ਰੋਹਤਕ, 1 ਅਪ੍ਰੈਲ (ਪੋਸਟ ਬਿਊਰੋ)- ਭਿਵਾਨੀ ਰੋਡ ਟੀ ਪੁਆਇੰਟ ਉੱਤੇ ਕੱਲ੍ਹ ਤੜਕੇ ਹੋਏ ਸੜਕ ਹਾਦਸੇ ਵਿੱਚ ਕਾਰ ਸਵਾਰ ਚਾਰ ਨੌਜਵਾਨਾਂ ਦੀ ਮੌਤ ਹੋ ਗਈ। ਮ੍ਰਿਤਕਾਂ ਵਿੱਚ ਰੋਹਤਕ ਦੇ ਨਿਡਾਨਾ ਪਿੰਡ ਦਾ 11ਵੀਂ ਵਿੱਚ ਪੜ੍ਹਦਾ 17 ਸਾਲਾ ਵਿਨੈ, ਬੀ ਏ ਫਸਟ ਯੀਅਰ ਦਾ 20 ਸਾਲਾ ਗੌਰਵ, 12ਵੀਂ ਕਲਾਸ ਦਾ 19 ਸਾਲਾ ਰਿਤਿਕ ਅਤੇ ਬਹੁਅਕਬਰਪੁਰ ਪਿੰਡ ਦਾ 21 ਸਾਲਾ ਸੰਜੇ ਸ਼ਾਮਲ ਹਨ। ਇਨ੍ਹਾਂ ਨਾਲ ਕਰਾਰ ਵਿੱਚ ਸਵਾਰ ਸਮਰ ਗੋਪਾਲਪੁਰ ਦਾ 20 ਸਾਲਾ ਰਾਜੀਵ ਗੰਭੀਰ ਜ਼ਖਮੀ ਹੋ ਗਿਆ। ਉਹ ਬੀ ਏ ਫਸਟ ਯੀਅਰ ਦਾ ਵਿਦਿਆਰਥੀ ਹੈ।
ਇਸ ਹਾਦਸੇ ਵਿੱਚ ਜ਼ਖਮੀ ਰਾਜੀਵ ਦੀ ਸ਼ਿਕਾਇਤ ਉੱਤੇ ਸਿਟੀ ਥਾਣਾ ਪੁਲਸ ਨੇ ਕੈਂਟਰ ਚਾਲਕ ਦੇ ਖਿਲਾਫ ਗੈਰ ਇਰਾਦਤਨ ਕਤਲ ਦਾ ਕੇਸ ਦਰਜ ਕੀਤਾ ਹੈ। ਪੁਲਸ ਨੇ ਦੱਸਿਆ ਕਿ ਸੂਚਨਾ ਦੇ ਬਾਅਦ ਮੌਕੇ ਉੱਤੇ ਪਹੁੰਚ ਕੇ ਕਾਰ ਦੇ ਦਰਵਾਜ਼ਿਆਂ ਨੂੰ ਕੱਟ ਕੇ ਲਾਸ਼ਾਂ ਨੂੰ ਬਾਹਰ ਕੱਢਿਆ। ਪੰਜੇ ਦੋਸਤ ਪੀ ਜੀ ਆਈ ਵਿੱਚ ਦਾਖਲ ਆਪਣੇ ਦੋਸਤ ਦਾ ਹਾਲਚਾਲ ਪੁੱਛ ਕੇ ਮੁੜ ਰਹੇ ਸਨ। ਸਿਟੀ ਥਾਣਾ ਪੁਲਸ ਨੂੰ ਇਸ ਘਟਨਾ ਦੀ ਸੀ ਸੀ ਟੀ ਵੀ ਫੁਟੇਜ ਮਿਲੀ ਹੈ, ਜਿਸ ਵਿੱਚ ਦਿੱਸ ਰਿਹਾ ਹੈ ਕਿ ਰੋਹਤਕ ਸ਼ਹਿਰ ਤੋਂ ਕਾਰ ਸਵਾਰ ਤੇਜ਼ ਰਫਤਾਰ ਨਾਲ ਹਿਸਾਰ ਬਾਈਪਾਸ ਉੱਤੇ ਜਾ ਰਹੇ ਸਨ। ਜਦੋਂ ਲੇਨ ਕਰਾਸ ਕਰਨੀ ਚਾਹੀ ਤਾਂ ਕਾਰ ਕੈਂਟਰ ਨਾਲ ਟਕਰਾ ਕੇ ਉਲਟ ਗਈ। ਸੂਚਨਾ ਦੇ ਬਾਅਦ ਮੌਕੇ ਉੱਤੇ ਪਹੁੰਚੀ ਪੁਲਸ ਨੇ ਕਾਰ ਦੇ ਦਰਵਾਜ਼ਿਆਂ ਨੂੰ ਕੱਟ ਕੇ ਲਾਸ਼ਾਂ ਨੂੰ ਬਾਹਰ ਕੱਢਿਆ।