ਸਿਨੇਮਾਘਰਾਂ ਦੇ ਖੁੱਲ੍ਹਣ ਦੇ ਕਰੀਬ ਪੰਜ ਮਹੀਨੇ ਬਾਅਦ ਵੀ ਬਾਕਸ ਆਫਿਸ 'ਤੇ ਪੁਰਾਣੀ ਰੰਗਤ ਨਹੀਂ ਦਿਸ ਰਹੀ ਹੈ। ਓਧਰ ਦੇਸ਼ ਵਿੱਚ ਕੋਰੋਨਾ ਦੇ ਫਿਰ ਤੋਂ ਵਧਦੇ ਮਾਮਲਿਆਂ ਨੇ ਨਿਰਮਾਤਾਵਾਂ ਦਾ ਡਰ ਹੋਰ ਵਧਾ ਦਿੱਤਾ ਹੈ। ਅਜਿਹੇ ਵਿੱਚ ਫਰਹਾਨ ਅਖਤਰ ਅਤੇ ਮ੍ਰਿਣਾਲ ਠਾਕੁਰ ਦੀ ਫਿਲਮ ‘ਤੂਫਾਨ’ ਨੇ ਡਿਜੀਟਲ ਪਲੇਟਫਾਰਮ ਦਾ ਰੁਖ਼ ਕੀਤਾ ਹੈ। ਇਹ ਫਿਲਮ ਅਮੇਜਨ ਪ੍ਰਾਈਮ ਵੀਡੀਓ 'ਤੇ 21 ਮਈ ਨੂੰ ਰਿਲੀਜ਼ ਹੋਵੇਗੀ।
ਨਿਰਮਾਤਾ ਰਿਤੇਸ਼ ਸਿਧਵਾਨੀ ਦੱਸਦੇ ਹਨ ਕਿ ‘ਤੂਫਾਨ’ ਬਾਕਸਿਗ 'ਤੇ ਆਧਾਰਤ ਇੱਕ ਸਪੋਰਟਸ ਡਰਾਮਾ ਹੈ। ਇਸ ਵਿੱਚ ਡੋਂਗਰੀ (ਮੁੰਬਈ ਦਾ ਇੱਕ ਇਲਾਕਾ) ਦੇ ਇੱਕ ਸੜਕਛਾਪ ਗੁੰਡੇ ਦੇ ਪਤਨ ਅਤੇ ਸਾਰੀਆਂ ਰੁਕਾਵਟਾਂ ਨੂੰ ਪਾਰ ਕਰਦੇ ਹੋਏ ਜਿੱਤ ਹਾਸਲ ਕਰਨ ਦੀ ਕਹਾਣੀ ਦਿਖਾਈ ਗਈ ਹੈ। ਸਾਲ 2013 ਵਿੱਚ ਰਿਲੀਜ਼ ਹੋਈ ਫਿਲਮ ‘ਭਾਗ ਮਿਲਖਾ ਭਾਗ’ ਮਗਰੋਂ ਫਰਹਾਨ ਦੋਬਾਰਾ ਰਾਕੇਸ਼ ਓਮ ਪਰਕਾਸ਼ ਮਹਿਰਾ ਦੇ ਨਿਰਦੇਸ਼ਨ ਵਿੱਚ ਕੰਮ ਕਰ ਰਹੇ ਹਨ। ਰਾਕੇਸ਼ ਕਹਿੰਦੇ ਹਨ, ‘‘ਫਰਹਾਨ ਦੀ ਸਭ ਤੋਂ ਚੰਗੀ ਗੱਲ ਹੈ ਕਿ ਉਹ ਸਿਰਫ ਐਕਟਿੰਗ ਨਹੀਂ ਕਰਦੇ, ਕਿਰਦਾਰ ਜੀਉਂਦੇ ਹਨ। ‘ਤੂਫਾਨ’ ਸਭ ਨੂੰ ਸਹਿਜਤਾ ਨਾਲ ਬਾਹਰ ਨਿਕਲਣ ਅਤੇ ਸੁਫਨਿਆਂ ਨੂੰ ਹਕੀਕਤ ਵਿੱਚ ਬਦਲਣ ਦੇ ਲਈ ਪ੍ਰੇਰਿਤ ਕਰੇਗੀ।”