਆਰਮੀ ਦੇ ਸਾਬਕਾ ਹੈੱਡ ਆਫ ਇੰਟੈਲੀਜੈਂਸ ਬੌਬੀ ਸਟੋਰੀ ਦੀਆਂ ਜੂਨ ਵਿੱਚ ਨਿਭਾਈਆਂ ਗਈਆਂ ਅੰਤਿਮ ਰਸਮਾਂ ਵਿੱਚ ਹਿੱਸਾ ਲਿਆ ਸੀ।