ਓਨਟਾਰੀਓ, 26 ਮਾਰਚ (ਪੋਸਟ ਬਿਊਰੋ) : ਜੀਟੀਏ ਦੇ ਅਜੇ ਵੀ ਲਾਕਡਾਊਨ ਵਿੱਚ ਚੱਲ ਰਹੇ ਦੋ ਹੌਟ ਸਪੌਟਸ ਵਿੱਚ ਜਾਰੀ ਪਾਬੰਦੀਆਂ ਵਿੱਚ ਪ੍ਰੋਵਿੰਸ ਥੋੜ੍ਹੀ ਤਬਦੀਲੀ ਕਰ ਸਕਦੀ ਹੈ।
ਓਨਟਾਰੀਓ ਦੇ ਮੈਡੀਕਲ ਆਫੀਸਰ ਆਫ ਹੈਲਥ ਡਾ· ਬਾਰਬਰਾ ਯਾਫੇ ਦਾ ਕਹਿਣਾ ਹੈ ਕਿ ਗ੍ਰੇਅ ਜ਼ੋਨ ਵਿੱਚ ਕੁੱਝ ਹੋਰ ਆਊਟਡੋਰ ਗਤੀਵਿਧੀਆਂ ਦੀ ਖੁੱਲ੍ਹ ਦਿੱਤੀ ਜਾ ਸਕਦੀ ਹੈ। ਉਨ੍ਹਾਂ ਆਖਿਆ ਕਿ ਇਸ ਮੁੱਦੇ ਨੂੰ ਕੁਈਨਜ਼ ਪਾਰਕ ਵਿੱਚ ਸਵੇਰ ਸਮੇਂ ਕੀਤੀ ਜਾਣ ਵਾਲੀ ਕੈਬਨਿਟ ਮੀਟਿੰਗ ਵਿੱਚ ਵਿਚਾਰਿਆ ਜਾਵੇਗਾ। ਇਸ ਸਬੰਧ ਵਿੱਚ ਪ੍ਰੋਵਿੰਸ ਵੱਲੋਂ ਐਲਾਨ ਸ਼ੁੱਕਰਵਾਰ ਦੁਪਹਿਰ ਨੂੰ ਕੀਤਾ ਜਾ ਸਕਦਾ ਹੈ। ਯਾਫੇ ਨੇ ਆਖਿਆ ਕਿ ਜਿਸ ਤਰ੍ਹਾਂ ਦੀ ਵੀ ਖੁੱਲ੍ਹ ਸਾਡੇ ਵੱਲੋਂ ਦਿੱਤੀ ਜਾਵੇਗੀ ਉਸ ਦੇ ਨਾਲ ਇਹ ਵੀ ਯਕੀਨੀ ਬਣਾਉਣਾ ਹੋਵੇਗਾ ਕਿ ਲੋਕ ਸੋਸ਼ਲ ਡਿਸਟੈਂਸਿੰਗ ਦਾ ਧਿਆਨ ਰੱਖਣ ਤੇ ਜਿੰਨਾ ਹੋ ਸਕੇ ਸੇਫ ਰਹਿਣ।
ਇਸ ਸਮੇਂ ਟੋਰਾਂਟੋ ਤੇ ਪੀਲ ਦੇ ਉੱਘੇ ਡਾਕਟਰ ਤੇ ਅਧਿਕਾਰੀ ਪ੍ਰੋਵਿ਼ੰਸ਼ੀਅਲ ਅਧਿਕਾਰੀਆਂ ਨਾਲ ਗੱਲਬਾਤ ਕਰ ਰਹੇ ਹਨ ਤਾਂ ਕਿ ਪਬਲਿਕ ਹੈਲਥ ਯੂਨਿਟਸ ਨੂੰ ਸੋਧੀਆਂ ਹੋਈਆਂ ਪਾਬੰਦੀਆਂ ਨਾਲ ਲਾਕਡਾਊਨ ਵਿੱਚ ਰੱਖਿਆ ਜਾ ਸਕੇ। ਇਸ ਦੌਰਾਨ ਆਊਟਡੋਰ ਗਤੀਵਿਧੀਆਂ ਤੇ ਸੇਵਾਵਾਂ ਦੀ ਖੁੱਲ੍ਹ ਦਿੱਤੀ ਜਾ ਸਕਦੀ ਹੈ। ਪਰ ਟੋਰਾਂਟੋ ਦੇ ਮੇਅਰ ਤੇ ਉੱਘੇ ਡਾਕਟਰ ਕਿਸੇ ਵੀ ਤਰ੍ਹਾਂ ਦੀਆਂ ਪਾਬੰਦੀਆਂ ਵਿੱਚ ਢਿੱਲ ਦੇਣ ਲਈ ਤਿਆਰ ਨਹੀਂ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਸ ਸਮੇਂਂ ਨਵੇਂ ਇਨਫੈਕਸ਼ੀਅਸ ਵੇਰੀਐਂਟਸ ਆਉਣ ਕਾਰਨ ਅਜਿਹਾ ਕਰਨਾ ਸੇਫ ਨਹੀਂ ਹੋਵੇਗਾ।
ਫੋਰਡ ਸਰਕਾਰ ਵੱਲੋਂ ਪਿਛਲੇ ਹਫਤੇ ਫਰੇਮਵਰਕ ਵਿੱਚ ਕੀਤੀਆਂ ਗਈਆਂ ਤਬਦੀਲੀਆਂ ਤੋਂ ਬਾਅਦ ਗ੍ਰੇਅ ਜ਼ੋਨ ਵਿੱਚ ਹੁਣ ਰੈਸਟੋਰੈਂਟਸ ਤੇ ਬਾਰਜ਼ ਵਿੱਚ ਆਊਟਡੋਰ ਪੈਟੀਓ ਡਾਈਨਿੰਗ ਦੀ ਇਜਾਜ਼ਤ ਦਿੱਤੀ ਗਈ ਹੈ। ਪਰ ਅਜਿਹੀ ਡਾਈਨਿੰਗ ਦੀ ਖੁੱਲ੍ਹ ਵੀ ਇੱਕੋ ਪਰਿਵਾਰ ਦੇ ਮੈਂਬਰਾਂ ਨੂੰ ਹੀ ਦਿੱਤੀ ਗਈ ਹੈ।ਮੇਅਰ ਜੌਹਨ ਟੋਰੀ ਵੱਲੋਂ ਵੀਰਵਾਰ ਨੂੰ ਇਹ ਜਾਣਕਾਰੀ ਦਿੱਤੀ ਗਈ ਸੀ ਕਿ ਕੁੱਝ ਮਨੋਰੰਜਨ, ਫਿੱਟਨੈੱਸ ਤੇ ਪਰਸਨਲ ਕੇਅਰ ਸਰਵਿਸਿਜ਼ ਨੂੰ ਵੀ ਇਜਾਜ਼ਤ ਦੇਣ ਬਾਰੇ ਗੱਲਬਾਤ ਚੱਲ ਰਹੀ ਹੈ।