ਬੋਲਡਰ, ਕੋਲੋਰਾਡੋ, 23 ਮਾਰਚ (ਪੋਸਟ ਬਿਊਰੋ) : ਕੋਲੋਰਾਡੋ ਦੀ ਸੁਪਰਮਾਰਕਿਟ ਵਿੱਚ ਲੋਕਾਂ ਉੱਤੇ ਗੋਲੀਆਂ ਚਲਾਉਣ ਵਾਲਾ ਮਸ਼ਕੂਕ ਸਿਰਫ 21 ਸਾਲਾਂ ਦਾ ਲੜਕਾ ਸੀ, ਜਿਸ ਨੇ ਇਸ ਹਮਲੇ ਤੋਂ ਛੇ ਦਿਨ ਪਹਿਲਾਂ ਹੀ ਅਸਾਲਟ ਵੈਪਨ ਖਰੀਦੇ ਸਨ।ਇਹ ਜਾਣਕਾਰੀ ਅਧਿਕਾਰੀਆਂ ਨੇ ਦਿੱਤੀ।
ਜਿ਼ਕਰਯੋਗ ਹੈ ਕਿ 21 ਸਾਲਾ ਅਹਿਮਦ ਅਲੀ ਅਲੀਵੀ ਅਲੀਸਾ ਨੇ 16 ਮਾਰਚ ਨੂੰ ਹਥਿਆਰ ਖਰੀਦਿਆ ਤੇ ਇਸ ਤੋਂ ਠੀਕ ਛੇ ਦਿਨ ਬਾਅਦ ਬੋਲਡਰ ਵਿੱਚ ਕਿੰਗ ਸੂਪਰਜ਼ ਸਟੋਰ ਉੱਤੇ ਹਮਲਾ ਕਰ ਦਿੱਤਾ। ਇਸ ਹਮਲੇ ਵਿੱਚ ਇੱਕ ਪੁਲਿਸ ਅਧਿਕਾਰੀ ਸਮੇਤ 10 ਵਿਅਕਤੀ ਮਾਰੇ ਗਏ। ਅਜੇ ਤੱਕ ਇਹ ਪਤਾ ਨਹੀਂ ਲੱਗ ਸਕਿਆ ਹੈ ਕਿ ਇਹ ਗੰਨ ਕਿੱਥੋਂ ਖਰੀਦੀ ਗਈ ਸੀ। ਅਲੀਸਾ ਅਰਵਾਡਾ ਦੇ ਡੈਨਵਰ ਸਬਅਰਬ ਤੋਂ ਹੈ। ਇਸ ਸਮੇਂ ਉਸ ਨੂੰ ਕਤਲ ਦੇ ਦੋਸ਼ਾਂ ਹੇਠ ਕਾਊਂਟੀ ਦੀ ਜੇਲ੍ਹ ਵਿੱਚ ਬੰਦ ਕੀਤਾ ਗਿਆ ਹੈ। ਇੱਥੇ ਬੰਦ ਕਰਨ ਤੋਂ ਪਹਿਲਾਂ ਉਸ ਦਾ ਇਲਾਜ ਵੀ ਕਰਵਾਇਆ ਗਿਆ। ਉਸ ਨੂੰ ਪਹਿਲੀ ਵਾਰੀ ਵੀਰਵਾਰ ਨੂੰ ਅਦਾਲਤ ਸਾਹਮਣੇ ਪੇਸ਼ ਕੀਤਾ ਜਾਵੇਗਾ।
ਹਾਲਾਂਕਿ ਜਾਂਚਕਾਰ ਇਸ ਹਮਲੇ ਪਿਛਲਾ ਕਾਰਨ ਤਾਂ ਨਹੀਂ ਪਤਾ ਲਾ ਸਕੇ ਹਨ ਪਰ ਉਨ੍ਹਾਂ ਦਾ ਮੰਨਣਾ ਹੈ ਕਿ ਅਲੀਸਾ ਹੀ ਅਜਿਹਾ ਬੰਦੂਕਧਾਰੀ ਸੀ। ਇੱਕ ਪੁਲਿਸ ਅਧਿਕਾਰੀ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਮਸ਼ਕੂਕ ਦੇ ਪਰਿਵਾਰ ਵੱਲੋਂ ਜਾਂਚਕਾਰਾਂ ਨੂੰ ਦਿੱਤੀ ਗਈ ਜਾਣਕਾਰੀ ਵਿੱਚ ਦੱਸਿਆ ਗਿਆ ਕਿ ਅਲੀਸਾ ਕਿਸੇ ਤਰ੍ਹਾਂ ਦੀ ਮਾਨਸਿਕ ਬਿਮਾਰੀ ਤੋਂ ਪਰੇਸ਼ਾਨ ਹੈ ਤੇ ਉਸ ਨੂੰ ਭਰਮ ਵੀ ਪੈਂਦੇ ਹਨ।ਇਸ ਦੌਰਾਨ ਵਾਸਿ਼ੰਗਟਨ ਵਿੱਚ ਰਾਸ਼ਟਰਪਤੀ ਜੋਅ ਬਾਇਡਨ ਨੇ ਕਾਂਗਰਸ ਨੂੰ ਦੇਸ਼ ਦੇ ਗੰਨ ਲਾਅਜ਼ ਨੂੰ ਸਖ਼ਤ ਕਰਨ ਲਈ ਆਖਿਆ।