ਓਟਵਾ, 17 ਮਾਰਚ (ਪੋਸਟ ਬਿਊਰੋ) : ਮੌਡਰਨਾ ਦਾ ਕਹਿਣਾ ਹੈ ਕਿ ਕੋਵਿਡ-19 ਵੈਕਸੀਨ ਦੇ ਕਲੀਨਿਕਲ ਟ੍ਰਾਇਲਜ਼ ਵਿੱਚ ਹੁਣ ਕੈਨੇਡੀਅਨ ਬੱਚਿਆਂ ਨੂੰ ਵੀ ਸ਼ਾਮਲ ਕੀਤਾ ਜਾਵੇਗਾ।
ਕੰਪਨੀ ਨੇ ਆਪਣੇ ਫੇਜ਼ 2-3 ਦੇ ਅਧਿਐਨ ਦਾ ਐਲਾਨ ਇਸ ਹਫਤੇ ਦੇ ਸ਼ੁਰੂ ਵਿੱਚ ਕੀਤਾ ਸੀ। ਇਸ ਅਧਿਐਨ ਦੌਰਾਨ ਛੇ ਮਹੀਨਿਆਂ ਤੋਂ 12 ਸਾਲਾਂ ਦੇ 6750 ਤੰਦਰੁਸਤ ਬੱਚਿਆਂ ਨੂੰ ਸ਼ਾਮਲ ਕੀਤਾ ਜਾਵੇਗਾ। ਮੌਡਰਨਾ ਨੇ ਆਖਿਆ ਕਿ ਇਨ੍ਹਾਂ ਟ੍ਰਾਇਲਜ਼ ਵਿੱਚ ਸੁ਼ਰੂ ਵਿੱਚ ਹਿੱਸਾ ਲੈਣ ਵਾਲਿਆਂ ਵਿੱਚ ਅਮਰੀਕਾ ਦੇ ਬੱਚਿਆਂ ਨੂੰ ਹੀ ਸ਼ਾਮਲ ਕੀਤਾ ਜਾਵੇਗਾ ਪਰ ਹੌਲੀ ਹੌਲੀ ਜਿਵੇਂ ਜਿਵੇਂ ਟ੍ਰਾਇਲ ਅੱਗੇ ਵੱਧਣਗੇ ਇਨ੍ਹਾਂ ਵਿੱਚ ਕੈਨੇਡੀਅਨ ਬੱਚਿਆਂ ਨੂੰ ਵੀ ਸ਼ਾਮਲ ਕੀਤਾ ਜਾਵੇਗਾ।
ਬਾਇਓਟੈਕ ਕੰਪਨੀ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੇ ਅਜੇ ਕੈਨੇਡੀਅਨ ਸਾਈਟਸ ਨਹੀਂ ਚੁਣੀਆਂ ਤੇ ਨਾ ਹੀ ਕੈਨੇਡੀਅਨ ਪਾਰਟੀਸਿਪੈਂਟਸ ਦੀ ਹੀ ਚੋਣ ਕੀਤੀ ਗਈ ਹੈ। ਮੌਡਰਨਾ ਦੀ ਸੀਈਓ ਸਟੀਫਨ ਬੈਂਸਲ ਦਾ ਕਹਿਣਾ ਹੈ ਕਿ ਇਹ ਅਧਿਐਨ ਲਈ ਬੜਾ ਹੀ ਅਹਿਮ ਗਰੁੱਪ ਹੈ।