ਸਸਕਾਟੂਨ, 11 ਮਾਰਚ (ਪੋਸਟ ਬਿਊਰੋ) : ਕੋਲੰਬੀਆ ਵਿੱਚ ਪੈਦਾ ਹੋਈ ਮਾਂ ਦਾ ਕਹਿਣਾ ਹੈ ਕਿ ਫੈਡਰਲ ਜੱਜ ਵੱਲੋਂ ਆਰਜ਼ੀ ਤੌਰ ਉੱਤੇ ਉਸ ਨੂੰ ਡੀਪੋਰਟ ਕੀਤੇ ਜਾਣ ਦੇ ਮਾਮਲੇ ਵਿੱਚ ਦਿੱਤੀ ਗਈ ਸਟੇਅ ਤੋਂ ਉਹ ਕਾਫੀ ਖੁਸ਼ ਹੈ। ਜੇ ਉਸ ਨੂੰ ਡੀਪੋਰਟ ਕੀਤਾ ਜਾਂਦਾ ਤਾਂ ਉਸ ਨੂੰ ਦੋ ਸਾਲਾਂ ਲਈ ਆਪਣੀ ਨਿੱਕੀ ਬੱਚੀ ਤੋਂ ਦੂਰ ਰਹਿਣਾ ਪੈਂਦਾ।
ਉਸ ਨੇ ਆਖਿਆ ਕਿ ਉਹ ਤੇ ਉਸ ਦਾ ਪਾਰਟਨਰ ਕਾਫੀ ਖੁਸ਼ ਹਨ। ਡਾਇਨਾ ਪਾਰਾ ਬੇਡੋਆ ਨੇ ਆਖਿਆ ਕਿ ਉਹ ਐਨੀ ਖੁਸ਼ ਹੈ ਕਿ ਕੋਈ ਅੰਦਾਜ਼ਾ ਵੀ ਨਹੀਂ ਲਾ ਸਕਦਾ। ਇਮੀਗ੍ਰੇਸ਼ਨ ਲਾਇਰ ਟਾਇਲਰ ਗੋਏਟਲ ਨੇ ਆਖਿਆ ਕਿ ਅਦਾਲਤ ਨੇ ਇੱਕ ਮਾਂ ਨੂੰ ਬੱਚੇ ਤੋ ਦੂਰ ਕਰਨ ਦੇ ਮਨੋਵਿਗਿਆਨਕ ਪ੍ਰਭਾਵ ਦੀ ਅਹਿਮੀਅਤ ਨੂੰ ਸਮਝਿਆ ਤੇ ਉਸ ਤੋਂ ਬਾਅਦ ਹੀ ਇਹ ਫੈਸਲਾ ਲਿਆ।
ਪਿਛਲੇ ਮਹੀਨੇ ਕੈਨੇਡਾ ਬੌਰਡਰ ਸਰਵਿਸਿਜ਼ ਏਜੰਸੀ (ਸੀਬੀਐਸਏ) ਨੇ ਬੈਡੋਆ ਨੂੰ ਇਸ ਸ਼ੁੱਕਰਵਾਰ ਕੋਲੰਬੀਆ ਡੀਪੋਰਟ ਕਰਨ ਦਾ ਸ਼ਡਿਊਲ ਬਣਾਇਆ ਸੀ ਪਰ ਅਦਾਲਤ ਦੇ ਫੈਸਲੇ ਨਾਲ ਉਸ ਦੀ ਲੀਗਲ ਟੀਮ ਨੂੰ ਆਪਣੇ ਇਸ ਕੇਸ ਉੱਤੇ ਹੋਰ ਕੰਮ ਕਰਨ ਦਾ ਸਮਾਂ ਮਿਲ ਗਿਆ ਹੈ।