ਯੂ ਐੱਨ ਓ, 24 ਮਾਰਚ (ਪੋਸਟ ਬਿਊਰੋ)- ਯੂ ਐੱਨ ਦੇ ਸਕੱਤਰ ਜਨਰਲ ਐਂਤੋਨੀਓ ਗੁਟੇਰੇਜ਼ ਨੇ ਕੋਰੋਨਾ ਮਹਾਮਾਰੀ ਦੇ ਦੌਰਾਨ ਏਸ਼ੀਆਈਆਂ ਅਤੇ ਏਸ਼ੀਆਈ ਮੂਲ ਦੇ ਅਮਰੀਕੀ ਲੋਕਾਂ ਖਿਲਾਫ ਵਧਦੀ ਹਿੰਸਾ ਬਾਰੇ ਗੰਭੀਰ ਚਿੰਤਾ ਪ੍ਰਗਟ ਕਰਦੇ ਹੋਏ ਕਿਹਾ ਹੈ ਕਿ ਪਿਛਲੇ ਸਾਲ ਵਾਪਰੀਆਂ ਹਜ਼ਾਰਾਂ ਘਟਨਾਵਾਂ ਨੇ ਅਸਹਿਣਸ਼ੀਲਤਾ, ਰੂੜ੍ਹੀਵਾਦੀ ਵਿਚਾਰਧਾਰਾ ਅਤੇ ਮਾੜੇ ਵਿਹਾਰ ਦੇ ਸਦੀਆਂ ਪੁਰਾਣੇ ਇਤਿਹਾਸ ਨੂੰ ਕਾਇਮ ਰੱਖਿਆ ਹੈ।
ਗੁਟੇਰੇਜ਼ ਦਾ ਇਹ ਬਿਆਨ ਅਟਲਾਂਟਾ ਤੇ ਉਸ ਦੇ ਆਸਪਾਸ ਇਸ ਮਹੀਨੇ ਗੋਲੀਬਾਰੀ ਦੀਆਂ ਕੁਝ ਘਟਨਾਵਾਂ ਹੋਣ ਦੇਮੁੱਦੇ ਉਤੇ ਆਇਆ ਹੈ। ਇਨ੍ਹਾਂ ਘਟਨਾਵਾਂ ਵਿੱਚ ਅੱਠ ਜਣਿਆਂ ਦੀ ਮੌਤ ਹੋ ਗਈ ਸੀ, ਜਿਨ੍ਹਾਂ ਵਿੱਚ ਛੇ ਏਸ਼ੀਆਈ ਮੂਲ ਦੀਆਂ ਔਰਤਾਂ ਸ਼ਾਮਲ ਸਨ। ਗੁਟੇਰੇਜ਼ ਦੇ ਬੁਲਾਰੇ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਵਿਸ਼ਵ ਨੇ ਭਿਆਨਕ ਹਮਲੇ, ਸ਼ਬਦੀ ਅਤੇ ਸਰੀਰਕ ਸ਼ੋਸ਼ਣ, ਸਕੂਲਾਂ ਵਿੱਚ ਇੱਕ ਦੂਜੇ ਨੂੰ ਪ੍ਰੇਸ਼ਾਨ ਕਰਨ, ਕੰਮ ਕਾਜ ਦੀ ਥਾਂ ਉਤੇ ਵਿਤਕਰੇ, ਮੀਡੀਆ ਤੇ ਸੋਸ਼ਲ ਮੀਡੀਆ ਮੰਚਾਂ ਉੱਤੇ ਨਫਰਤ ਲਈ ਉਕਸਾਉਣਾ ਅਤੇ ਸ਼ਕਤੀਸ਼ਾਲੀ ਅਹੁਦਿਆਂ ਉੱਤੇ ਕਾਬਜ਼ ਲੋਕਾਂ ਦੀ ਭੜਕਾਊ ਭਾਸ਼ਾ ਵੇਖੀ। ਇਸ ਦੌਰਾਨ ਯੂ ਐੱਨ ਮਹਿਲਾ ਸੰਗਠਨ ਦੀ ਮੁਖੀ ਫੁਮਜ਼ਿਲੇ ਮਲਾਂਬੋ ਨਗੁਕਾ ਨੇ ਕਿਹਾ ਹੈ ਕਿ ਲਿੰਗ ਸਮਾਨਤਾ ਲਈ ਲਗਾਤਾਰ ਆਵਾਜ਼ ਚੁੱਕ ਰਹੇ ਵਿਸ਼ਵ ਨੂੰ ਰਾਜਸੀ ਅਗਵਾਈ ਦੇ ਖੇਤਰ ਵਿੱਚ ਮਹਿਲਾ-ਪੁਰਸ਼ ਅਸਮਾਨਤਾ ਦੂਰ ਕਰਨ ਲਈ ਤੇ ਕੋਵਿਡ-19 ਮਹਾਮਾਰੀ ਤੋਂ ਬਾਅਦ ਅਰਥਵਿਵਸਥਾ ਨੂੰ ਮੁੜ ਖੜ੍ਹਾ ਕਰਨ ਵਿੱਚ ਔਰਤਾਂ ਦੀ ਮਜ਼ਬੂਤ ਆਵਾਜ਼ ਯਕੀਨੀ ਬਣਾਉਣ ਲਈ ਕੰਮ ਕਰਨਾ ਚਾਹੀਦਾ ਹੈ।