ਤਲਅਵੀਵ, 23 ਮਾਰਚ (ਪੋਸਟ ਬਿਊਰੋ)- ਇਸਰਾਈਲ ਦੇ ਪੁਰਾਤੱਤਵ ਮਾਹਰਾਂ ਨੂੰ ਮੌਤ ਦੀ ਗੁਫਾ ਵਿੱਚੋਂ 6000 ਸਾਲ ਪੁਰਾਣਾ ਬੱਚੀ ਦਾ ਪਿੰਜਰ ਮਿਲਿਆ ਹੈ। ਇਹ ਮੌਤ ਦੀ ਗੁਫਾ ਇਸਰਾਈਲ ਦੇ ਜੁਦੇਆਨ ਰੇਗਿਸਤਾਨ ਵਿੱਚ ਮ੍ਰਿਤਕ ਸਾਗਰ ਦੇ ਨਾਲ ਲੱਗਦੀ ਹੈ। ਸਾਲ 1960 ਦੇ ਦਹਾਕੇ ਵਿੱਚ ਕਰੀਬ ਚਾਲੀ ਮਨੁੱਖੀ ਪਿੰਜਰ ਮਿਲਣ ਦੇ ਬਾਅਦ ਇਸ ਪੁਰਾਤਨ ਗੁਫਾ ਦਾ ਨਾਂਅ ‘ਮੌਤ ਦੀ ਗੁਫਾ’ ਰੱਖ ਦਿੱਤਾ ਗਿਆ ਸੀ।
ਖੋਜਕਾਰਾਂ ਨੂੰ ਬੱਚੀ ਦਾ ਇਹ ਪਿੰਜਰ ਗੁਫਾ ਦੇ ਸੁੱਕੇ ਵਾਤਾਵਰਣ ਵਿੱਚ ਕੁਦਰਤੀ ਰੂਪ ਵਿੱਚ ਮਮੀ ਵਿੱਚ ਬਦਲਿਆ ਹੋਇਆ ਮਿਲਿਆ ਹੈ। ਇਸ ਪਿੰਜਰ ਤੱਕ ਰੱਸੀ ਦੇ ਸਹਾਰੇ ਚੜ੍ਹ ਕੇ ਪਹੁੰਚਿਆ ਜਾ ਸਕਦਾ ਹੈ। ਪਿੰਜਰ ਦੇ ਸੀਟੀ ਸਕੈਨ ਤੋਂ ਪਤਾ ਲੱਗਾ ਹੈ ਕਿ ਇਹ ਛੇ ਤੋਂ 12 ਸਾਲ ਦੀਬੱਚੀ ਦਾ ਹੈ। ਮੰਨਿਆ ਜਾ ਰਿਹਾ ਹੈ ਕਿ ਇਹ ਲੜਕੀ ਸੀ। ਉਸ ਦੇ ਚਮੜੇ ਤੇ ਵਾਲ 6000 ਸਾਲ ਬੀਤ ਜਾਣ ਦੇ ਬਾਅਦ ਵੀ ਅੰਸ਼ਿਕ ਰੂਪ ਵਿੱਚ ਅਜੇ ਤੱਕ ਬਚੇ ਹੋਏ ਹਨ।
ਇਸਰਾਈਲੀ ਇਤਿਹਾਸਕਾਰ ਰੋਨਿਤ ਲੂਪੂ ਨੇ ਕਿਹਾ ਕਿ ਇਹ ਸੁਭਾਵਿਕ ਹੈ ਕਿ ਓਦੋਂ ਜਿਸ ਨੇ ਵੀ ਇਸ ਬੱਚੀ ਨੂੰ ਦਫਨਾਇਆ ਹੋਵੇਗਾ, ਉਸ ਨੇ ਕੱਪੜੇ ਵਿੱਚ ਲਪੇਟ ਦਿੱਤਾ ਸੀ। ਲੂਪੂ ਨੇ ਕਿਹਾ ਕਿ ਇਹ ਕੁਝ ਉਸੇ ਤਰ੍ਹਾਂ ਹੀ ਹੁੰਦਾ ਹੈ ਜਿਵੇਂ ਮਾਪੇ ਆਪਣੇ ਬੱਚੇ ਨੂੰ ਕੰਬਲ ਵਿੱਚ ਲਪੇਟ ਲੈਂਦੇ ਹਨ। ਬੱਚੀ ਦੇ ਹੱਥ ਵਿੱਚ ਵੀ ਕੁਝ ਕੱਪੜੇ ਬੰਨ੍ਹੇ ਹੋਏ ਸਨ। ਇਹ ਪਿੰਜਰ ਮ੍ਰਿਤ ਸਾਗਰ ਵਿੱਚ ਸਥਿਤ ਸੂਚੀ ਪੱਤਰ ਦੇ ਕੋਲ ਮਿਲੇ ਹਨ। ਇਹ ਸੂਚੀ ਪੱਤਰ ਹਿਬਰੂ ਭਾਸ਼ਾ ਵਿੱਚ ਲਿਖੇ ਸਭ ਤੋਂ ਪ੍ਰਾਚੀਨ ਅੱਖਰ ਹਨ। ਹਾਲ ਹੀ ਵਿੱਚ ਇਥੋਂ 2000 ਸਾਲ ਪੁਰਾਣੇ ਸੂਚੀ ਪੱਤਰ ਮਿਲੇ ਸਨ। ਇਸੇ ਇਲਾਕੇ ਤੋਂ ਦੁਨੀਆ ਦੀ ਸਭ ਤੋਂ ਪੁਰਾਣੀ ਟੋਕਰੀ ਵੀ ਮਿਲੀ ਸੀ, ਜੋ ਕਰੀਬ 10 ਹਜ਼ਾਰ ਸਾਲ ਪੁਰਾਣੀ ਹੈ।