*ਟੂਰਿਸਟਾਂ ਦੇ ਆਉਣ ਉਤੇ ਪਾਬੰਦੀ ਲਾਈ ਗਈ
ਨਗਰੋਟਾ ਸੂਰੀਆਂ, 28 ਮਾਰਚ (ਪੋਸਟ ਬਿਊਰੋ)- ਪੌਂਗ ਡੈਮ ਝੀਲ ਦੇ ਜੰਗਲੀ ਰੱਖ ਖੇਤਰ ਵਿੱਚ ਬਰਡ ਫਲੂ ਨਾਲ ਇੱਕ ਵਾਰ ਫਿਰ ਪਰਵਾਸੀ ਪੰਛੀ ਮਰਨੇ ਸ਼ੁਰੂ ਹੋ ਗਏ ਹਨ। ਬਰਡ ਫਲੂ ਦੇ ਦੂਸਰੇ ਰੂਪ ਦੇ ਸ਼ੱਕ ਕਾਰਨ ਜੰਗਲੀ ਜੀਵ ਵਿਭਾਗ ਨੇ ਝੀਲ ਵਿੱਚ ਟੂਰਿਸਟਾਂ ਦੇ ਆਉਣ ਉੱਤੇ ਕੱਲ੍ਹ ਪਾਬੰਦੀ ਲਾ ਦਿੱਤੀ ਹੈ।
ਬੀਤੇ ਸ਼ੁੱਕਰਵਾਰ ਨੂੰ ਨਗਰੋਟਾ ਸੂਰੀਆਂ ਬੀਟ ਦੇ ਤਹਿਤ ਰੈਂਸਰ ਟਾਪੂ ਨੂੰ ਜਾਣ ਵਾਲੇ ਦਲਦਲੀ ਰਸਤੇ ਵਿੱਚ ਅੱਠ ਵਿਦੇਸ਼ੀ ਪਰਿੰਦੇ ਬਾਰ ਹੈਡੇਡ ਗੂਜ ਉਤੇ ਮਰੇ ਹੋਏ ਮਿਲੇ ਸਨ। ਕੱਲ੍ਹ ਓਸੇ ਥਾਂ ਪੰਜ ਹੋਰ ਬਾਰ ਹੈਡੇਡ ਗੂਜ ਮਰੇ ਹੋਏ ਮਿਲੇ। ਵਾਈਲਡ ਲਾਈਫ ਦੇ ਡੀ ਐਫ ਓ (ਜਿ਼ਲਾ ਜੰਗਲਾਤ ਅਫਸਰ) ਰੋਹਨ ਰਹਾਣੇ ਨੇ ਦੱਸਿਆ ਕਿ ਇਸ ਝੀਲ ਵਿੱਚ ਕੁਝ ਹੀ ਵਿਦੇਸ਼ੀ ਪੰਛੀ ਬਾਕੀ ਹਨ, ਜਿਨ੍ਹਾਂ ਦੀ ਗਿਣਤੀ 1000 ਤੋਂ 1200 ਤੱਕ ਹੈ। ਇਹ ਲਗਾਤਾਰ ਸਾਇਬੇਰੀਆ ਮੁੜ ਰਹੇ ਹਨ।ਉਨ੍ਹਾਂ ਦੱਸਿਆ ਕਿ ਇਨ੍ਹਾਂ ਪੰਛੀਆਂ ਦੀ ਮੌਤ ਦੇ ਲਛਣ ਬਰਡ ਫਲੂ ਵਰਗੇ ਹਨ। ਵਿਭਾਗ ਨੇ ਦੋ ਪੰਛੀਆਂ ਦੇ ਸੈਂਪਲ ਲੈ ਕੇ ਜਲੰਧਰ ਭੇਜੇ ਹਨ ਅਤੇ ਪੌਂਗ ਝੀਲ ਵਿੱਚ ਵਿਦੇਸ਼ੀ ਪਰਿੰਦਿਆਂ ਦੀ ਸੁਰੱਖਿਆ ਲਈ 10 ਟੀਮਾਂ ਲਾਈਆਂ ਹਨ।