ਲੁਧਿਆਣਾ, 27 ਮਾਰਚ (ਪੋਸਟ ਬਿਊਰੋ)- ਸੇਂਟ੍ਰਲ ਜੀ ਐੱਸ ਟੀ ਵਿਭਾਗ ਨੇ ਖੰਨਾ ਦੇ ਦੋ ਲੋਕਾਂ ਨੂੰ ਫਰਜ਼ੀ ਕੰਪਨੀਆਂ ਬਣਾ ਕੇ ਬਿਲਿੰਗ ਕਰ ਕੇ ਇਨਪੁਟ ਕ੍ਰੈਡਿਟ ਟੈਕਸ (ਆਈ ਟੀ ਸੀ) ਕਲੇਮ ਨਾਲ ਸਰਕਾਰ ਨਾਲ ਠੱਗੀ ਦੇ ਦੋਸ਼ ਵਿੱਚ ਫੜਿਆ ਹੈ। ਵਿਭਾਗ ਨੂੰ ਦੋਸ਼ੀਆਂ ਤੋਂ 19 ਫਰਜ਼ੀ ਫਰਮ ਦੇ ਸਬੂਤ ਮਿਲੇ ਹਨ, ਜਿਨ੍ਹਾਂ ਨੇ 484 ਕਰੋੜ ਦੀ ਬੋਗਸ ਬਿਲਿੰਗ ਕੀਤੀ ਤੇ 48 ਕਰੋੜ ਰੁਪਏ ਦੇ ਆਈ ਟੀ ਸੀ ਕਲੇਮ ਭਰ ਕੇ ਸਰਕਾਰ ਤੋਂ 40 ਕਰੋੜ ਦਾ ਰਿਫੰਡ ਲਿਆ ਸੀ।
ਪ੍ਰਿੰਸੀਪਲ ਕਮਿਸ਼ਨਰ ਆਸ਼ੁਤੋਸ਼ ਬਰਨਵਾਲ ਤੇ ਐਂਟੀ ਇਵੇਜ਼ਨ ਵਿੰਗ ਨੇ ਦੱਸਿਆ ਕਿ ਖੰਨਾ ਦੇ ਬਲਜਿੰਦਰ ਸਿੰਘ ਬੰਟੀ ਨੇ ਪਹਿਲਾਂ ਫਰਜ਼ੀ ਧਾਗਾ ਫਰਮ ਬਣਾਈ ਅਤੇ ਫਿਰ ਫਰਜ਼ੀ ਬਿਲ ਬਣਾ ਕੇ ਸਰਕਾਰ ਨਾਲ ਠੱਗੀ ਕੀਤੀ ਸੀ। ਉਸ ਨੂੰ ਖੰਨਾ ਵਾਲੇ ਘਰ ਤੋਂ ਫੜਿਆ ਗਿਆ ਤੇ 44 ਲੱਖ 60 ਹਜ਼ਾਰ ਰੁਪਏ ਨਕਦ ਬਰਾਮਦ ਕੀਤੇ ਗਏ। ਬਲਜਿੰਦਰ ਨੇ ਪੁੱਛਗਿੱਛ ਵਿੱਚ ਮੰਨਿਆ ਕਿ ਉਹ ਫਰਜ਼ੀ ਬਿਲ ਬਣਾ ਕੇ ਸਰਕਾਰ ਨੂੰ ਕਰੋੜਾਂ ਰੁਪਏ ਦਾ ਰਗੜਾ ਲਾ ਚੁੱਕਾ ਹੈ। ਅਦਾਲਤ ਨੇ ਦੋਸ਼ੀ ਨੂੰ 26 ਅਪ੍ਰੈਲ ਤੱਕ ਜੁਡੀਸ਼ਲ ਹਿਰਾਸਤ ਵਿੱਚ ਭੇਜ ਦਿੱਤਾ ਹੈ। ਬਲਜਿੰਦਰ ਦਾ ਇੱਕ ਸਹਿਯੋਗੀ ਵਿਸ਼ਾਲ ਸਿੰਘ ਵੀ ਵਿਭਾਗ ਨੇ ਫੜਿਆ ਹੈ, ਜਿਸ ਨੇ ਗਿਰੀਰਾਜ ਟ੍ਰੇਡਿੰਗ ਕੰਪਨੀ ਬਣਾ ਕੇ 19 ਫਰਮਾਂ ਦਾ ਕਾਰੋਬਾਰ ਦਿਖਾਇਆ ਤੇ ਵਿਭਾਗ ਨੂੰ ਢਾਈ ਕਰੋੜ ਰੁਪਏ ਦਾ ਰਗੜਾ ਲਾਇਆ ਹੈ। ਉਸ ਨੇ ਮੰਨਿਆ ਕਿ ਉਸ ਨੇ 21.89 ਕਰੋੜ ਦੀ ਜਾਲੀ ਬਿਲਿੰਗ ਕੀਤੀ ਹੈ।