ਓਟਵਾ, 18 ਮਾਰਚ (ਪੋਸਟ ਬਿਊਰੋ) : ਕੈਨੇਡਾ ਵਿੱਚ ਚਾਈਲਡ ਕੇਅਰ ਬਾਰੇ ਸਾਹਮਣੇ ਆਈ ਨਵੀਂ ਰਿਪੋਰਟ ਵਿੱਚ ਕਈ ਡੇਅ ਕੇਅਰ ਮੁਹੱਈਆ ਕਰਵਾਉਣ ਵਾਲੇ ਇਸ ਸਮੇਂ ਵਿੱਤੀ ਸੰਕਟ ਵਿੱਚੋਂ ਲੰਘ ਰਹੇ ਹਨ। ਹਾਲਾਤ ਇਹ ਹਨ ਕਿ ਚਾਈਲਡ ਕੇਅਰ ਲਈ ਫੀਸਾਂ ਵਿੱਚ ਭਾਵੇਂ ਕਾਫੀ ਵਾਧਾ ਕੀਤਾ ਗਿਆ ਹੈ ਪਰ ਮਹਾਂਮਾਰੀ ਕਾਰਨ ਅਜਿਹੇ ਡੇਅਕੇਅਰਜ਼ ਨੂੰ ਬੰਦ ਕੀਤਾ ਜਾ ਸਕਦਾ ਹੈ।
ਕੈਨੇਡੀਅਨ ਸੈਂਟਰ ਫੌਰ ਪਾਲਿਸੀ ਆਲਟਰਨੇਟਿਵਜ਼ ਵੱਲੋਂ ਪੇਸ਼ ਕੀਤੀ ਗਈ ਸਾਲਾਨਾ ਰਿਪੋਰਟ ਵਿੱਚ ਸਾਹਮਣੇ ਆਇਆ ਕਿ ਪਿਛਲੇ ਸਾਲ ਬਹੁਤੇ ਡੇਅ ਕੇਅਰਜ਼ ਦੀ ਫੀਸ ਵਿੱਚ ਵਾਧਾ ਕੀਤਾ ਗਿਆ ਹੈ। ਓਟਵਾ, ਰੇਜਾਈਨਾ ਤੇ ਹੈਲੀਫੈਕਸਲ ਵਰਗੀਆਂ ਥਾਂਵਾਂ ਉੱਤੇ ਇੱਕ ਫੀ ਸਦੀ ਤੋਂ ਲੈ ਕੇ ਬਰੈਂਪਟਨ, ਓਨਟਾਰੀਓ ਵਿੱਚ 21 ਫੀ ਸਦੀ ਤੱਕ ਦਾ ਵਾਧਾ ਦਰਜ ਕੀਤਾ ਗਿਆ ਹੈ।ਦੂਜੇ ਪਾਸੇ ਚਾਰ ਸ਼ਹਿਰਾਂ ਵੈਨਕੂਵਰ, ਮੌਂਕਟਨ, ਵਾੲ੍ਹੀਟਹੌਰਸ ਤੇ ਯੈਲੋਨਾਈਫ ਵਿੱਚ ਇਨ੍ਹਾਂ ਕੀਮਤਾਂ ਵਿੱਚ ਕਮੀ ਨੋਟ ਕੀਤੀ ਗਈ ਹੈ।
ਜਿਨ੍ਹਾਂ ਡੇਅਕੇਅਰਜ਼ ਦਾ ਸਰਵੇਖਣ ਕੀਤਾ ਗਿਆ ਹੈ ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਹ ਵਾਧਾ ਕੋਵਿਡ-19 ਕਾਰਨ ਹੋਇਆ ਹੈ। ਬਹੁਤੇ ਡੇਅਕੇਅਰਜ਼ ਨੂੰ ਕੋਵਿਡ-19 ਦੀ ਪਹਿਲੀ ਵੇਵ ਦੌਰਾਨ ਬੰਦ ਕੀਤਾ ਗਿਆ। ਇਸ ਨਾਲ ਕੰਮਕਾਜੀ ਮਾਪਿਆਂ ਨੂੰ ਕਾਫੀ ਦਿੱਕਤ ਆਈ ਤੇ ਉਨ੍ਹਾਂ ਦੇ ਕੰਮ ਦਾ ਵੀ ਹਰਜਾ ਹੋਇਆ। ਇਹ ਵੀ ਪਤਾ ਲੱਗਿਆ ਕਿ ਇੱਕ ਵਾਰੀ ਖੁੱਲ੍ਹਣ ਤੋਂ ਬਾਅਦ ਅਜਿਹੇ ਡੇਅਕੇਅਰਜ਼ ਵਿੱਚ ਬੱਚਿਆਂ ਦੀ ਗਿਣਤੀ ਸੀਮਤ ਰਹੀ। ਹਾਲਾਤ ਇਹ ਹਨ ਕਿ ਜਿਨ੍ਹਾਂ ਡੇਅਕੇਅਰਜ਼ ਵਿੱਚ ਬੱਚਿਆ ਦੀ ਗਿਣਤੀ 20 ਤੋਂ 30 ਸੀ ਹੁਣ ਉਨ੍ਹਾਂ ਵਿੱਚ ਸਿਰਫ 5 ਬੱਚੇ ਹੀ ਆ ਰਹੇ ਹਨ।
ਫੀਸ ਹਾਸਲ ਨਾ ਹੋਣ ਕਾਰਨ ਮਹਾਂਮਾਰੀ ਦੇ ਇਸ ਦੌਰ ਵਿੱਚ ਕਈ ਡੇਅਕੇਅਰ ਮੁੜ ਬੰਦ ਹੋਣ ਕਿਨਾਰੇ ਹਨ। ਰਿਪੋਰਟ ਤਿਆਰ ਕਰਨ ਵਾਲਿਆਂ ਦਾ ਕਹਿਣਾ ਹੈ ਕਿ ਇਸ ਨਾਲ ਆਰਥਿਕ ਰਿਕਵਰੀ ਵਿੱਚ ਵੀ ਸਮੱਸਿਆ ਆਵੇਗੀ। ਰਿਪੋਰਟ ਵਿੱਚ ਇਹ ਵੀ ਲਿਖਿਆ ਗਿਆ ਹੈ ਕਿ ਫੈਡਰਲ ਲਿਬਰਲ ਸਰਕਾਰ ਨੂੰ ਆਪਣੀ ਚਾਈਲਡ ਕੇਅਰ ਪਾਲਿਸੀ ਵਿੱਚ ਵੀ ਇਸ ਸਮੱਸਿਆ ਦਾ ਹੱਲ ਕਰਨਾ ਹੋਵੇਗਾ।