ਨਵੀਂ ਦਿੱਲੀ, 1 ਅਪ੍ਰੈਲ (ਪੋਸਟ ਬਿਊਰੋ)- ਦਿੱਲੀ ਦੀ ਇੱਕ ਵਿਸ਼ੇਸ਼ ਐਨ ਆਈ ਏ ਅਦਾਲਤ ਨੇ ਦਿੱਲੀ ਸਮੇਤ ਭਾਰਤ ਦੇ ਕਈ ਹਿੱਸਿਆਂ ਵਿੱਚ ਅਤਿਵਾਦੀ ਹਮਲੇ ਕਰਨ ਦੀ ਸਾਜ਼ਿਸ਼ ਲਈ ਪਾਕਿਸਤਾਨ ਵਿਚਾਲੇ ਲਸ਼ਕਰੇ ਤੋਇਬਾ ਦੇ ਇੱਕ ਵੱਡੇ ਅਤਿਵਾਦੀ ਨੂੰ 10 ਸਾਲ ਕੈਦ ਦੀ ਸਜ਼ਾ ਸੁਣਾਈ ਹੈ।
ਅਤਿਵਾਦੀ ਸੈਫਉਲਾ ਮਨਸੂਰ ਉਰਫ਼ ਬਹਾਦੁਰ ਅਲੀ ਨੇ ਦਿੱਲੀ ਸਮੇਤ ਭਾਰਤ ਦੇ ਵੱਖ-ਵੱਖ ਥਾਂਵਾਂ ਉੱਤੇ ਹਮਲੇ ਕਰਨ ਲਈ ਜੰਮੂ-ਕਸ਼ਮੀਰ ਤੋਂ ਦੋ ਹੋਰ ਅਤਿਵਾਦੀਆਂ ਅਬੂ ਸਾਦ ਅਤੇ ਕਾਬੂ ਦਰਦਾ ਨਾਲ ਘੁਸਪੈਠ ਕੀਤੀ ਸੀ। ਇਸ ਦੇ ਬਾਅਦ ਸੁਰੱਖਿਆ ਬਲਾਂ ਨੇ ਮਨਸੂਰ ਉਰਫ਼ ਬਹਾਦੁਰ ਅਲੀ ਨੂੰ ਜੰਮੂ-ਕਸ਼ਮੀਰ ਵਿੱਚ ਕੁਪਵਾੜਾ ਜ਼ਿਲ੍ਹੇ ਦੇ ਯਾਹਮਾ ਪਿੰਡ ਤੋਂ 25 ਜੁਲਾਈ 2016 ਨੂੰ ਗ੍ਰਿਫਤਾਰ ਕੀਤਾ ਸੀ। ਅਤਿਵਾਦੀ ਮਨਸੂਰ ਕੋਲੋਂ ਮਿਲੇ ਹਥਿਆਰਾਂ ਵਿੱਚ ਏ ਕੇ-47 ਰਾਈਫਲ, ਹੈਂਡ ਗ੍ਰਨੇਡ, ਅੰਡਰ ਬੈਰਲ ਗ੍ਰਨੇਡ ਲਾਂਚਰ, ਗੋਲਾ-ਬਾਰੂਦ, ਫੌਜੀ ਨਕਸ਼ਾ, ਵਾਇਰਲੈਸ ਸੈਟ, ਜੀ ਪੀ ਐਸ, ਕੰਪਾਸ, ਭਾਰਤੀ ਰੁਪਏ ਅਤੇ ਨਕਲੀ ਭਾਰਤੀ ਸ਼ਾਮਲ ਸਨ। ਐਨ ਆਈ ਏ ਨੇ ਮਨਸੂਰ ਦੇ ਖ਼ਿਲਾਫ਼ 27 ਜੁਲਾਈ 2016 ਨੂੰ ਇਹ ਕੇਸ ਦਰਜ ਕੀਤਾ ਸੀ, ਜਿਸ ਦੀ ਜਾਂਚ ਦੌਰਾਨ ਮਨਸੂਰ ਨੇ ਲਸ਼ਕਰ ਦੇ ਵੱਖ-ਵੱਖ ਟੈਸਟਾਂ ਦੀ ਸੂਹ ਦਿੱਤੀ ਸੀ। ਮਨਸੂਰ ਨੇ ਏਜੰਸੀ ਨੂੰ ਲਸ਼ਕਰ ਅਤਿਵਾਦੀਆਂ ਲਈ ਹਥਿਆਰ, ਵਿਸਫੋਟਕ, ਵਾਇਰਲੈਸ ਸੈਟ, ਨਾਈਟ ਵਿਜ਼ਨ ਡਿਵਾਈਸ, ਜੀ ਪੀ ਐਸ ਪੁਚਾਉਣ ਅਤੇ ਗਰਿੱਡਾ ਰੈਫਰੈਂਸ ਨਾਲ ਉਨ੍ਹਾਂ ਦੇ ਕੰਮ ਕਰਨ ਦੇ ਢੰਗਾਂ ਬਾਰੇ ਦੱਸਿਆ। ਜਾਂਚ ਤੋਂ ਬਾਅਦ ਐਨ ਆਈ ਏ ਨੇ 6 ਜਨਵਰੀ 2017 ਨੂੰ ਮਨਸੂਰ ਦੇ ਖ਼ਿਲਾਫ਼ ਦੋਸ਼ ਪੱਤਰ ਦਾਖ਼ਲ ਕੀਤਾ ਸੀ।
ਵਰਨਣ ਯੋਗ ਹੈ ਕਿ ਅਬੂ ਸਾਦ ਤੇ ਆਬੂੁ ਦਰਦਾ ਕੁਪਵਾੜਾ ਜ਼ਿਲ੍ਹੇ ਵਿੱਚ 14 ਫਰਵਰੀ 2017 ਨੂੰ ਮੁਕਾਬਲੇ ਵਿੱਚ ਮਾਰੇ ਗਏ ਸਨ। ਐਨ ਆਈ ਏ ਨੇ ਅਦਾਲਤ ਨੂੰ ਦੱਸਿਆ ਕਿ ਜਾਂਚ ਦੌਰਾਨ ਮਨਸੂਰ ਦੇ ਦੋ ਸਾਥੀ, ਜਹੂਰ ਅਹਿਮਦ ਪੀਰ ਤੇ ਜੰਮੂੁ-ਕਸ਼ਮੀਰ ਦੇ ਨਜ਼ੀਰ ਅਹਿਮਦ ਪੀਰ ਨੂੰ ਵੀ ਗ਼੍ਰਿਫ਼ਤਾਰ ਕੀਤਾ ਗਿਆ ਸੀ। ਅਤਿਵਾਦੀ ਮਨਸੂਰ ਖ਼ਿਲਾਫ਼ ਵੱਖ-ਵੱਖ ਧਾਰਾਵਾਂ ਤਹਿਤ ਮਾਮਲੇ ਦਾਖ਼ਲ ਕੀਤੇ ਗਏ ਸੀ।